Wuhrẹ Enọ I Wo Omarokpotọ re A Nya Evaọ Edhere Ọghẹnẹ
1 A ta kpahe ilele ikpe-udhusoi ọsosuọ Kristi wọhọ nọ a lele “Edhere na.” (Iruẹru 9:2) Uvi Egagọ-Ileleikristi o kẹre te kabọ kabọ uzuazọ ohwo. (Itẹ 3:5, 6) Fikiere, nọ ma te bi ru ebe-iwuhrẹ Ebaibol, eriariẹ egbagba iwuhrẹ Ebaibol nọ ma re wuhrẹ amọfa ọvo i te he. O gwọlọ re nọ ma re fiobọhọ kẹ emọ-uwuhrẹ Ebaibol re a nya evaọ idhere Jihova.—Ol. 25:8, 9.
2 Fi Obọ Họ kẹ Emọ-Uwuhrẹ Ebaibol re A Wo Uyoyou kẹ Jihova avọ Jesu: O rrọ bẹbẹ kẹ ahwo sebaẹgba re a sae kpọ iroro, uruemu, gbe ẹmeunu rai rọwo kugbe oreva Ọghẹnẹ. (Rom 7:21-23; Ẹf. 4:22-24) Rekọ, uyoyou rọkẹ Ọghẹnẹ gbe Ọmọ riẹ o rẹ wọ enọ i wo omarokpotọ jẹ use-abọ nana rehọ. (Jọn 14:15; 1 Jọn 5:3) Ẹvẹ ma sai ro fiobọhọ kẹ emọ-uwuhrẹ Ebaibol mai re a wo uyoyou nana?
3 Fiobọhọ kẹ ọmọ-uwuhrẹ Ebaibol ra re ọ riẹ oghẹrẹ ohwo nọ Jihova ọ rrọ. Oniọvo-ọmọzae jọ ọ ta nọ: “Ahwo a rẹ sai you ohwo nọ a riẹ hẹ hẹ, fikiere, no emuhọ uwuhrẹ na vrẹ, me re wuhrẹ emọ-uwuhrẹ Ebaibol mẹ odẹ Ọghẹnẹ rono Ebaibol na ze, yọ me re rri gwọlọ uvẹ nọ me re ro fiẹgba họ ekwakwa Jihova.” Oriruo Jesu nọ ma re fi elo họ yọ obọdẹ edhere nọ ma re ro ru onana. (Jọn 1:14; 14:9) Fibae, rehọ ẹkpẹti ọkiẹkpemu evaọ urere uzou kpobi orọ obe ọ Ebaibol Wuhrẹ na ro ruiruo ro fiobọhọ kẹ ọmọ-uwuhrẹ na roro kpahe ekwakwa iwoma Jihova gbe erọ Ọmọ riẹ.
4 Rehọ Oriruo Wuhrẹ: Wọhọ enọ i bi wuhrẹ ahwo jẹ be kpọ amọfa họ edhere nọ o fo ẹnya, ma rẹ rọ ẹkwoma oriruo mai wuhrẹ amọfa oware nọ u dhesẹ re a nya evaọ idhere Ọghẹnẹ. (1 Kọr. 11:1) Wọhọ oriruo, o rrọ uruemu emọ-uwuhrẹ Ebaibol buobu hu re a nyabru amọfa jẹ ta oware nọ a rọwo kẹ ae. Fikiere, o sae gwọlọ ithihakọ gbe ona nọ a re ro fiobọhọ kẹ ai wo uyoyou, ẹrọwọ, gbe udu-owha nọ o gwọlọ re a sai wobọ evaọ iruo usiuwoma ota gbe ilele-iruo na. (2 Kọr. 4:13; 1 Tẹs. 2:2) Isiuru mai nọ ma rọ gwọlọ fiobọhọ kẹ emọ-uwuhrẹ mai o te w’omai jọ usu rai re ma fiobọhọ kẹ ae eva oke ọsosuọ nọ a te mu obọ họ ewo evaọ odibọgba Oleleikristi na.
5 Oriruo ra ọ rẹ sai wuhrẹ emọ-uwuhrẹ evaọ abọfa sa-sa nọ o wuzou eva uzuazọ Oleleikristi. Nọ who te bi weze bru enọ e be mọ hayo who bi yere amọfa sasasa ziezi eva iwuhrẹ ukoko, a rẹ ruẹ nọ uyoyou who bi dhesẹ na. (Jọn 15:12) Nọ who te wobọ evaọ erufuọ Ọgwa Uvie hayo ru eware obufihọ kẹ amọfa, yọ who bi dhesẹ kẹ ae epanọ a re ro fiobọhọ kẹ amọfa. (Jọn 13:12-15) Nọ a tẹ ruẹ nọ who bi yeri uzuazọ olọlọhọ, a re wo otoriẹ oware nọ u dhesẹ re a ‘kake gwọlọ uvie na.’—Mat. 6:33.
6 Iruo nọ a re ro wuhrẹ amọfa Ẹme Ọghẹnẹ je ru ilele o gwọlọ omodawọ ogaga. Rekọ dai rri oghọghọ nọ u re noi ze nọ whọ tẹ be ruẹ enọ i wo omarokpotọ nọ a ‘rọ kpahe uzẹme’ na!—3 Jọn 4.
[Study Questions]
1. Re a ru ilele, eme o kẹre te?
2. Eme ọ rẹ sae kẹ ọmọ-uwuhrẹ ọwhọ nọ o re ro koko izi Ọghẹnẹ?
3. Ẹvẹ ma sai ro fiobọhọ kẹ emọ-uwuhrẹ Ebaibol re a wo uyoyou kẹ Jihova gbe Jesu?
4. (a) Fikieme o rọ rrọ use-abọ kẹ emọ-uwuhrẹ buobu re a ta usiuwoma? (b) Kọ ẹvẹ ma sai ro fiobọhọ kẹ emọ-uwuhrẹ mai re a mu obọ họ ewo evaọ odibọgba na?
5. Ẹvẹ emamọ oriruo o re ro fiobọhọ kẹ emọ-uwuhrẹ riẹ oware nọ ẹnya lele izi Ọghẹnẹ o kẹre te?
6. Eme o re noi ze nọ a te bi fiobọhọ kẹ amọfa re a gọ Jihova?