Ijẹle na I bi Fi Obọ Họ kẹ Omai
1 “Rri! Mẹ rọ kugbe owhai evaọ edẹ na kpobi rite ekuhọ eyero eware na.” Ẹvẹ eme yena e rrọ uduotahawọ te kẹ ahwo kpobi nọ a be nya lele ujaje Jesu na: “Fikiere wha nyai ru ilele ahwo erẹwho na kpobi”! (Mat. 28:18–20, NW ) Ugogo edhere jọ nọ Jesu ọ rọ rrọ kugbe Ileleikristi uzẹme họ ẹkwoma ijẹle riẹ. (Mat. 13:36–43) Ẹvẹ o rrọ oware oghọghọ te re a whowho “usiuwoma ebẹdẹ bẹdẹ na” evaọ okugbe-ọvo kugbe emama ẹzi enana nọ i wo ẹrọwọ na!—Evia. 14:6, 7.
2 Evaọ Odibọgba Mai: Ebaibol na i dhesẹ via inọ a vi ijẹle re a gbodibo kẹ “otu nọ i re ti wo esiwo na.” (Hib. 1:14) Evaọ ikpe-udhusoi ọsosuọ, ijẹle na i je fi obọ họ kpọ ilele Jesu bru ahwo udu-oruọzewọ. (Iruẹru 8:26) Nẹnẹ, idibo Ọghẹnẹ a gbẹ be ruẹ imuẹro ekpakpọ ijẹle na. Evaọ ẹsebuobu, ahwo nọ a wo uwou a ta nọ a be hae lẹ kẹ obufihọ nọ Osẹri jọ ọ nyae ta usiuwoma kẹ ai. Ẹvẹ eva e rẹ were omai, kugbe ijẹle na te, nọ ahwo otiọye na a tẹ jẹ ovuẹ Uvie na rehọ!—Luk 15:10.
3 Nọ Ohwo Ọ tẹ be Rẹriẹ Ovao Dhe Ọwọsuọ: Daniẹl, egbẹnyusu emoha esa Hibru riẹ, Pita ukọ na, gbe amọfa buobu nọ a rẹriẹ ovao dhe edawọ ilogbo a ruẹ uketha nọ Jihova ọ rọ ẹkwoma ijẹle nọ i wo “ẹgba” kẹ no. (Ol. 103:20; Dan. 3:28; 6:21,22; Iruẹru 12:11) Dede nọ ẹsejọ o rẹ sae jọ omai oma wọhọ nọ ma wo uketha ha nọ ma tẹ be rẹriẹ ovao dhe ọwọsuọ, ma rẹ sai wo uduotahawọ no oware nọ o via kẹ odibo Elaeja ze nọ ọ ruẹ nọ “enọ e rọ kugbe omai i bu vi enọ e rọ kugbe ai.” (2 Iv. 6:15–17) O tẹ make rrọ nọ a rehọ obọ ogaga hẹriẹ omai no inievo Ileleikristi mai, ma rẹ kuvẹ re udu u whrehe omai hi. Ẹme Ọghẹnẹ ọ ta udu họ omai awọ nọ: “Ukọ-odhiwu Ọnowo ọ rẹ ria gba enọ e be dhẹozọ riẹ.”—Ol. 34:7.
4 Kẹle na, ogbaẹmo ijẹle o te roma via re a raha ewegrẹ uvie Kristi kpobi no. (Evia. 19:11, 14, 15) Nọ ma be hẹrẹ ẹdẹ yena na, joma ruabọhọ aruọwha nọ ma re ro jiri Jihova, wo imuẹro egaga orọ uketha egbaẹmo obọ odhiwu nọ Kristi o bi su.—1 Pita 3:22.