Epanọ Uzẹme na U Re Ro Ru Omai Emuyẹ
1 Evaọ ẹdẹjọ, Jesu ọ ta kẹ ahwo Ju nọ e rọwo riẹ nnọ: “Wha te riẹ uzẹme na, uzẹme na u re ti ru owhai emuyẹ.” (Jọn 8:32) Ọ jẹ ta kpahe ufuoma nọ o rro vi ufuoma ahwo akpọ gheghe, ufuoma nọ o rẹ sai te ahwo kpobi obọ—te edafe, iyogbere, gbe enọ e riobe hayo enọ e riobe he. Jesu o wuhrẹ uzẹme nọ o rẹ wha ufuoma no igbo uzioraha gbe uwhu ze. Wọhọ epanọ Jesu ọ ta, “kohwo kohwo nọ ọ raha uzi ọye họ ọrigbo uzioraha.” (Jọn 8:34) Ẹvẹ ma bi rẹro oke na te nọ ahwo-akpọ ẹmeoyo kpobi a ti ro “no igbo egbogbo eruọ eva uvẹ oruaro emọ Ọghẹnẹ”!—Rom 8:21.
2 Uzẹme kpahe Jesu gbe ọkwa riẹ evaọ erugba ẹjiroro Ọghẹnẹ o rẹ wha ufuoma utioye na ze. O kẹre te eriariẹ kpahe idhe ẹtanigbo nọ ọ kẹ fiki mai na. (Rom 3:24) Makọ enẹna, ẹjẹrehọ gbe ẹmeoyo kẹ uzẹme Ebaibol na u re ru omai reawere oghẹrẹ ufuoma jọ no ozọ, ababọ-ẹruore, gbe oghẹrẹ iruemu enwoma kpobi.
3 Ufuoma No Ozọ gbe Ababọ-Ẹruore: U du fo re iyero akpọ na i mi omai ẹruore mai hi keme ma riẹ oware nọ emuemu ọ rọ rrọ yọ ma riẹ nnọ a ti si ei no otọakpọ na kẹle. (Ol. 37:10, 11; 2 Tim. 3:1; Evia. 12:12) Ofariẹ re, uzẹme na u si omai no iwuhrẹ erue kpahe uyero iwhuowhu na. Ma riẹ nnọ iwhuowhu na a rẹ sae nwa omai oma ha, a be ruẹ uye olahiẹ ibẹdẹ hẹ, yọ Ọghẹnẹ o re kpe ahwo re a ruẹse jọ kugbe ei evaọ obọ akpọ izi hi.—Ọtausi. 9:5; Iruẹru 24:15.
4 Uzẹme utioye na o wha ọsẹ gbe oni nọ ọmọ rai o whu evaọ asidẹnte udu ga. Oni na ọ ta nnọ: “Oria jọ o rrọ goli evaọ uzuazọ mai nọ o rẹ sae vọhọ họ bẹsenọ ma rẹ wariẹ ruẹ ọmọ mai ẹkwoma ẹkparomatha na. Rekọ ma riẹ nnọ edada mai yọ erọ ubroke gheghe.”
5 Ufuoma No Iruemu Enwoma: Uzẹme Ebaibol o rẹ sai nwene iroro gbe uruemu ohwo, o vẹ wha ufuoma no ebẹbẹ jọ nọ a rẹ sae whaha ze. (Ẹf. 4:20-24) Oruọzewọ gbe obọ ukruga evaọ iruo o rẹ sai fi obọ họ nọ uvuhu o gbẹ ga te ere he. (Itẹ 13:4) Edhesẹ uyoyou omarodheidhe o rẹ lẹliẹ usu kugbe amọfa woma viere. (Kọl. 3:13, 14) Adhẹẹ kẹ ọkwa uzou-uwo Oleleikristi u re ru ebẹbẹ uviuwou kawo. (Ẹf. 5:33–6:1) Ẹwhaha udi-odavrẹta, ọfariẹ-ogbe, utaba, gbe ẹrehọ imu egaga nọ e rẹ reria-obọ e rẹ wha omokpokpọ ze.—Itẹ 7:21-23; 23:29, 30; 2 Kọr. 7:1.
6 O jọ bẹbẹ kẹ Upelẹ ọzae jọ nọ ọ rehọ imu egaga reria obọ te ikpe izii no re o siobọno ai. Ẹdẹ jọ ọ tẹ nya ku owhowho-uvie jọ nọ o bi ru isẹri-ise iyẹrẹ. Ọ rehọ obe, a te ru ọruẹrẹfihọ re a zihe bru ei eva obọ uwou riẹ. A te mu uwuhrẹ Ebaibol họ. Emerae ivẹ nọ i lele i rie ọzae na ọ tẹ siọ imu ba ẹrehọ riẹriẹriẹ, yọ nọ o wuhrẹ te emerae eree no, ọ tẹ họ-ame. Nọ oniọvo riẹ avọ aye oniọvo riẹ na a ruẹ nnọ o siobọno imu erehọ no a te muọ Ebaibol họ ewuhrẹ re.
7 Fi Obọ Họ kẹ Amọfa Wo Ufuoma: O rẹ sae jọ bẹbẹ kẹ ahwo nọ a rrọ igbo iwuhrẹ erue anwọ etoke uzuazọ rai kpobi re a wo otoriẹ nọ Ẹme Ọghẹnẹ ọ rẹ kẹ. Re a nya te idu rai o sae gwọlọ obọdẹ osegboja gbe omaruẹrẹhọ mi owuhrẹ na. (2 Tim. 4:2, 5) Oke nana o rrọ oke nọ ma re ro rolo obọ họ evaọ iruo mai orọ ‘eworo obọ-usino kẹ enọ a mu.’ (Aiz. 61:1) Ufuoma Ileleikristi o rrọ ghaghae. Ewo riẹ o rẹ kẹ uzuazọ ibẹdẹ.—1 Tim. 4:16.