Ẹkpẹti Onọ

◼ Okevẹ gbe oghẹrẹ vẹ a rẹ rọ nọ uwou ogha enọ nọ i no Ikereakere na ze?

Kukpe kukpe, a be hae nọ uwou-ogha Nigeria enọ buobu kpahe eme sa-sa hayo ayare kẹ epanọ a re ru nọ ebẹbẹ e tẹ romavia. A be hai ru onana ẹkwoma ileta gbe ifonu. O rẹ were omai eva re ma fiobọhọ kẹ inievo mai nọ a tẹ gwọlọ obufihọ. Rekọ, evaọ ẹsibuobu a rẹ sai ku eme itieye na họ ababọ uwou ogha nọ a re kere hayo fonu se. Enọ buobu nọ i te uwou-ogha na obọ yọ eware nọ a rẹ sae jọ ebe mai ruẹ iyo rai vevẹ, yọ ebẹbẹ buobu nọ a nọ kpahe na yọ ebẹbẹ nọ ekpako ukoko oborai nọ e riẹ kpahe uyero oborai ziezi a sae rẹrote wowoma.

Fikiere, ma be tuduhọ owhai awọ inọ, nọ wha te wo onọ jọ, kake kiẹ gwọlọ ẹme na evaọ ebe ukoko na ẹkwoma Watch Tower Publications Index nọ whọ rẹ rọ gwọlọ oria nọ whọ jẹ ruẹ ẹme na. Edhere nana nọ a rẹ rọ kiẹ kpahe ẹme u re fiobọhọ kẹ ohwo kpobi wọ owha-iruo obọriẹ orọ iroro-ejẹ evaọ edhere nọ ọ rọwokugbe ithubro Jihova. (Gal. 6:5) Whọ tẹ gwọlọ obufihọ epanọ a rẹ rehọ Index na ro ruiruo, nyabru ọkpako ukoko ra jọ, hayo ọsẹro ọnyawariẹ re o fiobọhọ k’owhẹ.

Ofariẹ, nọ ẹbẹbẹ jọ ọ tẹ riẹ nọ whọ jọ gwọlọ uthubro, ma tuduhọ owhẹ awọ inọ kake nyabru ekpako ukoko ra tao. Inievo enana a riẹ owhẹ gbe uyero ra; a te rehọ Ẹme Ọghẹnẹ k’owhẹ uthubro nọ whọ gwọlọ. (Wawo Itẹ 27:23.) Kareghẹhọ inọ ekpako nọ a ro mu na yọ ọruẹrẹfihotọ nọ Jihova o ru re a sae kẹ obufihọ abọ-ẹzi.—Aiz. 32:1, 2; Jeri. 23:4.

Otẹrọnọ whọ daoma nana nọ ma fodẹ na no, yọ oruvẹ hayo uthubro nọ whọ gwọlọ na u te owhẹ obọ họ, hayo ẹbẹbẹ na o gbe bi siotọ yọ who roro nọ whọ gbẹ gwọlọ obufihọ ofa, ẹsiẹe whọ sae rọ rehọ ẹme na bru uwou ogha. U re woma re who kere onana fihọ ileta, yọ who re kere oware kpobi nọ o via fihọ ileta na vevẹ. Whọ tẹ jiroro nọ who bi kere ze, ma be ta nọ who kere eware enana fihọ ileta na: odẹ ra, ukoko ra gbe omọfa kpobi nọ o wobọ evaọ ẹme na. Ma re se ileta nọ a kere odẹ fihọ họ gboja ha. Who du nọ kpahe uyero hayo eware nọ e re romavia ha ha. Kere eware epanọ e via dẹẹ, whahọ omuroro gbe eme nọ i kpomahọ ẹme na ha. Gbiku epanọ whọ daoma te re who ku ẹbẹbẹ na họ gbe oware nọ who ro roro nọ whọ sai ku ẹme na họ họ. Ma te daoma re ma dhesẹ ehri-izi Ebaibol nọ i kiekpahe ẹme na. Who te bi kere kpahe uthubro nọ ekpako ukoko a kẹ nọ o vọ owhẹ eva ha, u re woma re whọ rehọ ileta na ọvo jọ rọ kẹ ekpako na. Who du rehọ ifonu ro se he ajokpanọ ẹme na ọ gwọlọ uyo okpakpata.