Izoge nọ I Bi Lo Wọhọ Ikpẹ
1 Jesu ọ ta kẹ ilele riẹ nọ: “Whai họ elo rọkẹ akpọ na.” (Mat. 5:14, 16) Wọhọ okpẹwho nọ a bọ họ ehru ugbehru, nọ u bi lo nwranwranwra, a re ti wo ohẹriẹ. Izoge Ileleikristi buobu nẹnẹ a bi “lo wọhọ ikpẹ eva akpọ na” ẹkwoma uruemu uwoma gbe isẹri ise ajọwha rai.—Fil. 2:15; Mal. 3:18.
2 Evaọ obọ Isukulu: Ẹvẹ whọ sai ro se isẹri evaọ obọ isukulu? Izoge jọ a rehọ uvẹ ẹmeọta-kugbe evaọ eklase rọ rehọ izoẹme wọhọ imu-lọ, eghrorotha, gbe efa rọ t’ẹme no. Oniọvo-ọmọtẹ jọ nọ a ta kẹ nọ o kere kpahe ozighi ọkparesuọ ọ rehọ uvẹ na ro se isẹri kpahe Uvie Ọghẹnẹ wọhọ uvi ẹruore nọ ọ riẹ kẹ ohwo-akpọ. Ovuẹ na nọ ọ nabe ma te ziezi o were owuhrẹ na gaga, yọ onana u rovie uvẹ kẹ isẹri ise efa.
3 Edhere ọfa nọ who re ro lo wọhọ ukpẹ họ ẹkwoma uruemu ra gbe ẹgọ avọ osẹ owowa ra. (1 Kọr. 4:9; 1 Tim. 2:9) Nọ emọ-isukulu gbe iwuhrẹ a tẹ ruẹ uruemu ra nọ u wo ohẹriẹ, uzẹme na o sai ti si ejọ urru fiki uruemu ezi ra, u ve ti ru owhẹ wo uvẹ nọ whọ rọ ta usiuwoma kẹ ae. (1 Pita 2:12; 3:1, 2) Re a dhesẹ uruemu ezi o rẹ sae jọ bẹbẹ, rekọ Jihova ọ te ghale owhẹ ruaro. (1 Pita 3:16, 17; 4:14) Re whọ kpare isiuru ahwo kẹ emamọ usi na, whọ sai se obe nọ a kere no Ebaibol ze evaọ oke eriosehọ hayo fi ei họ oria nọ amọfa a jẹ sae rue riẹ.
4 Elo ra nọ who re ru re o lo eva obọ isukulu o rẹ bọ ẹrọwọ ra ga je fiobọhọ k’owhẹ rọ evawere dhesẹ oma ra wọhọ ohwo nọ ọ be gọ Jihova. (Jeri. 9:24) O te jọ ọthọwẹ kẹ owhẹ re. Oniọvo-ọmọtẹ jọ ọ ta nọ, “Erere jọ nọ me wo no fiki ẹta kpahe ẹrọwọ mẹ họ emọ-isukulu na a re du lahiẹ oma gwọlọ bẹbẹ omẹ fihọ eruo eware nọ e wọso Ebaibol ho.”
5 Odibọgba Orukẹre: Edhere ọfa nọ izoge buobu a bi ro lo wọhọ ikpẹ họ ẹkwoma erukẹre odibọgba rai. Oniọvo-ọmọzae jọ ọ kwa kpohọ oria nọ ẹgwọlọ kẹ iwhowho-uvie ọ jẹ mae rro nọ o no ekọleji nwrotọ no. O kuomagbe ukoko osese jọ nọ u wo ọkpako ukoko ọvo. O kere se ogbẹnyusu riẹ jọ nọ: “Me bi wo omawere uzuazọ evaọ obonẹ. Iruo odibọgba na e kẹ omosasọ kẹhẹ! Ma rẹ jọ unuẹthẹ ovuovo rọ oware wọhọ iminiti 20 rọ t’ẹme keme ahwo a gwọlọ yo utho nọ whọ rẹ sae ta kẹ ai kpobi.” O fibae nọ: “Dodonikọ uzoge kpobi o re ru oware nọ o wọhọ onana re o wo oghẹrẹ omawere nọ me bi wo na. Oware ovo nọ u woma vi Jihova nọ ma rẹ gọ avọ onọ ma wo kpobi o rrọ họ.”
6 Ma be rọ owhai izoge nọ i bi lo wọhọ ikpẹ evaọ akpọ na ro seha. (1 Tẹs. 2:20) Nọ wha be rọ udu, ẹwẹ, iroro gbe ẹgba rai kpobi rọ gọ Jihova na, wha re ti vu “ekpahọ udheusoi enẹna . . . gbe uzuazọ ebẹdẹ bẹdẹ eva akpọ nọ ọ be tha.”—Mak 10:29, 30; 12:30.
[Study Questions]
1. Oghẹrẹ ve Ebaibol na i ro dhesẹ nọ Ileleikristi a ti wo ohẹriẹ uvevẹ, kọ ẹvẹ eme yena i ro kie kpahe izoge Ileleikristi nẹnẹ?
2. Idhere jọ vẹ whọ sai ro se isẹri kẹ iwuhrẹ gbe emọ-eklase ra?
3. Ẹvẹ whọ sai ro ru re elo ra o lo evaọ obọ isukulu ẹkwoma uruemu ra?
4. Irere jọ vẹ i re no isẹri ise evaọ obọ isukulu ze?
5. (a) Oghẹrẹ vẹ izoge jọ a bi ro ru odibọgba rai kẹre? (b) Didi itee abọ-ẹzi who wo?
6. Eme ọ be jọ oma izoge nọ e rrọ ukoko ra were owhẹ?