Ẹbọga Evaifihọ Mai Evaọ Ẹrẹreokie Ọghẹnẹ

“Re who fievahọ ỌNOWO na, me je dhesẹ [eriariẹ] kẹ owhẹ.”—ITẸ 22:19.

1, 2. (a) Fikieme Isẹri Jihova a bi ro fievahọ Jihova? (Itẹ 22:19) (b) Eme o dhesẹ nnọ u fo re ahwo jọ a bọ evaifihọ rai ga fihọ Jihova?

A REHỌ eriariẹ egbagba Jihova gbe ẹjiroro riẹ ghale Ileleikristi uzẹme. ‘Odibo ẹrọwọ avọ areghẹ’ a be rehọ ẹkwoma uyoyou rọ ‘emu abọ-ẹzi evaọ ẹruoke’ rọ kẹ ae. (Matiu 24:45) Eriariẹ nọ a wo o kẹ rai uvi otọhotọ nọ a re ro fievahọ Ọghẹnẹ. Fikiere, wọhọ utu, Isẹri Jihova a bi fievahọ Jihova gbe ẹrẹreokie riẹ gaga.

² Dede na, wọhọ omomọvo u fo nọ Isẹri jọ a re ru evaifihọ yena ga viere. Ẹsejọ ileta i re te Society obọ nọ i re dhesẹ avro kpahe eware jọ nọ e rọ ebe riẹ. Avro nana e rẹ sae jọ fiki inwene evaọ otoriẹ, hayo e rẹ sae jọ eware nọ i kpomahọ ọnọ o bi kere ileta na, maero kọ ẹme nọ o duobọ te iroro riẹ.—Wawo Jọn 6:60, 61.

3. Eme ọ rẹ sae via makọ rọ kẹ idibo ẹrọwọ Jihova, kọ fikieme?

³ Makọ idibo uzẹme Jihova a rẹ ruẹ uzẹme Ọtausiuwoma Na 9:11: “Ofa riẹ mẹ ruẹ no nọ eva otọ akpọ na [orọnọ] ọmae dhẹ a rọ kparobọ họ, hayo ọmai fio a rẹrọ kparobọhọ, orọnọ owareghẹ ọ mai wo emu hu, hayo [ọgbaeriariẹ ọ] mai wo efe he; hayo ọwena eware e mai kiehọ kẹ hẹ, rekọ oke gbe uvẹ o rẹ whae ze.” Ẹvẹ onana o sae rọ jọ uzẹme evaọ edhere ọkẹkẹe, hayo ọrọ abọ-ẹzi? Ẹsejọ ma riẹ Ileleikristi jọ nọ i je fi ohrẹ Ebaibol h’iruo vẹrẹ vẹrẹ, enọ e jẹ thọ uzẹme na uke gaga, enọ i wo areghẹ evaọ efihiruo ehri-izi Ebaibol, avọ ọwhọ evaọ ilale eriariẹ egbagba. Ghele na, fiki “oke gbe uvẹ,” ejọ e dina siobọ kpẹ no fiki asidẹnte hayo owho. O rẹ sai gbe ai unu sọ a te zọ rueva akpọ ọkpokpọ Ọghẹnẹ.

4, 5. Fikieme Ileleikristi a gbe ro ku evaifihọ rai evaọ ẹrẹreokie Jihova fiẹ hẹ?

⁴ Okenọ ọrivẹ-orọo o te whu siọ Oleleikristi ba, edada gbe ọvabọvro na ọ rẹ jọ ruaro. O sae jọ nọ a gọ Jihova kugbe wọhọ ọzae avọ aye te ikpe buobu no. Ọnọ ọ rọ uzuazọ na ọ riẹ nọ uwhu u bru ọgbakugbe orọo riẹ dhe no.a (1 Ahwo Kọrint 7:39) Whaọ, ọ tẹ gwọlọ nọ evaifihọ riẹ u kiekpo ho, o re weri hrọ họ.—Wawo Mak 16:8.

⁵ Ẹvẹ o rọ areghẹ te re a rri uwhu ọrivẹ-orọo, ọyewọ, ọmọ, hayo ogbẹnyusu Oleleikristi ọkpekpe wọhọ uvẹ nọ ma re ro dhesẹ evaifihọ ẹrẹreokie Jihova! Ohwo ọ tẹ maki whu ku omai dede, ma rẹ sai wo evaifihọ inọ Jihova ọ rọ muomu hu. Ma rẹ sai wo evaifihọ inọ ohwo nọ o wo uzuazọ ebẹdẹ bẹdẹ kpobi—makọ ẹkwoma azọ hayo ẹkparomatha—ọ te were eva. Kpahe Ọghẹnẹ, ọso-ilezi na ọ ta nọ: “Who rovie abọ ra, who te bi ru ẹgwọlọ eware nọ i wo uzuazọ kpobi rọ kẹ ae. ỌNOWO na o kiẹrẹe eva idhere riẹ kpobi, jẹ rọ yoyou eva eruo riẹ kpobi. ỌNOWO na ọ kẹle enọ i bo se ei kpobi evaọ uzẹme. O re ru gba kẹ enọ e rọ ozọ riẹ ẹdhẹ kpobi, o ve je yo oviẹ rai, o ve je siwi ai.”—Olezi 145:16-19.

Iroro Uye-Oruẹ Uvrẹvru

6, 7. (a) Fikieme Isẹri jọ nọ e ruẹ uye no okejọ a sai ro wo otoriẹ oghẹrẹsa enẹna? (b) Fikieme ma gbe ro riwi Jihova nọ ọ kare ẹrẹreokie he fikinọ ọ kuvẹ uye-oruẹ evaọ oke n’ukpemu?

⁶ Evaọ oke nọ u kpemu, uye o bẹ Isẹri jọ no keme a se nnọ a re dhomahọ iruẹru nọ e rọwo kugbe iroro-oziẹobro rai hi. Wọhọ oriruo, onana o sae jọ ẹsalọ rai ikpe jọ nọ e vrẹ no kpahe oghẹrẹ iruo gheghe jọ. Oniọvo ọ rẹ sai roro nọ enẹna ọ sai ru iruo itieye na ababọ ẹraha seomabaedhehọ Oleleikristi riẹ kpahe eyero eware nana.

⁷ Kọ o jọ umuomu kẹ Jihova re ọ kẹe uvẹ re ọ ruẹ uye fiki ẹsiọ oware nọ ọ rẹ sai ru enẹna ababọ uye? Ibuobu nọ eware itieye na e via kẹ no a roro ere he. Ukpoye, a ghọghọ inọ a wo uvẹ nọ a re ro dhesẹ vevẹ evaọ ẹgbede inọ a wo ọtamuo nọ a re ro dikihẹ gaga evaọ avro esuo ehrugbakpọ na. (Wawo Job 27:5.) Eme jabọ ohwo ọ jẹ vioja fikinọ o lele iroro-oziẹobro riẹ evaọ edikihẹ ọgaga kẹ Jihova? Ẹkwoma ẹyọrọ ehri-izi Ileleikristi avọ omaurokpotọ wọhọ epanọ a wo otoriẹ rai hayo ẹmeoyo kẹ ẹkpakpa iroro-oziẹobro, a re dhesẹ nọ a te kẹ usu Jihova. Evaọ uzẹme, o rọ oware areghẹ re a whaha oware nọ u re kpokpo iroro-oziẹobro hayo onọ o rẹ sae lẹliẹ amọfa zoruẹ. Evaọ abọ ọnana ma rẹ sai roro kpahe oriruo nọ Pọl ukọ na ọ kẹ.—1 Ahwo Kọrint 8:12, 13; 10:31-33.

8. Fikieme Ileleikristi Ju, enọ i je koko Uzi na vẹre, a gbe ro wo avro kpahe ẹrẹreokie Jihova ha?

⁸ Re a ru Jihova eva were, a gwọlọ mi ahwo Ju re a koko Ijaje Ikpe na gbe izi 600 efa. Uwhremu na, evaọ otọ ọruẹrẹfihotọ Ileleikristi na, ẹmeoyo kẹ izi eyena o gbẹ jọ ẹgwọlọ kẹ ẹgọ Jihova ha, makọ rọ kẹ emotọ Ju. Izi nọ e gbẹ rọ ọgbahọ họ na e kẹre te erọ oyawo, ekoko Ẹdijala na, idheidhe erao, gbe ekoko awhaha emuore jọ. (1 Ahwo Kọrint 7:19; 10:25; Ahwo Kọlọsi 2:16, 17; Ahwo Hibru 10:1, 11-14) Ahwo Ju—kugbe ikọ na—enọ i zihe ruọ Ileleikristi a wo ufuoma no ọgbahọ ekoko izi nọ a gwọlọ nọ a koko evaọ okenọ a jọ otọ ọvọ Uzi na. Kọ a je gu unoma nnọ Ọghẹnẹ ọ kare ẹrẹreokie vẹre nọ ọ kake gwọlọ mi ai nnọ a koko eware nọ i fo evaọ oke onana ha? Ijo, a ghọghọ evaọ otoriẹ okẹkẹe ẹjiroro Jihova.—Iruẹru 16:4, 5.

9. Eme o rọ uzẹme kpahe Isẹri jọ, fikieme a gbẹ vioja ha?

⁹ Evaọ oke mai nana, Isẹri jọ e riẹ nọ e rọ kekeke gaga evaọ eriwo oware nọ a re ru hayo onọ a re ru hu. Fiki oyena a rẹ ruẹ-uye vi edekọ. Uwhremu na, ẹvi eriariẹ o te fiobọhọ kẹ ai ru eriwo rai kẹre kpahe eme eyena. Rekọ a rẹ vioja ha fikinọ a je lele iroro-oziẹobro rai vẹre, dede nọ onana o lẹliẹ uye bẹ ai. Emamọ oware o ghinẹ rọ inọ u no rai eva ze re a ruẹ-uye avọ ẹrọwọ kẹ Jihova, ‘ru eware kpobi fiki usiuwoma na.’ Jihova ọ rẹ ghale omarọkẹ Ọghẹnẹ utioye na. (1 Ahwo Kọrint 9:23; Ahwo Hibru 6:10) Pita ukọ na o kere avọ orimuo nọ: “Otẹrọnọ wha riẹ ru wha tẹ ruẹ ọyawa riẹ, wha vẹ rehọ ithihakọ ruẹ, wha re wo ajiri obọ Ọghẹnẹ.”—1 Pita 2:20.

Ewuhrẹ mi Jona

10, 11. Ẹvẹ Jona o ro dhesẹ ababọ eva nọ o re fihọ Jihova (a) okenọ a kẹe iruo re o kpohọ Ninẹve? (b) okenọ Ọghẹnẹ ọ raha ahwo Ninẹve he?

¹⁰ Nọ a ta kẹe re o kpohọ Ninẹve, Jona o dhesẹ ababọ ovuhumuo kẹ eva nọ Jihova o fihiẹe. Nọ ọ ruẹ eware urirẹ no fikinọ ọ gwọlọ yoẹme he, Jona o te bruoma kpiroro, vuhu oruthọ riẹ, jẹ iruo ẹwho ọfa riẹ na rehọ, ọ tẹ vẹvẹ ahwo Ninẹve unu kpahe ọraha nọ ọ be tha. Eware i te nwene: Fiki uruemu ekurẹriẹ ahwo Ninẹve, o tẹ ruọ Jihova nọ ọ rẹ kpairoro vrẹ ọraha rai.—Jona 1:1–3:10.

¹¹ Eme Jona o ru? Avọ ẹgo, o te gu unoma kẹ Ọghẹnẹ evaọ olẹ. Oware nọ o be dhae eva na họ: ‘Mẹ riẹ nọ enẹ eware e te jọ. Oye jabọ mẹ jẹ se nọ mẹ rẹ ziọ Ninẹve vẹre he na. Whaọ, epanọ uye o b’omẹ te no na, kugbe idudu avọ omovuọ eri ologbo nọ ọ lọ omẹ, gbe iruo egaga nọ mẹ rọ vẹvẹ ahwo Ninẹve unu kpahe ọraha nọ ọ be tha, kọ enẹ u ro kuhọ! Koyehọ mẹ ruẹ-uye kufiẹ! Uwhu u dhugbe woma!’—Jona 4:1-3.

12. Eme ma rẹ sai wuhrẹ no oware nọ o via kẹ Jona ze?

¹² Kọ unoma nọ Jona o bi gu na u w’iroro? Kọ Jihova ọ kare ẹrẹreokie evaọ edhesẹ ohrọ kẹ irumuomu nọ i kurẹriẹ? Evaọ uzẹme, Jona ọ hae ghọghọ; a thọ idu ahwo buobu no uwhu no! (Jona 4:11) Rekọ uruemu orivo, orọ unoma riẹ u dhesẹ nnọ o fievahọ ẹrẹreokie Jihova ha. O je roro kpahe omobọ riẹ ga hrọ, kpahe amọfa kawo hrọ. Joma wuhrẹ mi Jona ẹkwoma oma gbe iroro mai nọ ma re fihọ oria avivẹ. Jọ u muomai ẹro inọ ẹmeoyo kẹ Jihova, elele ọkpọvio nọ ọ be kẹ ẹkwoma ukoko riẹ gbe ẹjẹrehọ ẹjiroro riẹ, oye họ uvi oware nọ ma re ru. U muomai ẹro nọ “u reti woma kẹ enọ e rẹ dhozọ Ọghẹnẹ.”—Ọtausiuwoma Na 8:12.

Enẹna họ Oke nọ Ma rẹ rọ Bọ Evaifihọ Mai!

13. Ẹvẹ mai kpobi ma rẹ sae rọ bọ evaifihọ Jihova mai ga?

¹³ Ẹbọga evaifihọ mai evaọ Jihova họ edhere areghẹ. (Itẹ 3:5-8) Dede na, ma re ru vi olẹ gheghe inọ Jihova o fiobọhọ k’omai wo evaifihọ viere. Evaifihọ o rẹ rro ẹkwoma eriariẹ egbagba, fikiere ma re ru ewuhrẹ Ebaibol omobọ ohwo, ese Ebaibol gbe ebe nọ e f’otọ Ebaibol na họ abọ iruẹru mai. Ekpohọ iwuhrẹ ẹsikpobi o r’oja, gbe oma nọ a rẹ ruẹrẹ kpahe ziezi je w’obọ te epanọ ẹgba mai o te. Ma te ru ei fihọ uruemu re ma ghale uzẹme Ebaibol kugbe amọfa, rehọ ẹghẹ fi ababọ ezọgaviẹ kparobọ, u re ru evaifihọ mai kẹ Jihova gbe Ẹme riẹ diwi viere. O rẹ whae ze nọ ma rẹ rọ kẹle iẹe viere ẹsikpobi.

14. Fikieme a ti ro se ahwo Ọghẹnẹ kẹle re a dhesẹ evaifihọ rai kẹ Jihova vi epaọ anwẹdẹ?

¹⁴ Kẹle na, uye nọ o mae rro kpobi nọ u ti te uyẹ ahwo-akpọ na u ti du lahwe idudhe. (Matiu 24:21) Nọ o tẹ via, idibo Ọghẹnẹ a te gwọlọ fievahọ ẹrẹreokie Jihova gbe ọkpọvio nọ ukoko riẹ o be kẹ viere. Evaọ edhere othotha, a vẹ te rehọ evaifihọ yoẹme kẹ ujaje Ọghẹnẹ: “Nyaze, ahwo mẹ, whọ ruọ evaọ uwou ra, re whọ kare ẹthẹ ra dhoma; si oma ra no omoke jọ bẹsenọ ofu na ọ rẹ vrẹ.” (Aizaya 26:20) Makọ obọnana a rueva okegbe omofọwẹ orọ ikoko nọ i bu vi 85,000 no evaọ ekwotọ 232. Oware nọ a ti kugbe ujaje ọ “ruọ evaọ uwou ra,” ma rẹ sai wo evaifihọ inọ Jihova o ti fiobọhọ k’omai ru ei gba.

15. Ẹvẹ a ro fiẹgba họ ẹme evaifihọ evaọ etoke 1998, kọ fikieme u je fo?

¹⁵ O r’oja inọ ma ru evaifihọ mai ga viere enẹna. Ababọ eva nọ ma re fihọ inievo Ileleikristi mai, fihọ ukoko Jihova gbe, maero, Jihova oma riẹ, ma rẹ sae zọ họ. Fikiere ẹvẹ u fo te inọ evaọ etoke 1998, a kareghẹhọ Isẹri Jihova evaọ akpọ na soso unuẹse buobu no, ẹkwoma ẹme ẹgbukpe rai, inọ “kohwo kohwo nọ o se odẹ Jihova a ti siwi ei”! (Ahwo Rom 10:13, NW ) Ma re gbe fievahọ oyena. Ma te muẹrohọ nnọ amavro jọ ọ be te ruọ evaifihọ yena, ma re ruiruo re ma kpọe vi enẹna, ẹhẹ, nẹnẹ.

Ẹdhoguo Jihova O ti Kiẹrẹe

16. Eme ọ rẹ sae via kẹ evaifihọ otẹrọnọ a sẹro riẹ hẹ, kọ eme ma re ru re onana o seba ẹvia?

¹⁶ Eva Ahwo Hibru 3:14, a vẹvẹ Ileleikristi nọ a wholo unu nọ: “Keme otẹrọnọ, ma sae yọrọ ẹruọrọsuọ ọsosuọ mai na whawha te urere, ma rẹ te jọ ereuku Kristi.” Evaọ otofa riẹ, eme enana i kiekpahe Ileleikristi nọ i wo ẹruore otọakpọ na re. Evaifihọ ọsosuọ o rẹ sai kiekpo otẹrọnọ a sẹro riẹ hẹ. Ẹvẹ o r’oja te inọ ma ruabọhọ ele eriariẹ egbagba, re ma rọ ere bọ otọhotọ nọ ma bọ evaifihọ mai họ ga!

17. Ẹvẹ ma sai ro wo evaifihọ inọ kpahe azọ, Jesu o ti guẹdhọ ziezi?

¹⁷ Kristi ọ te kiẹ erẹwho kpobi riwi obọnana re ọ ruẹse “hẹriẹ ae ọjọ nọ ọjọ wọhọ epanọ othuru-igodẹ ọ rẹ hẹriẹ igodẹ no ewe.” (Matiu 25:31-33) Ma rẹ sai wo evaifihọ inọ Kristi o ti kiẹrẹe evaọ ẹdhoguo ohwo nọ o fo kẹ azọ. Jihova ọ kẹ riẹ areghẹ na no, orimuo, gbe ekwakwa efa nọ i fo re o “guẹdhọ akpọ na avọ ẹrẹreokie.” (Iruẹru 17:30, 31) Jọ imuẹro mai e jọ wọhọ orọ Abraham, ọnọ ọ ta nọ: “Othohwowa nọ [Jihova o] re ro ru utioyena, re [who] kpe ikiẹrẹe gbe iru-umuomu, re ikiẹrẹe i wo osa iru-umuomu! Jọ oyena o thowhẹwa! Kọ obruoziẹ akpọ na o gbe ru kiẹrẹe?”—Emuhọ 18:25.

18. Fikieme ma gbẹ rọ ruawa hrọ họ kpahe oware nọ ma riẹ obọnana ha?

¹⁸ Avọ evaifihọ ẹrẹreokie Jihova vọvọ, ma re du ruawa ha re ma kiyo enọ wọhọ: ‘Ẹvẹ a ti ro gu emefofa gbe emeboba ẹdhọ? Kọ o te jọ nọ a te ta usiuwoma te ahwo buobu taure Amagẹdọn ọ tẹ te tha ha? Kọ ẹvẹ kpahe enọ e be mọ oruẹ? Kọ ẹvẹ kpahe . . . ?’ Uzẹme, eva obọnana o sae jọ nọ ma riẹ epanọ Jihova o ti ro ku eme enana họ họ. Rekọ, o ti ru ere evaọ edhere okiẹrẹe gbe ohrọ. Ma rẹ vro oyena vievie he. Evaọ uzẹme, u ti gb’omai unu re ma muẹrohọ nnọ o ti ku eme na họ evaọ idhere nọ ma roro kpahe vievie he.—Wawo Job 42:3; Olezi 78:11-16; 136:4-9; Matiu 15:31; Luk 2:47.

19, 20. (a) Fikieme o gbẹ rọ thọ họ re ma n’enọ areghẹ? (b) Okevẹ Jihova ọ te rọ kẹ iyo nọ ma gwọlọ?

¹⁹ Orọnikọ ukoko Jihova o be ta nọ a rẹ nọ emamọ enọ ẹruoke ha ha, wọhọ epanọ otu ewọsuọ jọ a re mu ta. (1 Pita 1:10-12) Dede na, Ebaibol na ọ hrẹ nọ ma whaha enọ igheghẹ, igegede. (Taitọs 3:9) Enọ iroro gbe ẹkiẹ Ẹme Ọghẹnẹ gbe ebe Ileleikristi re ma ruẹ iyo Ikereakere na u re ru eriariẹ egbagba mai vi haro jẹ rọ ere bọ evaifihọ mai ga fihọ Jihova. Ukoko na u bi lele oriruo Jesu. O sioma kpemu no ẹkpahe fihọ enọ nọ a rẹ kiyo rai taure oke u te ti te. Ọ ta nọ: “Me wo eware buobu nọ mẹ hẹ ta kẹ owhai, rekọ wha sae wha ae enẹna ha.” (Jọn 16:12) Ọ tubẹ rọwo dede nọ eware jọ e riẹ nọ ọye omariẹ ọ riẹ evaọ oke oyena ha.—Matiu 24:36.

²⁰ Eware buobu e gbẹ riẹ nọ Jihova o bi ti rovie. Ẹvẹ o rọ areghẹ te re a hẹrẹ iẹe, avọ evaifihọ inọ o ti rovie ẹjiroro riẹ kpobi evaọ ẹruoke riẹ. Ma rẹ sai wo evaifihọ nnọ okenọ ẹruoke Jihova u te te no, ma ti wo oghọghọ otoriẹ ofa nọ ma ti wo kpahe idhere riẹ. Ẹhẹ, ma ti wo osohwa, thakpinọ ma fi eva mai kpobi họ Jihova gbe ukoko nọ o bi ro ruiruo. Itẹ 14:26 o k’omai imuẹro nọ: “Ozodhẹ ỌNOWO na o rẹ kẹ ohwo imuẹro, emọ riẹ i re wo omofọwẹ.”

[Footnotes]

Eme Who Roro?

◻ Fikieme o jẹ rọ gheghẹ re ma kuvẹ kẹ iroro mai re e raha eva nọ ma re fihọ Jihova?

◻ Eme ma rẹ sai wuhrẹ no oware nọ o via kẹ Jona ze?

◻ Fikieme uwuhrẹ Ebaibol gbe ekpohọ ewuhrẹ i je w’uzou tere?

[Picture on page 14]

Makọ evaọ iraro ọvabọvro, ma rẹ sai fievahọ nnọ Jihova o kiẹrẹe

[Pictures on page 16]

Kọ u muowhẹ ẹro nnọ evaifihọ ra o rọ evaọ Jihova?