Ekareghẹhọ—Etoke nọ A Re Ro Roro Didi

Omoke kpẹkpẹe nọ Jesu ọ rọ emu owọwọ Olori na mu no, a te mu ei je kpei. O jọ etoke akpọriọ họ rekọ etoke nọ a re ro roro didi. Ma jọ Ebaibol na ruẹ uvumọ oria nnọ a je ru ehaa akpọriọ lele emu owọwọ Olori nọ Jesu o ro mu na ha. Ileleikristi ọsosuọ na a ru uvumọ ọruẹrẹfihotọ kẹ oghẹrẹ ehaa akpọriọ otiọye na ha, taure ehaa Ekareghẹhọ na i te ti muhọ hayo oke nọ i kuhọ no.

Ekareghẹhọ na yọ epati hi. Fikiere, u kiehọ re ikoko i ru ọruẹrẹfihotọ kẹ emu othere hayo re iwhowho-uvie i zizie ohwohwo kẹ eghaghọ gbe ile ikporo ho. Onana o rẹ sae lẹliẹ ahwo obọ otafe dhesẹ iẹe wọhọ “Ikresimesi ọ Isẹri Jihova.” Onana o sae wha ezoruẹ ze. (1 Kọr. 8:12, 13; 10:23, 24) Ekareghẹhọ na o rrọ etoke nọ ohwo ọ rẹ jọ re “obọdẹ emu jọ” họ. Re ohwo ọ ta nnọ o gbe ru epati hi oja na evaọ ẹdẹ Ekareghẹhọ na ababọ eroro kpahe obroziẹ-iroro amọfa o rẹ jọ aruorokele Kristi hi, ọnọ ‘o ru eva were omobọ riẹ hẹ.’ (Rom. 15:2, 3) Ekareghẹhọ nọ e rẹ kẹ Jihova ọghọ e rẹ kare iruemu itieye na.

Kọ ẹvẹ ma sai ro ru Ekareghẹhọ na fihọ etoke nọ ma re ro roro didi kpahe idhere mai wọhọ Oleleikristi? Ma rẹ sai roro didi kpahe oware nọ ma ru no gbe oware nọ ma be te rọ izuazọ mai ru evaọ obaro. Ma rẹ sai ru ọtamuo mai ga, onọ ma re ro ru oreva Jihova makọ oware nọ o rẹ via kpobi. Maero, ma rẹ sai roro didi kpahe uyoyou Jihova nọ ọ rọ kẹ ẹtanigbo na, jegbe uyoyou Jesu, ọnọ ọ hwa osa ẹtanigbo na no udu ze re ma ruẹsi wo ẹruore. (Jọn 15:13; Fil. 2:7, 8) O rẹ kẹ uduotahawọ, jẹ kẹ ajọwha gaga re a roro kpahe obọdẹ ọruẹrẹfihotọ nana!—1 Jọn 4:11.