Iroro-Ejẹ nọ A re ro Fi Ibroshọ na họ Ada Kọ Ọghẹnẹ Ọ be Ghinẹ Daezọ Mai?

Nọ whọ tẹ fodẹ oware imuozọ jọ nọ o via no, whọ sae ta nọ:

“Kọ whọ sai roro no ẹdẹjọ kpahe oware nọ Ọghẹnẹ ọ jẹ be kẹ ahwo-akpọ uvẹ re a ruẹ uye otẹrọnọ ọ be ginẹ daezọ mai? [Kuvẹ kẹ uyo.] Ibroshọ nana ọ kẹ obọdẹ uyo kpahe onọ yena, u te je dhesẹ oware nọ Ọghẹnẹ o ti ru evaọ obaro kẹle na. [Dhesẹ uwoho nọ o rrọ ẹwẹ-obe avọ 27 na, re who je se Olezi 145:16 rono edhe-ẹme avọ 22 ze.] Ẹvẹ Ọghẹnẹ o ti ro si uye-oruẹ nọ ahwo-akpọ a ruẹ no kpobi notọ? Mẹ te kuyo onọ yena evaọ iweze mẹ netha.” Fi ibroshọ na họ-ada kẹe, re who ru ọruẹrẹfihotọ nọ who ti ro zihe.

Eva oke ozihebro na, whọ sae ta nọ:

“Evaọ ẹdẹ nọ mẹ nyaze, ma se ikereakere nana. [Se hayo ta kpahe Olezi 145:16.] Kẹsena mẹ tẹ nọ onọ na: Ẹvẹ Ọghẹnẹ o ti ro si uye-oruẹ nọ ahwo-akpọ a ruẹ no kpobi notọ?” Ta kẹe nọ ọ tọlọ ibroshọ riẹ lahwe. Who ve rovie kpohọ ẹwẹ-obe avọ 27-28, je se edhe-ẹme avọ 23-25. Ta kẹe inọ whọ gwọlọ nọ whọ te hai wuhrẹ obe na kugbei, hayo ru ọruẹrẹfihotọ nọ who ti ro se edhe-ẹme avọ 26-27 evaọ iweze ra netha.

Owhowho-uvie nọ ọ rrọ ikpe ikpegbọ ọ sae ta nọ:

“Oghẹrẹ nọ akpọ na ọ te jọ evaọ ikpe 10 hayo ikpe 15 nọ e be tha o rrọ ọdawẹ kẹ ehwa mẹ buobu. Ẹvẹ who roro nọ akpọ na ọ te jọ eva oke yena? [Kuvẹ kẹ uyo.] Ebẹbẹ nọ ma be ruẹ nẹnẹ na i dhesẹ inọ ma be rria edẹ urere na. [Se 2 Timoti 3:1-3.] Ibroshọ nana o kiyo enọ nana. [Se enọ nọ e rrọ uke ibroshọ na, re who fi ei họ-ada kẹ ohwo na.] Okenọ me te zihe ze, nọ who te wo umuvẹ jọ, mẹ te gwọlọ ta ẹme uduotahawọ jọ kugbe owhẹ kpahe ekuhọ ẹyao gbe owho.” Ru ọruẹrẹfihotọ nọ who ti ro zihe.

Okenọ who te zihe, whọ sae ta nọ:

“Nọ mẹ nyaze ẹdẹ, mẹ ta nọ mẹ gwọlọ ta k’owhẹ kpahe ekuhọ ẹyao gbe owho. Ẹme yena ọ rrọ etenẹ.” Ta kẹe nọ ọ tọlọ ibroshọ riẹ lahwe. Wha ve se jẹ t’ẹme kpahe edhe-ẹme avọ 6-7 eva ẹwẹ-obe avọ 23-24. Ru ọruẹrẹfihotọ nọ wha ti ro se edhe-ẹme avọ 8-9 eva iweze netha.

Nọ ọkpako avọ ọmaha a tẹ rrọ usu, ọkpako na ọ rẹ sai mu ẹme na họ ẹkwoma enẹ nọ ọ rẹ ta:

“Whọ tẹ k’omai uvẹ, ________ ọ gwọlọ se ikereakere jọ kẹ owhẹ. [Ọmọ na o ve se Olezi 37:29 jẹ ta ẹme kpahe iẹe kpẹkpẹe.] Ibroshọ nana o ta kpahe epanọ Ọghẹnẹ o ti ro ru ẹjiroro riẹ kẹ ahwo-akpọ gbe otọakpọ na gba. [Dhesẹ iwoho nọ e rrọ ẹwẹ-obe avọ 24-27 na.] Nọ ma te zihe ze, o te were omẹ re me dhesẹ obọdẹ eyaa ẹkparomatha nọ Ebaibol e yaa kẹ owhẹ.” Fi ibroshọ na họ ada, re who ru ọruẹrẹfihotọ nọ who ti ro zihe.

Nọ wha te zihe, ọkpako na ọ rẹ sae ta nọ:

“Evaọ iweze mai nọ i kpo, ma se Olezi 37:29, yọ mẹ ta nọ mẹ gwọlọ dhesẹ oware nọ Ebaibol e ta kpahe ẹkparomatha k’owhẹ. Rri oware nọ a kere fihọ etenẹ.” Ta kẹe nọ ọ tọlọ ibroshọ riẹ lahwe. Wha ve se edhe-ẹme avọ 12-14 eva ẹwẹ-obe avọ 24-25. Ta kẹe inọ whọ gwọlọ nọ whọ te hai wuhrẹ obe na kugbei, hayo ru ọruẹrẹfihotọ nọ wha te rọ t’ẹme kpahe edhe-ẹme avọ 15-16 eva iweze netha.