U Fo Re Jihova Ọ Jọ Evaifihọ Mai

“ỌNOWO na whọ rẹ rọ ẹro sua.”—ITẸ 3:26.

1. Dede nọ ibuobu e ta nọ a fievahọ Ọghẹnẹ, eme o dhesẹ nọ orọnikọ oke kpobi a bi ru ere he?

A KERE eme na “Ọghẹnẹ Ma Fievahọ” fihọ ugho United States of America. Kọ ahwo kpobi nọ a be rehọ ugho oyena dẹ oware, evaọ ẹkwotọ ọyena gbe eria efa, a ghine fievahọ Ọghẹnẹ? Hayo kọ ugho na a tubẹ mae fievahọ? Evaifihọ ugho utioye na evaọ ẹkwotọ ọyena hayo orẹwho ofa o rọwo kugbe evaifihọ Ọghẹnẹ erumeru uyoyou hu, ọnọ ọ rẹ rehọ ogaga riẹ ruiruo thọthọ họ hayo ọnọ ọ kare mọvuọria. Evaọ uzẹme, o mukpahe mọvuọria gaga.—Ahwo Ẹfẹsọs 5:5.

2. Didi uruemu Ileleikristi uzẹme a wo kpahe ogaga efe?

² Ileleikristi uzẹme a re fi eva rai họ Ọghẹnẹ, orọnikọ efe he, onọ u wo “eviẹhọ” riẹ. (Matiu 13:22) A vuhumu nnọ ogaga nọ ugho o rẹ rọ kẹ evawere jẹ sẹro uzuazọ u wo umuo. Rekọ o rọ ere kpahe ogaga Ọghẹnẹ Erumeru na ha. (Zefanaya 1:18) Fikiere, ẹvẹ ohrẹ na u wo areghẹ te: “Si oma no uyoyou igho, o nọ wha wo o da owhai ẹro; keme ọ ta nọ, ‘Mẹ sae se owhẹ ba hayo kiukeku owhẹ gbehe’ ”!—Ahwo Hibru 13:5.

3. Ẹvẹ eme nọ e wariẹ Iziewariẹ 31:6 họ i ro fielo họ eme nọ Pọl ọ wariẹ no owọ Ebaibol oyena ze?

³ Nọ o je kere eme obehru na se Ileleikristi Hibru, Pọl ukọ na ọ jẹ wariẹ ehrẹ nọ Mosis ọ rọ kẹ emọ Izrẹl taure ọ tẹ te nwani whu: “Wha wo ogaga avọ emamọ aruọwha, wha dhozọ họ hayo ọwhọ rai o mu owhai hi: keme ỌNOWO na Ọghẹnẹ rai ọ rẹ te jọ kugbe owhai; o re ti ru owhai kie he hayo ọ rẹ sia owhai gbe he.” (Iziewariẹ 31:6) Eme nọ e ware riẹ họ i dhesẹ nọ Mosis ọ jẹ t’udu họ ai awọ nọ a fievahọ Jihova onọ u kpehru vi eva nọ a re fihiẹe re ọ rehọ ẹgwọlọ iwo kẹ ae ọvo. Evaọ oghẹrẹ vẹ?

4. Ẹvẹ Ọghẹnẹ o ro dhesẹ kẹ emọ Izrẹl nnọ a rẹ sai fievahiẹe?

⁴ Evaọ etoke ikpe 40 nọ ahwo Izrẹl a je ro ghoro evaọ igbrẹwọ na, Ọghẹnẹ ọ r’obọ k’otọ jẹ rehọ ẹgwọlọ uzuazọ kẹ ae. (Iziewariẹ 2:7; 29:5) O je su ai re. Edhesẹvia onana jọ họ ẹgho evaọ uvo gbe elo erae evaọ aso, onọ u su emọ Izrẹl kpohọ “otọ nọ ame-ivie gbe ọnyọ i je bi suẹ.” (Ọnyano 3:8; 40:36-38) Nọ oke nọ a te ghinẹ rọ rueva Ẹkwotọ Eyaa na u te no, Jihova ọ tẹ salọ Joshua re ọ rehọ ẹta Mosis. A riẹ nnọ ahwo ẹkwotọ na a te họre. Rekọ Jihova o lele ahwo riẹ nya ikpe buobu no, fikiere a re du dhozọ họ. Emọ Izrẹl na a wo ẹjiroro kpobi nọ a rẹ rọ riẹ Jihova wọhọ Ọghẹnẹ nọ a rẹ sai fievahọ!

5. Ẹvẹ uyero Ileleikristi nẹnẹ u ro tho orọ emọ Izrẹl taure a tẹ te ruọ Ẹkwotọ Eyaa na?

⁵ U kri no nọ Ileleikristi inẹnẹ a be rọ nya igbrẹwọ akpọ omuomu ọnana bi kpohọ akpọ ọkpokpọ Ọghẹnẹ. Ejọ rai e nya edhere ọnana vrẹ ikpe 40 no. Obọnana a dikihẹ uwhru akpọ ọkpokpọ Ọghẹnẹ. Ghele na, ewegrẹ e gbẹ rọ edhere, a gwọlọ whaha omai ẹruọ oware nọ u ti zihe ro Ẹkwotọ Eyaa na, onọ u wo orro vi orọ anwae nọ u je su avọ ame-ivie gbe ọnyọ na. Fikiere rọ kẹ Ileleikristi nẹnẹ, ẹvẹ eme Mosis nọ Pọl ọ wariẹ na i fo te: “Mẹ sae se owhẹ ba hayo kiukeku owhẹ gbehe”! Ahwo kpobi nọ a dikihẹ ga je kru udu ga, vọ avọ ẹrọwọ, fievahọ Jihova, a re wo imuẹro osohwa.

Evaifihọ nọ U no Eriariẹ gbe Usu Ze

6, 7. (a) Eme o fi evaifihọ Abraham kẹ Jihova họ ẹdawọ? (b) Ẹvẹ oma o jọ Abraham okenọ o je kpohọ oria nọ ọ te jọ rehọ Aiziki dheidhe na?

⁶ Okejọ a ta kẹ Abraham, ọsẹ-ode emọ Izrẹl, re ọ rehọ ọmọ riẹ Aiziki dheidhe. (Emuhọ 22:2) Eme ọ lẹliẹ ọsẹ oyoyou ọnana wo evaifihọ ọgaga otiọye na fihọ Jihova te epanọ o nwani ro noi eva ze re o yoẹme kẹe? Ahwo Hibru 11:17-19 o kuyo nọ: “Fiki orọwọ Abraham ọ jẹ rọwo nọ ọ rẹ rehọ Aiziki dhe-idhe, ọ ye nọ o wo eya na ọ ruẹrẹ oma kpahe nọ ọ rẹ rọ ọmọvo riẹ dhe-idhe, kpahọ ọ nọ ọ ta nọ, ‘Eva Aiziki uyẹ ra u jeti wo odẹ.’ O roro nọ Ọghẹnẹ ọ rẹ sae kpare ahwo no iwhuowhu; fikiere, odhesẹ via riẹ, ọ rehe riẹ ziheze.”

⁷ Kareghẹhọ nnọ o rehọ Abraham avọ Aiziki edẹ esa re a te ti te oria nọ a te jọ dheidhe na. (Emuhọ 22:4) Oke buobu o jọ kẹ Abraham re ọ wariẹ roro kpahe oware nọ a ta kẹe nọ o ru na. Kọ ma sai roro kpahe iroro riẹ, epanọ oma o ja riẹ? Eyẹ Aiziki o jọ oware oghọghọ igbunu gaga. Imuẹro omadhehọ Ọghẹnẹ oyena o lẹliẹ usu nọ Abraham avọ aye ọga riẹ vẹre na, Sera, a wo kugbe Ọghẹnẹ ga viere. Fikiere no okioye vrẹ a jẹ rria avọ irẹro oware nọ obaro Aiziki gbe emọ riẹ o rẹ te jọ. Kọ enẹ irẹro rai i ti ro kuhọ, wọhọ epanọ a sai roro fiki oware nọ Ọghẹnẹ ọ be yare mi ai obọnana?

8. Ẹvẹ eva nọ Abraham o fihọ Ọghẹnẹ u ro thabọ vrẹ ẹrọwọ inọ Ọ te sae kpare Aiziki?

⁸ Ghele na, Abraham o wo evaifihọ fiki eriariẹ omobọ riẹ onọ egbẹnyusu ekpekpe a re wo kpahe ohwohwo na. Wọhọ “ogbẹnyusu Ọghẹnẹ,” Abraham “ọ rọ ẹrosuọ Ọghẹnẹ jabọ nọ, a je kele iei gbe ẹrẹreokie kẹe.” (Jemis 2:23) Eva nọ Abraham o fihọ Jihova o nya thabọ vi ẹrọwo inọ Ọghẹnẹ ọ te kpare Aiziki ze. U mu Abraham ẹro re inọ oware nọ Jihova ọ be ta kẹe nọ o ru na u kiehọ, dede nọ u vo Abraham ẹro ho. O wo uvumọ ẹjiroro nọ ọ rẹ rọ vro ho inọ Jihova o kiẹrẹe evaọ ayare riẹ. Kẹsena, evaifihọ Abraham o tẹ ga viere nọ ẹnjẹle Jihova ọ j’owọ lahwe re ọ whaha Aiziki nọ a re ghine kpe ro dheidhe.—Emuhọ 22:9-14.

9, 10. (a) Oke vẹ Abraham ọ kake jọ dhesẹ evaifihọ Jihova no? (b) Didi uwuhrẹ ulogbo ma rẹ sai wuhrẹ no oma Abraham ze?

⁹ Abraham ọ kaki dhesẹ oghẹrẹ evaifihọ nana evaọ ẹrẹreokie Jihova no ikpe 25 nọ i kpemu. Nọ a vẹviẹe unu no nnọ a te raha Sodọm avọ Gomora no, o te wo ọdawẹ kpahe ewoma ahwo ikiẹrẹe kpobi nọ e be rria obei, kugbe ọmọ oniọvo riẹ Lọt. Abraham ọ rehọ eme enana lẹ Ọghẹnẹ: “Othohwowa nọ [who] re ro ru utioyena, re [who] kpe ikiẹrẹe gbe iru-umuomu re ikiẹrẹe i wo osa iru-umuomu! Jọ oyena o thowhẹwa! Kọ obruoziẹ akpọ na o gbe ru kiẹrẹe?”—Emuhọ 18:25.

¹⁰ Abraham ọsẹ anwae na o wo udu inọ Jihova o re ru oware umuomu hu. Uwhremu na ọso-ilezi na ọ so nọ: “ỌNOWO na o kiẹrẹe eva idhere riẹ kpobi, jẹ rọ yoyou eva eruo riẹ kpobi.” (Olezi 145:17) U fo re ma nọ oma mai nọ: ‘Kọ me bi dede oware nọ Jihova ọ kuvẹ riẹ rehọ ababọ avro kpahe ẹrẹreokie riẹ? Kọ u muomẹ ẹro inọ oware nọ ọ kuvẹ riẹ kpobi o rọ kẹ ewoma mẹ gbe ewoma amọfa?’ Uyo mai o tẹ rọ E, koyehọ ma wuhrẹ oware ulogbo jọ no obọ Abraham ze no.

Edhesẹ Evaifihọ Evaọ Ẹsalọ Jihova

11, 12. (a) Abọ evaifihọ vẹ o r’oja kẹ idibo Ọghẹnẹ no? (b) Eme ọ rẹ sae jọ ẹbẹbẹ k’omai ẹsejọ?

¹¹ Ahwo nọ a rri Jihova wọhọ evaifihọ rai a re je dhesẹ evaifihọ evaọ ahwo nọ Jihova ọ salọ nọ o bi ro ru ẹjiroro riẹ gba. Rọ kẹ emọ Izrẹl, onana o gwọlọ eva nọ a re fihọ Mosis gbe ọnọ ọ rehọ ẹta riẹ uwhremu na, Joshua. Rọ kẹ Ileleikristi ọsosuọ, o gwọlọ eva nọ a re fihọ ikọ na gbe ekpako ukoko Jerusalẹm. Rọ kẹ omai nẹnẹ, o gwọlọ evaifihọ ‘ọrigbo ẹrọwọ avọ areghẹ’ na nọ a ro mu re ọ k’omai ‘emu abọ-ẹzi nọ oke u te te,’ gbe enọ a jọ usu rai salọ re i ru Ugboma Esuo na via.—Matiu 24:45.

¹² Evaọ uzẹme, re ma fievahọ enọ e be kobaro evaọ ukoko Ileleikristi na o rọ kẹ ewoma mai. A ta k’omai nọ: “Wha yo ẹme e nọ i bi su owhai re wha rehọ oma kpotọ kẹ ae; keme ae a be sẹro izi rai, wọhọ ahwo nọ a rẹ te niyẹrẹ re a rọ [evawere ru onana, o jọ orọ] ofuhu, keme oyena u re wo erere kẹ owhai hi.”—Ahwo Hibru 13:17.

Whaha Avro Kpahe Ẹsalọ Jihova

13. Ẹjiroro vẹ ma re ro fievahọ enọ a ro mu re e kobaro na?

¹³ Ebaibol na o fiobọhọ k’omai kpomamu evaọ edhesẹ evaifihọ mai kẹ enọ e be jọ udevie ahwo Jihova kobaro na. Ma rẹ sae nọ oma mai nọ: ‘Kọ eware e thọ Mosis obọ ẹdẹjọ? Kọ ikọ na a dhesẹ oghẹrẹ uruemu Kristi nọ Jesu ọ gwọlọ nọ a wo na ẹsikpobi?’ Iyo na i re vevẹ. U no Jihova eva ze re ọ rehọ ezae omarọkẹ gbe omarokpotọ rọ kpọ ahwo riẹ, dede nọ a gba ha. Fikiere, dede nọ ekpako inẹnẹ a gba ha, u fo nọ ma re vuhu ai mu ghele wọhọ nọ “Ẹzi Ẹri ọ [rehọ e rai mu] enọ iwuzou, re [a sẹro ukoko] Ọghẹnẹ.” A fo kẹ uketha gbe adhẹẹ mai.—Iruẹru 20:28.

14. Eme a re muẹrohọ kpahe ẹsalọ nọ Jihova ọ salọ Mosis viukpe Erọn hayo Miriam wọhọ osu?

¹⁴ Erọn ọ rehọ ikpe esa vi Mosis, rekọ aimava na a maha vi oniọvo-ọmọtẹ rai, Miriam. (Ọnyano 2:3, 4; 7:7) Yọ nọ o rọnọ Erọn ọ rẹ mae t’ẹme gba vi Mosis na, a rehọ e riẹ mu re ọ jọ ọtota oniọvo riẹ. (Ọnyano 6:29–7:2) Ghele na, re o su emọ Izrẹl, orọnikọ Jihova ọ salọ ọrọ ọkpako na ha, Miriam, hayo Erọn, ọnọ ọ riẹ ẹme ta ziezi na. Ovuhumuo ọvọvọ gbe ẹgwọlọ etoke na eye o rri rọ salọ Mosis. Okejọ nọ orimuo ovevẹ ọnana o kare ai, Erọn avọ Miriam a te gu unoma nọ: “Kọ Mosis ọvo ỌNOWO na ọ rẹ ta eme kẹ? Kọ ọ gbẹ be ta ẹme kẹ omai re?” A kẹ Miriam uye, onọ o mae wha ẹwhọ ọnana ze, fiki uruemu orivo nana kpahe ẹsalọ Jihova, ọnọ tei te Erọn a hai ti vuhumu wọhọ ohwo nọ ọ jọ “wowou, vi ahwo kpobi nọ a jẹ ria evaọ akpọ na.”—Ikelakele 12:1-3, 9-15.

15, 16. Ẹvẹ Kaleb o ro dhesẹ nọ o fievahọ Jihova?

¹⁵ Okenọ a vi ekiotọ 12 re a kiẹ Ẹkwotọ Eyaa na riwi, ekiotọ 10 e tẹ wha ekpehre iyẹrẹ ze. A tẹ wha ozọ họ idu emọ Izrẹl ẹkwoma ẹta kpahe ahwo Kenan nọ a rẹ “ruaro.” Onana o tẹ whae ze nọ emọ Izrẹl a rọ “go kpahe Mosis avọ Erọn.” Rekọ orọnikọ ekiotọ na kpobi e kare evaifihọ kẹ Mosis gbe Jihova ha. Ma se nọ: “Kaleb o te ru ahwo na fibo eva aro Mosis ọtẹ ta nọ, ‘Joma nya re ma ria otọ na; keme ma wo ogaga nọ ma rẹ rọ kparobọ vi ei.’ ” (Ikelakele 13:2, 25-33; 14:2) Edikihẹ ọgaga ọvo ọnana nọ Kaleb o wo na oye Joshua nọ a gbẹ kiotọ na o wo re. Aimava a dhesẹ nnọ a ru Jihova fihọ evaifihọ rai no nọ a ta nọ: “Otẹrọnọ eva mai e were ỌNOWO na, ọrẹ te rehọ omai te otọ onana, ọ vẹ te rehọ iẹ kẹ omai, otọ nọ o vọ avọ ame-ivie-eruẹ gbe ọnyọ. Fikiere, . . . wha dhẹ ozọ ahwo otọ na gbe he . . . ỌNOWO na ọ rọ kugbe omai; ozọ rai umu owhai hi.” (Ikelakele 14:6-9) Evaifihọ Jihova onana u wo osohwa. Evaọ usu ekpako oge ọyena nọ e jọ uzuazọ, Kaleb, Joshua, gbe ahwo Livai jọ ọvo a wo uvẹ-ọghọ nọ a rọ rueva Ẹkwotọ Eyaa na.

¹⁶ Ikpe jọ evaọ obaro Kaleb ọ tẹ ta nọ: “Mẹ rehọ eva mẹ kpobi lele ỌNOWO na Ọghẹnẹ mẹ. . . . Whaọ ỌNOWO na ọ gbẹ sẹro mẹ ri te enẹna, wọhọ epanọ ọ ya, koyehọ anwo udhe-ukpe-uvẹ gbe ikpe isoi ỌNOWO na ọ rọ ta eme nana kẹ Mosis, nọ emọ Izrẹl a rọ gbẹ jọ onya eva obọ igbrẹwọ; who ri, koyehọ anwọ [udhe-ukpe-one] gbe ikpe isoi mẹ kpako te no na. Mẹ gbẹrẹ gaga ri te inẹnẹ na wọhọ epanọ mẹ jọ eva oke-oyena nọ Mosis o ro vi omẹ uwou.” (Joshua 14:6-11) Muẹrohọ iroro eliọliọ Kaleb, ẹrọwọ riẹ, gbe ẹgba ugboma riẹ. Ghele na, Jihova ọ salọ Kaleb re ọ rehọ ẹta Mosis hi. Joshua a rehọ uvẹ-ọghọ onana kẹ. O rẹ sai muomai ẹro inọ Jihova o wo ẹjiroro kẹ ẹsalọ riẹ, yọ oye họ ẹsalọ nọ o mai woma.

17. Eme o wọhọ nọ o hae lẹliẹ Pita te kẹ owha-iruo ho?

¹⁷ Pita ukọ na ọ vro Olori riẹ isiasa. Ọ tẹ jẹ rehọ oheri ru oware nọ a vi rie he, gbẹre ozọ ọrigbo ozerẹ okpehru na. (Matiu 26:47-55, 69-75; Jọn 18:10, 11) Ahwo jọ a rẹ sae ta nọ Pita yọ ọdhozọ, ohwo odedeghe, ọnọ o fo kẹ uvumọ uvẹ-ọghọ họ. Ghele na, ono a rehọ isiavẹ Uvie na kẹ, ono a kẹ uvẹ re o rovie edhere kẹ use obọ odhiwu kẹ eko ahwo esa? Ohwo na họ Pita.—Iruẹru 2:1-41; 8:14-17; 10:1-48.

18. Didi ẹthọthọ Jud ọ fodẹ nọ u fo nọ ma rẹ whaha?

¹⁸ Iriruo enana i dhesẹ nnọ ma rẹ yọrọ oma kpahe ẹdhoguo okafe. Ma te fi eva mai họ Jihova, ma rẹ vro ẹsalọ riẹ hẹ. Dede nọ ahwo-akpọ sebaẹgba i ru ukoko otọakpọ Jihova via, enọ e rẹ sae r’obọ s’udu nọ a wo seba-ekie he, ọ be rehọ ai ruiruo evaọ edhere igbunu. Jud, oniọvo Jesu, ọ vẹvẹ Ileleikristi ikpe-udhusoi ọsosuọ unu kpahe ahwo nọ a be “rehọ otu ehru jijehwẹ.” (Jud 8-10) Ma r’aro kele ai hi.

19. Fikieme ma gbẹ vro ẹsalọ Jihova ha?

¹⁹ Ahwo nọ Jihova ọ be salọ kẹ ewha-iruo jọ họ enọ i wo oghẹrẹ ekwakwa jọ nọ a re ro su ahwo riẹ evaọ edhere nọ ọ gwọlọ nọ a rẹ nya evaọ etoke ọyena. U fo re ma daoma vuhu uzẹme onana mu, orọnikọ ma re viẹro kpahe ẹsalọ Ọghẹnẹ hẹ, rekọ wo edẹro re ma ruiruo evaọ oria nọ Jihova o fi omai omomọvo họ. Ma vẹ rọ enẹ dhesẹ nnọ ma ru Jihova họ evaifihọ mai no.—Ahwo Ẹfẹsọs 4:11-16; Ahwo Filipai 2:3.

Edhesẹ Evaifihọ kẹ Ẹrẹreokie Jihova

20, 21. Eme ma rẹ sai wuhrẹ no edhere nọ Ọghẹnẹ o ro yeri kugbe Mosis ze?

²⁰ O tẹ via ẹsejọ nọ ma bi fievahọ omobọ mai hrọ je fievahọ Jihova kawo hrọ, j’oma wuhrẹ mi Mosis. Okenọ ọ jọ ikpe 40, ọ tẹ rọ udu obọ riẹ gwọlọ siobọno emọ Izrẹl no igbo Ijipti. Emamọ ẹjiroro o wo, rekọ o wha ufuoma idudhe se emọ Izrẹl he, hayo kọ o wha ewoma se ọye oma riẹ hẹ. Evaọ uzẹme, avọ ọgbahọ ọ rọ dhẹ. Okenọ ọ ruẹ uwuhrẹ ogaga ikpe 40 no evaọ ẹkwotọ erara o ro te kẹ ẹsalọ re o ru iruo nọ ọ jẹ kake gwọlọ ru na. Oke onana ọ rẹ sai wo imuẹro uketha Jihova keme enẹna o bi ru eware nya lele edhere Jihova eva oke nọ u kiehọ ẹjiroro Riẹ.—Ọnyano 2:11–3:10.

²¹ Kohwo kohwo ọ rẹ sae nọ oma riẹ nọ: ‘Kọ ẹsejọ mẹ be dhẹ ruọ aro Jihova gbe ekpako nọ a ro mu evaọ ukoko na, be daoma ru eware vẹrẹ hayo ru eware evaọ edhere obọ mẹ? Ukpenọ me roro nọ a bi rri omẹ vo evaọ uvẹ-ọghọ jọ, kọ mẹ be rọ evawere jẹ etoke uwuhrẹ mẹ na rehọ?’ Kọ, ma ghine wuhrẹ uwuhrẹ ulogbo jọ no oma Mosis ze no?

22. Dede nọ eware buobu i vru mi ei, ẹvẹ o jọ Mosis oma kpahe Jihova?

²² Ofariẹ, ma rẹ sai wuhrẹ uwuhrẹ ofa no oma Mosis ze. Ikelakele 20:7-13 o ta k’omai kpahe oruthọ jọ nọ o ru, onọ u duobọ tei yoyoma. O ku uvẹ-ọghọ nọ o re ro su emọ Izrẹl rueva Ẹkwotọ Eyaa na fiẹ. Kọ ọ kpunu nnọ ẹjiroro Jihova evaọ ẹme na u kiete he? Kọ ọ r’obọ thagba, muova họ fikinọ Ọghẹnẹ o bi ru ei thọ? Kọ Mosis ọ siọ eva ba efihọ ẹrẹreokie Jihova? Ma rẹ sae ruẹ iyo na evaọ eme nọ Mosis omariẹ ọ ta kẹ emọ Izrẹl taure ọ tẹ te nwani whu. Kpahe Jihova, Mosis ọ ta nọ: “Utho na, iruo riẹ i kiete, keme idhere riẹ kpobi i re wowoma. Ọghẹnẹ ọtẹruo nọ ọ kare eyoma, nọ o re wowoma je kiete.” (Iziewariẹ 32:4) Mosis ọ ghinẹ yọrọ evaifihọ Jihova rite urere. Kọ ẹvẹ kpahe omai? Kọ ma be j’owọ re ma ru evaifihọ Jihova gbe ẹrẹreokie riẹ ga viere? Ẹvẹ ma sai ro ru ere? J’oma ruẹ.

Ẹvẹ Whọ te k’Uyo?

◻ Ẹjiroro vẹ emọ Izrẹl a wo nọ a re ro fievahọ Jihova?

◻ Rọ kpahe evaifihọ, eme ma rẹ sai wuhrẹ mi Abraham?

◻ Fikieme ma jẹ whaha ẹro-ovio kpahe ẹsalọ Jihova?

[Picture on page 11]

Evaifihọ Jihova o kẹre te adhẹẹ nọ a rẹ kẹ enọ e be kobaro evaọ ukoko na