Wha Wuhrẹ Ẹme Ọghẹnẹ Kugbe Wọhọ Uviuwou
1 Noke ruoke Jihova ọ be hae kareghẹhọ enọ i wuzou uviuwou re a wuhrẹ emọ rai. Ọ kẹ Abraham owha-iruo inọ o wuhrẹ uviuwou riẹ re a sai “koko edhere ỌNOWO.” (Emu. 18:19) A kẹ esẹgbini emọ Izrẹl ujaje inọ a rehọ uvẹ kpobi ro wuhrẹ emọ rai. (Izie. 6:6, 7) A tuduhọ enọ i wuzou uviuwou Ileleikristi awọ inọ a yọrọ emọ rai re a ‘yoẹme, jẹ nya lele uzi Ọnowo na.’ (Ẹf. 6:4) Kọ who bi ru onana ẹkwoma uwuhrẹ uviuwou ikẹse kẹse? Otẹrọnọ ọsẹ hayo oni na ọvo ọ rrọ ukoko na, ọye o re ru uwuhrẹ na. Otẹrọnọ emọ e rrọ uwou na ha, ọzae avọ aye na a re ru uwuhrẹ na kugbe.
2 Okevẹ A re ro Ru Uwuhrẹ Na?: O rẹ mai woma re ahwo uviuwou na kpobi a rọwo fihọ oke nọ o mai kiehọ kẹ uwuhrẹ uviuwou na. O rẹ were ahwo jọ re a ru ei evaọ ohiohiẹ nọ eware e re dae uzou fia ha na, efa owọwọ nọ ahwo uviuwou na kpobi a rrọ uwou. Ro lele epanọ uyero uviuwou na o rrọ, iviuwou jọ a sai ru ọruẹrẹfihotọ nọ a re ro ru uwuhrẹ na ẹsiẹvo ẹkpoka; efa a sai ru ọruẹrẹfihotọ re a ru uwuhrẹ na kpẹkpẹe kẹdẹ kẹdẹ. Rri ikpe emọ na ro fi epanọ oke uwuhrẹ na u re theri te họ. Dede nọ u re woma re a nwene oke uwuhrẹ na ẹsejọ fiki eware jọ, wha daoma nya lele omaa ikẹse kẹse. U fo re ahwo uviuwou na kpobi a jariẹ, je wobọ sasasa.
3 Eme A re ro Ru Uwuhrẹ Na?: Wha sae ruẹrẹ oma kpahe kugbe kẹ Uwuhrẹ Uwou-Eroro na hayo Uwuhrẹ Obe Ukoko na. Fiki emaha na, wha sae rehọ obe ọ Wuhrẹ Mi Owuhrẹ Ologbo Na hayo obe Ikuigbe Ebaibol Mẹ ro ru ei. Rọkẹ izoge, obe ọ Young People Ask gbe izoẹme Awake! nọ o kpozi obọ i ti fiobọhọ. Nọ ẹgwọlọ jọ ọ tẹ romavia, wọhọ eware nọ e via evaọ obọ isukulu hayo ekpehre uruemu jọ nọ o be romavia evaọ uwou na, gwọlọ obe nọ a jọ tẹme kpahe ẹbẹbẹ na re wha rehọ iẹe ru uwuhrẹ na. Fodẹ obe nọ wha ti ro ru uwuhrẹ yena kẹ uviuwou na evaọ ẹruoke. Kẹsena wha ve zihe kpohọ obe nọ wha be hai ro ru uwuhrẹ na vẹre. Muẹrohọ nọ ohwo kpobi nọ ọ rẹ sai se evaọ uviuwou na o wo Ebaibol gbe obe nọ wha ti ro ru uwuhrẹ na. O tẹ make rrọ nọ esẹgbini na a riẹ obe he hayo a riẹ obe ese tere he, emọ rai a rẹ sai se kẹ ae. Emọ a re rri esẹgbini rai nọ a kpohọ isukulu tere he vo ho. Kareghẹhọ, obe Ahwo Ẹfẹsọs 6:2 o ta nọ: “ ’Dhẹ ọsẹ ra avọ oni ra’ (onana họ uzi ọsosuọ avọ eya).”
4 Ru Uwuhrẹ na Evaọ Edhere nọ A re ro Wo Erere gbe Omaweromẹ Noi Ze: Ru uwuhrẹ na fihọ oke evawere re eware nọ a ti wuhrẹ e sai te emọ na udu. Orọnikọ uwuhrẹ na o rẹ jọ onọ omọvo ọvo ọ rẹ jọ t’ẹme he, hayo orọ enọ-gbe-iyo ọvo ho. O rẹ jọ onọ ohwo kpobi ọ rẹ kpahe fihọ avọ evawere! Nọ enọ nọ e rẹ lẹliẹ ohwo ta iroro riẹ, re who ro fi elo họ ehri-izi Ebaibol, jẹ lẹliẹ emọ na kpahe ẹme sasasa. Orọnikọ ohwo nọ o bi ru uwuhrẹ na ọvo ọ rẹ ta ẹme he. Ofariẹ, oke uwuhrẹ uviuwou na o rẹ jọ oke nọ a rẹ rọ whọku hayo fa emaha na eviaviẹ hẹ.
5 Ẹjiroro nọ ma bi ro ru uwuhrẹ uviuwou họ: re u fiobọhọ k’omai wo uyoyou kẹ Jihova, re ma ruẹsi wo eriariẹ egbagba erọ izi Ọghẹnẹ, re ma jẹ sai fi eware nọ ma jọ obe nọ ma bi ro ru uwuhrẹ na họ iruo. Daoma fiobọhọ kẹ emọ ra re a wo ovuhumuo kẹ eware nọ Jihova o ru k’omai no. Ruẹ nọ a wo otoriẹ eware nọ wha wuhrẹ na. Fiobọhọ kẹ ae re a ruẹ epanọ a sai ro fi eware nọ a wuhrẹ na họ iruo re o wọ ae ru inwene nọ i fo evaọ uruemu rai.
6 Otẹrọnọ who ri mu ere họ eru hu, kọ who gbe fi ei họ utee ra re who mu uwuhrẹ uviuwou họ taure amara nana o te ti re? Nọ whọ be daoma epanọ who re ro ru ei na, lẹ se Jihova jẹ rọ ẹro so ẹe inọ ọ te ghale uviuwou ra nọ who bi wuhrẹ ae re a “koko edhere ỌNOWO” na.