Eme O rẹ Wha Evawere Se Owhẹ?

1. Evaọ urere amara kpobi, eme o rẹ wha evawere se omai?

¹ Evaọ urere amara kpobi nọ a tẹ ta inọ jọ ohwo kpobi ọ n’iyẹrẹ usiuwoma ota riẹ, eme o rẹ wha evawere se owhẹ? (Gal. 6:4) Ma tẹ make rrọ ekobaro obọdẹ nọ e be n’iyẹrẹ euwa 130 hayo iwhowho-uvie nọ a kẹ uvẹ inọ a sae n’iyẹrẹ iminiti 15, eva e rẹ were omai kpobi keme ma ru utho nọ ma sai ru kẹ Jihova.—Ol. 100:2.

2. Fikieme ma jẹ rọ ẹgba mai kpobi kẹ iruo Jihova?

² Jihova Osu idhiwu gbe akpọ o te ọnọ ma rẹ rehọ ẹgba mai kpobi gọ. (Mal. 1:6) Fiki uyoyou nọ ma wo kẹ Jihova ma rọ rehọ oma mai mudhe kẹe re ma ru oreva riẹ. Fikiere, evaọ urere okpẹdoke hayo amara, otẹrọnọ u mu omai ẹrọ inọ ma rehọ “ibi ọsosuọ” mai, koyehọ ma rehọ oke mai, eriariẹ, gbe ẹgba mai kpobi ru iruo Jihova, eva e rẹ were omai. (Itẹ 3:9) Rekọ, udu mai u te bi gu omai ẹdhọ inọ ma ru te he, u fo nọ ma roro kpahe epanọ ma sai ro ru viere oke ofa.—Rom. 2:15.

3. Fikieme o gbẹ rrọ oware areghẹ hẹ re ma rọ oma mai wawo amọfa?

³ “O Gbẹjọ Orọ Ẹwawọ Kugbe Omọfa Ha”: O rrọ oware areghẹ hẹ re ma rọ oma mai wawo amọfa hayo wawọ epanọ ma je ru okenọ ẹgba ọ gbẹ jọ omai oma. Uyero ohwo u re nwene. Ahwo jọ a wo onaa vi ejọ. Ma tẹ be rọ oma mai wawo amọfa o rẹ wha oma-uhrowo gbe iroro ọ me-fioka-ha ze. (Gal. 5:26; 6:4) Jesu ọ rehọ ahwo jọ wawọ amọfa ha. Ukpoye, o jiri ahwo kẹ utho nọ a sae ru.—Mak 14:6-9.

4. Eme ma rẹ sai wuhrẹ no ohare talẹnti na ze?

⁴ Evaọ ohare talẹnti na, Jesu ọ ta nọ a ghale talẹnti kẹ iruiruo na omomọvo wọhọ “epanọ a rẹ sai ruẹ.” (Mat. 25:15) Nọ olori na o zihe ze jẹ nọ ae epanọ a ru te, o jiri jẹ ghale idibo nọ e rehọ talẹnti na ruiruo ziezi te epanọ ẹgba gbe uyero rai o kuvẹ te. (Mat. 25:21, 23) Ma tẹ roma kẹ iruo usiuwoma ota na ziezi, ma ti wo evawere gbe ọjẹrehọ Ọghẹnẹ!