Iruo nọ E rẹ Mae kẹ Evawere

1. Didi iruo ma bi ru nẹnẹ ro fi obọ họ kẹ ahwo riẹ Jihova?

¹ Eva e were ahwo nọ e rọ ẹro ruẹ usiwo igbunu evaọ ikpe-udhusoi ọsosuọ gaga. (Luk 5:24-26) Nẹnẹ, eva e be were omai inọ ma bi w’obọ evaọ iruo nọ i bi fi obọ họ kẹ ahwo riẹ Jihova. (Evia. 22:1, 2, 17) Eva e rẹ were omai gaga nọ ma te se kpahe epanọ Ebaibol gbe ẹzi ọfuafo na i bi ro nwene uzuazọ ahwo! Ma rẹ mai wo evawere nọ ma te w’obọ evaọ iruo nana ẹkwoma eruo obe-uwuhrẹ Ebaibol nọ u bi wo ẹnyaharo.

2. Eware sa-sa vẹ e rẹ wha evawere se omai nọ ma bi wuhrẹ amọfa uzẹme na?

² Eme họ odẹ Ọghẹnẹ? Fikieme ọ rọ kẹ uye-oruẹ uvẹ? Eme Uvie Ọghẹnẹ u ti ru kẹ ahwo-akpọ? Ma re wo evawere orọnikọ nọ ma tẹ kuyo enọ itieye na ọvo ho rekọ nọ ma tẹ ruẹ oghọghọ nọ ọmọ uwuhrẹ o bi wo fiki uzẹme na nọ o bi wuhrẹ. (Itẹ 15:23; Luk 24:32) Nọ ọmọ-uwuhrẹ o bi wo ẹnyaharo na, ẹsejọhọ o ti mu odẹ Jihova họ ese, je ru inwene evaọ ẹgọ gbe osẹ riẹ, siobọno iruemu iyoma, je mu usiuwoma họ ẹta kẹ amọfa. Uwhremu na, ọ tẹ roma mudhe jẹ họ-ame no, o ti zihe ruọ oniọvo gbe ibe oruiruo mai. Enana kpobi e rẹ kẹ omai evawere.—1 Tẹs. 2:19, 20.

3. Eme ma re ru re ma sae to obe-uwuhrẹ Ebaibol họ?

³ Kọ Whọ Sai W’Obọ? Whọ tẹ gwọlọ w’obọ evaọ iruo nana nọ e rẹ mae kẹ evawere na, lẹ se Jihova re o fi obọ họ kẹ owhẹ re who wo obe-uwuhrẹ Ebaibol, whọ vẹ jẹ daoma ru lele olẹ ra. (1 Jọn 5:14) Ta usiuwoma evaọ oria nọ whọ rẹ jọ ruẹ ahwo gbe oke nọ a rẹ rọ jọ uwou. Ta kẹ ahwo kpahe obe-uwuhrẹ Ebaibol evaọ oke kpobi nọ uvẹ na u rovie. (Ọtausi. 11:6) Ohwo o te dhesẹ isiuru nọ whọ jẹ kọ ubi uzẹme na họ iẹe udu, zihe re who ku ame họ iẹe.—1 Kọr. 3:6-9.

4. Fikieme ma jẹ rọ ọwhọ ta ẹme kpahe obe-uwuhrẹ Ebaibol kẹ ahwo?

⁴ Ahwo buobu a gbẹ riẹ nọ ohọo gbe uruame ẹrẹreokie u bi kpe. Ono o re wuhrẹ Ebaibol kugbe ae re a sae riẹ Jihova? (Mat. 5:3, 6) Joma rehọ ẹgba mai kpobi ru iruo usiuwoma ota gbe ilele-iruo na taure ivuẹvu na i te ti kuhọ.—Aiz. 6:8.