Ibroshọ Ọkpokpọ nọ Ma ti Fihọ Ada!
1. Obe vẹ ma ti fihọ ada evaọ November, kọ ẹjiroro vẹ a ro kere ibroshọ nana?
1 Evaọ Okokohọ Ubrotọ “Wha Jaja Aro Vi Ẹsikpobi!” ọrọ 2009/2010, a siobọno ibroshọ ọkpokpọ na Ebaibol Na—Ovuẹ Vẹ O Riẹ Eva? Evaọ November, ikoko kpobi nọ e rrọ akpọ na a ti fi ei họ ada evaọ orọ ọsosuọ. Didi irere ahwo nọ a rrọ ẹkwotọ mai a ti wo no ibroshọ nana ze? Ahwo buobu, maero enọ e rrọ Ileleikristi hi, a riẹ eware nọ e rrọ Ebaibol na tere he. Fikiere, a jọ ẹwẹ-obe avọ 3 ọrọ ibroshọ na ta inọ a kere i rie re u fi obọ họ kẹ ahwo riẹ “ugogo eware nọ e rrọ Ebaibol na.”
2. Oghẹrẹ vẹ ma sai ro fi ibroshọ na họ ada?
2 Oghẹrẹ nọ A re ro Fi ei Họ Ada: Ma sae ta nọ: “Ma gwọlọ riẹ oware nọ who roro kpahe ẹme nana. [Se 2 Timoti 3:16.] Ahwo buobu nọ ma lele ta ẹme no a rọwo kugbe eme yena; amọfa a roro nọ Ebaibol yọ obe uwoma jọ gheghe. Eme who roro kpahe Ebaibol na? [Kuvẹ kẹ uyo.] Ghelọ oghẹrẹ egagọ nọ ma rrọ kẹhẹ, uvi ẹjiroro sa-sa e riẹ nọ ma rẹ rọ kiẹ Ebaibol na riwi kẹ oma mai. [Se eme nọ e rrọ obehru ọ ẹwẹ-obe avọ 3 na.] Nọ who bi se orukpẹre ovuẹ Ebaibol nọ o rrọ ibroshọ nana, whọ te ruẹ oware isiuru jọ: Ebaibol na o wo uzoẹme ovo gbe ovuẹ nọ o dhẹ riẹ duwu.”
3. Edhere ọfa vẹ ma sai ro fi ibroshọ na họ ada, maero evaọ ẹkwotọ nọ ahwo nọ a rrọ Ileleikristi hi a rrọ?
3 Edhere ọfa nọ ma sai ro fi ie họ ada ọna, maero nọ ma tẹ be ta usiuwoma evaọ ẹkwotọ nọ enọ e rrọ Ileleikristi hi a rrọ: “Ma gwọlọ riẹ oware nọ who roro kpahe ẹme nọ ọ rrọ Ikereakere nana (hayo evaọ obe ẹri nana). [Se Olezi 37:11.] Ẹvẹ who roro nọ akpọ na ọ te jọ nọ eruẹaruẹ nana i te rugba no? [Kuvẹ kẹ uyo.] Onana yọ oriruo orọ ẹruore gbe omosasọ nọ oghẹrẹ ahwo kpobi a rẹ sai wo no Ebaibol na ze.” Se edhe-ẹme nọ ọ rrọ obehru ẹwẹ-obe avọ 3 na, who ve fi ibroshọ na họ ada.
4. Ẹvẹ ma sae rọ rehọ ibroshọ na to obe-uwuhrẹ Ebaibol họ?
4 To Obe-Uwuhrẹ Ebaibol Họ: Nọ ma te zihe ma rẹ sae kareghẹhọ ohwo na oware nọ ma ta kpahe evaọ iweze ọsosuọ, je se edhe-ẹme ọvo hayo ivẹ evaọ uzoẹme nọ ma ro lele iei ta ẹme vẹre, jẹ rehọ enọ nọ e rrọ ukuhọ abọ yena ru iruo. Hayo ma tẹ gwọlọ nọ ma re dhesẹ obe ọ Ebaibol Wuhrẹ na kẹe ovavo, ma sai se eme nọ e rrọ uke ibroshọ na, rehọ obe na kẹe, jẹ nọe re o dhesẹ uzoẹme nọ o were riẹ, wha ve se edhe-ẹme ọvo hayo ivẹ evaọ uzou yena. Jọ mai kpobi ma w’obọ ziezi evaọ efihọ-ada ibroshọ nana evaọ November!