Ẹkpẹti Onọ

◼ Didi omoyọrọ o gwọlọ mi omai evaọ okenọ ma te bi se isẹri kẹ ahwo nọ a rrọ uwou-odi?

O tẹ kawo, ahwo nọ a rrọ uwou-odi evaọ akpọ na soso a bu te ima eree, yọ ejọ rai i bi dhesẹ isiuru kẹ emamọ usi na. (1 Tim. 2:4) Evaọ kamara kamara, ileta nọ ahwo nọ a rrọ uwou-odi avọ ahwo uviuwou rai a bi vi se uwou ogha jọ rọ yare ebe hayo iweze, i bu te 1,400. Dede nọ isiuru ahwo uwou-odi jọ i no eva ze, eware nọ e via no i dhesẹ nnọ ejọ e rẹ faki ru wọhọ nọ a wo isiuru, be gwọlọ erere oriobọ mi ahwo Ọghẹnẹ. Fiki onana, jọ ohwo kpobi ọ kezọ kẹ inuevẹvẹ nọ e rrọ obotọ na kpahe isẹri-ise kẹ ahwo nọ a rrọ uwou-odi.

Evaọ iyero buobu, a rẹ rọ ẹkwoma ileta se isẹri kẹ ahwo uwou-odi. Ma be vẹvẹ unu gaga inọ inievo-emetẹ a kere ileta se ezae nọ e rrọ uwou-odi hi, o tẹ make rrọ nọ fiki ẹjiroro obufihọ abọ-ẹzi dede. Inievo-emezae nọ i te ọvo e rẹ rọ ẹro te owha-iruo yena. A sae ta kẹ inievo-emetẹ nọ i te re a kere ileta se eyae uwou-odi nọ i ghine dhesẹ uvi isiuru kpahe uzẹme Ebaibol na. Who re vi ugho hayo okẹ obọ ra ovuovo se ahwo nọ a rrọ uwou-odi hi, dede nọ ae oma rai a rẹ sae yare eware itieye na.

Nọ ohwo uwou-odi o te dhesẹ isiuru, a re kere odẹ gbe adrẹse riẹ se ukoko nọ u wo ẹkwotọ nọ uwou-odi na o rrọ na. Wọhọ epanọ o rẹ jọ, inievo emezae nọ i te nọ e rrọ ẹkwotọ na a riẹ epanọ a rẹ rọ rehọ ẹro te oghẹrẹ iyero sa-sa nọ e rẹ sae rọ oma via. Otẹrọnọ wha riẹ ukoko nọ u wo ẹkwotọ na ha, wha vi ovuẹ na se uwou ogha na.

O thọ họ re inievo nọ a salọ na a koko ahwo uwou-odi na họ re a wuhrẹ ibuobu rai oke ovona. Dede na, omakugbe obọdẹ nọ iwhowho-uvie i je ku omagbe ahwo uwou-odi ziezi, a re ru ai evaọ obọ iwou-odi hi. Ofariẹ re, o rrọ oware areghẹ hẹ re iwhowho-uvie i weze kpohọ uwou-odi ababọ uvi ẹjiroro, re a je wo usu okpekpe kugbe ahwo uwou-odi.

Wha joma “wo areghẹ wọhọ eriọvọ wowolẹ wọhọ irueruẹ” nọ ma be rehọ emamọ usi na te ahwo nọ a rrọ uwou-odi oma na.—Mat. 10:16.