Sẹro Obroziẹ-Iroro Ra

1. Eme họ uzoẹme okokohọ obọdẹ ukpe 2013, kọ eme okokohọ na u ti fi obọ họ kẹ omai ru?

¹ Kẹdẹ kẹdẹ ma be nyaku edawọ nọ e rẹ sae lẹliẹ omai ru eware nọ e wọso obroziẹ-iroro mai. Oyejabọ uzoẹme okokohọ obọdẹ nọ u ti muhọ evaọ February 2013 o rọ ta nọ “Sẹro Obroziẹ-Iroro Ra.” (1 Tim. 1:19) A ruẹrẹ eme okokohọ na họ re i fi obọ họ kẹ omai omomọvo roro didi kpahe oghẹrẹ nọ ma be rọ obroziẹ-iroro nọ Ọghẹnẹ ọ kẹ omai na ruiruo.

2. Enọ ihrẹ jọ nọ i wuzou gaga vẹ a te kẹ iyo rai evaọ okokohọ na?

² Eware nọ Ma ti Wuhrẹ: A te kẹ iyo enọ ihrẹ jọ nọ i wuzou gaga:

• Eme o rẹ sai fi obroziẹ-iroro mai họ ọza?

• Ẹvẹ ma sai ro wuhrẹ obroziẹ-iroro mai?

• Ẹvẹ o sae rọ lọhọ re azẹ ahwo kpobi o no omai uzou?

• Eme eroro kpahe ehri-izi Ebaibol gbe owọ nọ ma be jẹ kpahe ae u re dhesẹ kpahe omai?

• Ẹvẹ ma sai ro ru re ma siọ obroziẹ-iroro amọfa ba eru zoruẹ?

• Whai izoge, ẹvẹ wha sai ro dikihẹ ziezi nọ a tẹ be gwọlọ viẹ owhai họ re wha ru oware nọ o wọso obroziẹ-iroro rai?

• Eghale vẹ i re te ahwo nọ a ru lele obroziẹ-iroro rai nọ ẹzi Ọghẹnẹ ọ be kpọ?

3. Ẹvẹ ma sai ro wo erere no okokohọ na ze?

³ Jihova o bi fi obọ kẹ omai re ma sae whaha eware nọ Setan ọ be gwọlọ ro gbe obroziẹ-iroro mai ku. Ọsẹ oyoyou mai nọ ọ rrọ obọ odhiwu ọ be rọ Ebaibol na gbe ukoko riẹ ta kẹ omai nọ: “Ọnana họ edhere na, wha nyae.” (Aiz. 30:21) Jihova ọ te rọ ẹkwoma okokohọ nana dhesẹ edhere nọ ma rẹ nya kẹ omai. Fikiere, daoma re whọ jọ okokohọ na no emuhọ rite ekuhọ riẹ. Gaviezọ ziezi je roro epanọ who re ro fi eme nọ who ti yo họ iruo. Wha te t’uwou, wha ta ẹme kpahe okokohọ na evaọ uviuwou rai. Ma te fi eme nọ ma yo họ iruo u ti fi obọ họ kẹ omai ‘ru iroro mai fo’ jẹ whaha omaweromẹ ubroke nọ Setan ọ gwọlọ rọ viẹ omai họ.—1 Pita 3:16.