‘A Rẹ Te Vuẹ Ovuẹ Usiuwoma Na’!

1. Ẹvẹ ma rọ riẹ inọ uvumọ oware o rẹ sae whaha iruo usiuwoma ota na ha?

¹ Uvumọ oware o riẹ hẹ nọ o rẹ whaha Jihova erugba oreva riẹ. (Aiz. 14:24) Dede nọ o wọhọ nọ Gidiọn oguẹdhọ na avọ ezae 300 riẹ a sai fi egbaẹmo ahwo Midian nọ i bu te 135,000 kparobọ họ, Jihova ọ ta kẹe nọ: “Whọ [te] rehọ ahwo Izrẹl no obọ ahwo Midian. Kọ me vi owhẹ?” (Ibr. 6:14) Iruo vẹ Jihova ọ be tha uke nẹnẹ? Jesu ọ ta nọ: “A rẹ te vuẹ ovuẹ usiuwoma uvie na kẹ akpọ na kpobi.” (Mat. 24:14) Ohwo ọvuọvo nọ ọ rẹ sae whaha iruo nana ọ rrọ họ.

2. Fikieme ma je rẹro nọ Jihova o ti fi obọ họ k’omai omomọvo evaọ odibọgba na?

² Jihova O re Fi Obọ Họ k’Omai Omomọvo: Ma wo imuẹro inọ Jihova o ti fi obọ họ kẹ ukoko riẹ wo obokparọ, kọ ma sai rẹro nọ o ti fi obọ họ k’omai omomọvo? Evaọ oke ẹbẹbẹ, Jihova ọ rehọ ẹkwoma Jesu Ọmọ riẹ fi obọ họ kẹ Pọl ukọ na. (2 Tim. 4:17) Ma wo imuẹro inọ epọvo na Jihova ọ te ghale omai omomọvo nọ ma be daoma ru oreva riẹ na.—1 Jọn 5:14.

3. Otọ iyero vẹ Jihova ọ rẹ jọ fi obọ họ k’omai?

³ Kọ awaruọ uzuazọ ikẹdẹ kẹdẹ u bi ru iruo odibọgba na bẹ owhẹ no? “Ọ rẹ rehọ eri kẹ enọ oma o rẹ rọ.” (Aiz. 40:29-31) Kọ whọ be rẹriẹ ovao dhe ukpokpoma hayo ọwọsuọ? “Gbolo owha ra kẹ ỌNOWO na, o re ti fiobọhọ kẹ owhẹ.” (Ol. 55:22) Kọ ozọ u re mu owhẹ ẹsejọ? “Nya, mẹ rẹte jọ unuẹme ra.” (Ọny. 4:11, 12) Kọ who wo ẹbẹbẹ ẹyao, nọ o be whae ze nọ who gbe bi wobọ tere he evaọ odibọgba na? Jihova o rri umutho nọ whọ be rehọ ẹgba ra kpobi ru na ghaghae, yọ ọ te ghale omodawọ ra.—1 Kọr. 3:6, 9.

4. Ẹvẹ eva nọ ma fihọ Jihova u re ro kpomahọ omai?

⁴ Nọ Jihova ọ “riẹ obọ riẹ no, ono ọ sae zaehọ?” (Aiz. 14:27) Nọ ma wo imuẹro inọ Jihova ọ te ghale odibọgba mai na, joma ruabọhọ iruo usiuwoma ota na “jẹ ta ẹme Ọnowo na ududu.”—Iruẹru 14:3.