Uzou Avọ 2

Ẹvẹ Whọ Sai ro Wo Emamọ Obroziẹ-Iroro?

“Wha ru iroro rai fo.”—1 PITA 3:16.

1, 2. Who te bi kpohọ oria nọ who ri te ẹdọvo ho, fikieme u je wuzou re whọ gaviezọ kẹ ohwo nọ o bi su owhẹ, kọ ẹvẹ a sae rọ rehọ ohwo otiọye na dhesẹ obroziẹ-iroro?

ỌNỌ ọ rẹ dhẹ okọ Oyibo ọ be dhẹ okọ evaọ abade ọraragha; ohwo jọ ọ be nya evaọ udhude nọ o rẹ ruaro; ọnọ ọ rẹ dhẹ arupre ọ be kpọ arupre na evaọ idedeghe. Kọ whọ riẹ oware jọ nọ o gbahọ nnọ imasa nana a re wo? A gbe wo oware jọ hayo ohwo jọ nọ o re dhesẹ edhere kẹ ai hi, a rẹ sai vru kufiẹ.

² Dae rehọ iẹe inọ who bi kpohọ oria jọ nọ who ri te ẹdọvo ho. Whẹ avọ ohwo jọ nọ o te etẹe no ẹdẹjọ nọ who fievahọ wha gbẹ rrọ usu. Ọ tẹ riẹ edhere na ziezi, ọ sai ti su owhẹ te oria na. Whọ tẹ gaviezọ kẹe, who ti vru hu. Evaọ oghẹrẹ jọ, a rẹ sae rehọ ohwo otiọye na dhesẹ okẹ oghaghae jọ nọ Jihova ọ k’omai—obroziẹ-iroro na. (Jemis 1:17) Ma gbe wo obroziẹ-iroro ho, ma re vru kufiẹ. Ma tẹ rehọ iẹe ruiruo ziezi, o rẹ sai fi obọ họ kẹ omai yeri emamọ uzuazọ. Fikiere, joma t’ẹme kpahe oware nọ obroziẹ-iroro na o rrọ gbe epanọ u re ruiruo. Kẹsena ma vẹ te ta kpahe eware esa nana: (1) Epanọ ma sai ro wuhrẹ obroziẹ-iroro na, (2) oware nọ ma je roro kpahe obroziẹ-iroro amọfa, gbe (3) oware nọ emamọ obroziẹ-iroro o rọ rrọ erere k’omai.

OWARE NỌ OBROZIẸ-IRORO NA O RRỌ GBE EPANỌ U RE RUIRUO

3. Eme họ otofa ubiẹme Griki nọ a fa “obroziẹ-iroro” na, kọ didi iruo obroziẹ-iroro na o re ru?

³ Evaọ Ebaibol, otofa ubiẹme Griki nọ a fa “obroziẹ-iroro” na họ “ẹriẹ kpahe omobọ ohwo.” Wo ohẹriẹ no emama efa, Ọghẹnẹ ọ ma omai evaọ oghẹrẹ nọ ma sae rọ riẹ kpahe oma mai. Koyehọ, ma rẹ sai dhizu, kiẹ oma mai re ma ruẹ sọ ma wo uruemu nọ u fo. Obroziẹ-iroro mai o re gu omai ẹdhọ, kiẹ owojẹ, uruemu gbe eware nọ ma be salọ riwi. O rẹ sae kpọ omai jẹ emamọ iroro hayo vẹvẹ omai unu nọ ma tẹ be jẹ ekpehre iroro. Ma te ru oware ezi, obroziẹ-iroro mai o rẹ lẹliẹ udu mai ghọghọ, ma je ru oware uyoma, u ve brukpe omai.

4, 5. (a) Ẹvẹ ma rọ riẹ inọ Adamu avọ Ivi a wo obroziẹ-iroro, kọ eme o via nọ a raha uzi Ọghẹnẹ? (b) Iriruo ezae ikiẹrẹe vẹ i dhesẹ inọ obroziẹ-iroro rai o ruiruo?

⁴ A ma ohwo-akpọ kpobi avọ obroziẹ-iroro. Uruemu nọ Adamu avọ Ivi a dhesẹ u dhesẹ via inọ a wo obroziẹ-iroro. Oye jabọ nọ oma o rọ vo ae nọ a raha uzi no. (Emuhọ 3:7, 8) Rekọ obroziẹ-iroro nọ u kpokpo i rai na u wo erere kẹ ai hi. A keke aro fihọ raha uzi Ọghẹnẹ. Enẹ a rọ barosa wọso Jihova Ọghẹnẹ, je zihe ruọ ewegrẹ riẹ. Wọhọ ahwo-akpọ nọ e gba, a riẹ oware nọ a je ru, fikiere a kurẹriẹ hẹ.

⁵ Wo ohẹriẹ no Adamu avọ Ivi, ahwo-akpọ buobu nọ a gba ha a kezọ kẹ obroziẹ-iroro rai no. Wọhọ oriruo, Job ọzae ẹrọwọ na ọ sae ta nọ: “Mẹ rẹ ruẹrẹ-abọ họ ẹrẹreokie mẹ, mẹ sae siobọnoi gbe he; udu mẹ o sai brukpe omẹ eva edẹ uzuazọ mẹ kpobi hi.”a (Job 27:6) Job ọ ginẹ jọ emamọ ohwo. Ọ jẹ roma totọ gaviezọ kẹ obroziẹ-iroro riẹ, ọ kẹ riẹ uvẹ re o kpọ owojẹ gbe iroro-ejẹ riẹ. Oye jabọ nọ ọ rọ ta avọ evawere inọ udu riẹ u brukpei hi. Rri ohẹriẹ nọ o rrọ udevie Job avọ Devidi. Okenọ Devidi o bru ẹwẹ-ohọ ubuluku Sọl, ọnọ ọ jọ ovie nọ Jihova o wholo, ‘udu u te brukpe Devidi.’ (1 Samuẹle 24:5) U woma inọ udu u brukpe Devidi, keme u wuhrẹ i rie re ọ whaha uruemu orivo utioye na.

6. Eme o dhesẹ inọ obroziẹ-iroro yọ okẹ nọ Ọghẹnẹ ọ rọ kẹ ahwo-akpọ kpobi?

⁶ Kọ idibo Jihova ọvo a wo obroziẹ-iroro? Roro kpahe eme ọ Pọl ukọ na: “Okenọ otu Egedhọ na nọ a wo uzi na ha a rọ ẹkẹ-ẹmema rai ru eware nọ e rọ eva uzi na gba a maki wo uzi na ha; a ru rie họ uzi kẹ oma obọ rai. Enọ i dhesẹ iruẹru uzi nọ a kere họ evaọ eva rai, oma obọ rai dede u sisẹi kẹ ae; jegbe iroro obọ rai okenọ a make be poviẹ ae yoyoma hayo unoma uguo ohwo suọ ohwo.” (Ahwo Rom 2:14, 15) Ẹsejọ, obroziẹ-iroro o rẹ wọ makọ enọ e riẹ kpahe izi Jihova vievie he nọ a je koko izi Riẹ.

7. Fikieme obroziẹ-iroro na o sai ro su ohwo thọ ẹsejọ?

⁷ Rekọ, obroziẹ-iroro na ọ rẹ sai su ohwo thọ ẹsejọ. Fikieme? Roro kpahe ọtadhesẹ nọ ma ta ẹme te evaọ obọ emuhọ na. Edhere na o tẹ bada ohwo nọ o bi su owhẹ na aro, ọ rẹ sai su owhẹ thọ. Ofariẹ, who te bi lele ohwo na sikẹ inọ whọ rẹ nya edhere nọ o dhesẹ kẹ owhẹ hẹ, inọ onọ udu ra o ta kẹ owhẹ who re lele, whọ rẹ sai vru. Epọvo na re, ekpehre isiuru udu mai i te kpomahọ obroziẹ-iroro mai, o rẹ sai su omai thọ. Yọ otẹrọnọ ma gbẹ rehọ eme Ebaibol na ro wuhrẹ obroziẹ-iroro mai hi, ma te sae hẹriẹ uwoma no uyoma ha evaọ eware buobu nọ i wuzou. Evaọ uzẹme, re obroziẹ-iroro mai u ruiruo ziezi, ma gwọlọ ọkpọvio ọrọ ẹzi ọfuafo Jihova. Pọl o kere nọ: “Iroro eva [hayo, obroziẹ-iroro] mẹ e be jọ eva Ẹzi Ẹri se isẹi kẹ omẹ.” (Ahwo Rom 9:1) Rekọ ẹvẹ ma rẹ rọ riẹ sọ obroziẹ-iroro mai o rọwo kugbe ẹzi ọfuafo Jihova? Ewuhrẹ ma re wuhrẹ iẹe.

EPANỌ MA SAI RO WUHRẸ OBROZIẸ-IRORO NA

8. (a) Ẹvẹ udu na o sai ro kpomahọ obroziẹ-iroro na, kọ eme o rẹ mae jọ omai oja kpahe iroro-ejẹ mai? (b) Fikieme iroro ivevẹ nọ Oleleikristi o re wo ọvo u gbe ro te he? (Rri eme oruvẹ-obotọ na.)

⁸ A tẹ k’owhẹ uvẹ inọ whọ rehọ udu obọ ra jiroro jọ, ẹvẹ whọ te jiroro na? Onọ o ziọ ahwo jọ udu ọvo a re roro kpahe rọ jiroro na, a ve ru onọ o rrọ ai iroro na. Uwhremu na a vẹ ta nọ, “Onọ udu mẹ o ta k’omẹ me ru na.” Isiuru ohwo e rẹ sae ga te epanọ e sai ro kpomahọ obroziẹ-iroro na dede. Ebaibol e ta nọ: “Udu na u wo ẹghẹ vi eware na kpobi, je wo uruemu ugbogbo; kọ ono ọ rẹ sai vuhu ei?” (Jerimaya 17:9) Fikiere, orọnikọ oware nọ udu mai o ta kẹ omai o mai wuzou hu. Ukpoye, ma rẹ kaki roro kpahe oware nọ o rẹ were Jihova Ọghẹnẹ.b

9. Eme họ ozodhẹ Ọghẹnẹ, kọ ẹvẹ ozodhẹ nana u re kpomahọ obroziẹ-iroro mai?

⁹ Otẹrọnọ iroro nọ ma be jẹ i bi no obroziẹ-iroro nọ ma wuhrẹ ze, iroro-ejẹ na i re dhesẹ ozodhẹ Ọghẹnẹ nọ ma wo via, orọnikọ isiuru omobọ mai hi. Ma rehọ oriruo jọ. Nehemaya ọnọ ọ jọ emamọ ọba na, o wo udu nọ ọ hai ro mi ahwo Jerusalẹm igho jọ gbe esa-uzou. Rekọ o ru ere he. Fikieme? Ọ gwọlọ ru oware ovo nọ Jihova ọ rẹ rọ dheva kẹe he inọ o bi kienyẹ ahwo Riẹ. Ọ ta nọ: “Fiki ozọ Ọghẹnẹ me ru ere he.” (Nehemaya 5:15) O roja re ma dhozọ eva nọ ma re ru dha Ọsẹ obọ odhiwu mai. Ozodhẹ utioye na u re ru omai gwọlọ ọkpọvio no Ebaibol ze otẹrọnọ ma gwọlọ jiroro.

10, 11. Ehri-izi Ebaibol vẹ e ta kpahe ẹda idi nọ i re mu, kọ ẹvẹ ma sai ro wo ọkpọvio Ọghẹnẹ re ma sai fi ehri-izi na họ iruo?

¹⁰ Wọhọ oriruo, joma ta ẹme kpahe udi nọ u re mu. Nọ oware nọ ibuobu mai a rẹ jọ jiroro evaọ ehaa, Kọ mẹ da, hayo kọ mẹ da ha? Orọ ọsosuọ, ma rẹ riẹ oware nọ u fo nnọ ma re ru. Ehri-uzi Ebaibol vẹ o ta kpahe ẹme nana? Ebaibol e wọso umutho udi nọ a rẹ da ha. Ebaibol e ta nnọ udi yọ okẹ nọ u no obọ Jihova ze. (Olezi 104:14, 15) Rekọ, Ebaibol i mukpahe idieda-thomawa gbe ehaa nọ a re jo ru edo fiki idi nọ a da no. (Luk 21:34; Ahwo Rom 13:13) Ofariẹ, nọ Ebaibol e jẹ fodẹ izieraha ilogbo wọhọ ọfariẹ-ogbe gbe ẹnwae-obro, o fodẹ idieda-thomawa.c—1 Ahwo Kọrint 6:9, 10.

¹¹ Ehri-izi itieye na e rẹ kpọ obroziẹ-iroro Oleleikristi. Fikiere ma tẹ be jiroro sọ ma te da udi evaọ ehaa, ma rẹ nọ oma mai enọ itienana: ‘Oghẹrẹ vẹ ehaa na e be te jọ? Kọ ehaa na e te jọ zighi zighi, nọ a re jo ru edo fiki idi nọ a da no? Isiuru vẹ me wo kpahe udi? Kọ me re thokpuru udi, mẹ rẹ rehọ iẹe kpairoro? Kọ mẹ rẹ sae gbaoma mẹ re mẹ ruẹse da umutho?’ Nọ ma bi roro didi kpahe ehri-izi Ebaibol gbe enọ nọ e rẹ wha ze na, u re woma re ma lẹ kẹ ọkpọvio Jihova. (Olezi 139:23, 24) Ma tẹ be nọ enọ itienana yọ ma be yare Jihova re ọ rehọ ẹzi ọfuafo riẹ kpọ omai. Yọ ma be jẹ rehọ ere wuhrẹ obroziẹ-iroro mai re ọ hai ru lele ehri-izi Ọghẹnẹ. Rekọ oware ofa jọ o riẹ nọ ma re roro kpahe nọ ma tẹ be jiroro.

FIKIEME MA JE RORO KPAHE OBROZIẸ-IRORO AMỌFA?

12, 13. Eware jọ vẹ e lẹliẹ obroziẹ-iroro Ileleikristi wo ohẹriẹ no ohwohwo, kọ eme ma re ru kpahe ohẹriẹ itieye na?

¹² O rẹ sai gb’owhẹ unu ẹsejọ inọ obroziẹ-iroro Ileleikristi omomọvo i wo ohẹriẹ gaga. Oware jọ o rẹ sai tu ohwo jọ oma; rekọ oware ovona o vẹ were ohwo ọdekọ, tube gbei unu dede inọ oware na o be kẹ ohwo jọ uye. Wọhọ oriruo, kpahe ẹme ọ udi nọ a rẹ da kugbe, o sae were ohwo jọ re tei te egbẹnyusu riẹ jọ a keria da udi kugbe; rekiyọ uruemu nana o be kẹ ohwo jọ uye. Eme ọ rẹ wha ohẹriẹ itieye na ze, kọ ẹvẹ i re kpomahọ iroro-ejẹ mai?

¹³ Eware buobu e wha riẹ ze nọ ma ro wo ohẹriẹ no ohwohwo. Oria nọ ma jọ whẹro gbe oghẹrẹ nọ a rọ yọrọ omai i wo ohẹriẹ gaga. Wọhọ oriruo, ahwo jọ a riẹ epanọ o jọ bẹbẹ te kẹ ae evaọ okenọ u kpemu re a siobọno ekpehre uruemu jọ. (1 Ivie 8:38, 39) Evaọ ẹme udi, ahwo otiọye na a rẹ gwọlọ yọrọ oma gaga. Ohwo otiọye na ọ tẹ kpahe owhẹ, obroziẹ-iroro riẹ ọ sae ta kẹe inọ ọ da udi hi. Kọ eva e te dha owhẹ? Kọ whọ te gba udi na họ iẹe? Ijo. Whọ gbẹ make riẹ oware nọ ọ rọ ta nnọ ọ be da ha, yọ ọ gwọlọ tae kẹ owhẹ hẹ, uyoyou inievo u re ru owhẹ vu ei wa.

14, 15. Kpahe ẹme vẹ Ileleikristi ikpe-udhusoi ọsosuọ a jo wo obroziẹ-iroro sa-sa, kọ eme Pọl ọ ta?

¹⁴ Pọl ukọ na ọ ruẹ inọ obroziẹ-iroro Ileleikristi ikpe-udhusoi ọsosuọ na i wo ohẹriẹ no ohwohwo gaga. Evaọ oke yena, udu u je kpokpo Ileleikristi jọ kpahe ẹriọ oghẹrẹ emuore jọ nọ a ro dheidhe kẹ edhọ. (1 Ahwo Kọrint 10:25) U je kpokpo udu Pọl ho nọ a tẹ jọ obọ eki dẹ oghẹrẹ emuore otiọye na. Rọ kẹe, emedhọ i fioka ha; obọ Jihova emuore o no ze, orọnikọ obọ emedhọ họ. Rekọ Pọl ọ ruẹ inọ orọnikọ ahwo kpobi a rri ẹme na ere he. Otujọ a jọ egedhọ re a te ti kurẹriẹ. Rọ kẹ ahwo otiọye na, u fo re a ghọ oware kpobi nọ u wobọ kpahe ẹdhọ. Ẹvẹ Pọl o ro ku ẹme na họ?

¹⁵ Pọl ọ ta nọ: ‘Mai nọ e rẹ gaga ma re weri kẹ otunọ e ga te he, orọnọ omobọ mai ma re ru eva were he. Keme Kristi dede o ru eva were omobọ riẹ ọvo ho.’ (Ahwo Rom 15:1, 3) Pọl ọ ta inọ ma rẹ rehọ ewoma inievo mai rọ karo, wọhọ epanọ Kristi o ru. Evaọ ọkpọ ẹme ọvona, Pọl ọ ta inọ ọ rẹ dhugbẹ siọ arao ba ẹriọ ukpenọ ọ rẹ wha ezoruẹ se ogodẹ ọghaghae nọ Kristi o whu kẹ.—1 Ahwo Kọrint 8:13; 10:23, 24, 31-33.

16. Fikieme enọ obroziẹ-iroro rai o rẹ kẹ ai uvẹ ru eware jọ buobu hu a gbe ro gu amọfa ẹdhọ họ?

¹⁶ Evaọ abọdekọ riẹ, enọ obroziẹ-iroro rai o rẹ kẹ ai uvẹ ru eware jọ buobu hu a rẹ rehọ amọfa guẹdhọ họ, inọ ahwo kpobi a re wo iroro evona wọhọ ae omarai. (Ahwo Rom 14:10) O rẹ mai woma re ma rehọ obroziẹ-iroro mai gu omobọ mai ẹdhọ, orọnikọ amọfa ha. Kareghẹhọ eme ọ Jesu: “Wha gu ahwo ho, re a se owhai ba eguo.” (Matiu 7:1) Ahwo kpobi nọ e rrọ ukoko na a rẹ rehọ eware nọ i fo nọ ohwo ọ rẹ jọ jiroro kẹ omobọ riẹ rọ wha ozighi ze he. Ukpoye, ma rẹ gwọlọ idhere nọ ma rẹ rọ wha uyoyou gbe okugbe haro, bọ ohwohwo ga, orọnikọ ma rẹ raha ohwohwo ho.—Ahwo Rom 14:19.

EPANỌ EMAMỌ OBROZIẸ-IRORO Ọ RẸ RỌ WHA OGHALE ZE

17. Eme ọ via kẹ obroziẹ-iroro ahwo buobu no nẹnẹ?

¹⁷ Pita ukọ na o kere nọ: “Wha ru iroro rai fo.” (1 Pita 3:16) Obroziẹ-iroro nọ ọ rrọ fuafo evaọ aro Jihova Ọghẹnẹ yọ oghale ulogbo. Ahwo buobu nẹnẹ a wo oghẹrẹ obroziẹ-iroro otiọye he. Pọl o dhesẹ ahwo jọ wọhọ otunọ “iroro rai e yamu.” (1 Timoti 4:2) Iroro ahwo otiọye na i whu no. Ahwo buobu a wo obroziẹ-iroro nọ i wo okpa no, koyehọ, i whu no—fikiere udu u re kpokpo ai hi makọ oware uyoma kpobi nọ a ru kẹhẹ. Oma o rẹ were ahwo buobu otẹrọnọ udu rai u gbe bi kpokpo ai hi.

18, 19. (a) Erere vẹ o re no udu nọ u re brukpe ohwo ze? (b) Eme ma rẹ sai ru otẹrọnọ udu u gbe bi brukpe omai kpahe izieraha nọ ma siobọno?

¹⁸ Udu u te bi brukpe omai yọ edhere nọ obroziẹ-iroro mai ọ be rọ ta k’omai inọ ma ru oware jọ thọ no. Iroro itieye na i te ru ọrahauzi kurẹriẹ, a rẹ rehọ eware iyoma nọ o ru kpobi kẹhẹ rọ vrẹ riẹ. Wọhọ oriruo, Devidi Ovie na ọ raha uzi ulogbo, rekọ oware nọ a mae rọ rehọ izieraha riẹ vrẹ riẹ họ o kurẹriẹ no eva ze. Epanọ oware nọ o ru na o da riẹ te gbe ọtamuo riẹ inọ o re koko izi Jihova no umuo oke oyena vrẹ o lẹliẹ e riẹ ruẹ inọ Jihova ọ vọ avọ “ewoma gbe erọvrẹ.” (Olezi 51:1-19; 86:5) Rekọ ẹvẹ o rẹ jọ otẹrọnọ ma siobọno izieraha mai no, a tẹ jẹ rọ vrẹ omai no, rekiyọ udu u gbe bi brukpe omai?

¹⁹ Ẹsejọ udu o rẹ sai brukpe ọrahauzi oke krẹkri o tẹ make rọnọ o siobọno emuemu na no. O tẹ via ere, u fo re ma tuduhọ omobọ mai awọ inọ Jihova o re roro wọhọ ahwo-akpọ họ. Ma rẹ rọwo je fi eva họ uyoyou gbe erọvrẹ riẹ, wọhọ epanọ ma rẹ tuduhọ amọfa awọ inọ a ru na. (1 Jọn 3:19, 20) Evaọ abọdekọ riẹ, iroro efuafo e rẹ lẹliẹ ohwo wo udhedhẹ iroro, ufuoma, gbe uvi oghọghọ nọ a rẹ kake ruẹ hẹ evaọ akpọ nana. Ibuobu nọ i je ru eware iyoma vẹre a wo udhedhẹ utionana no, yọ ma be t’ẹme na a wo iroro efuafo nọ a be gọ Jihova Ọghẹnẹ na.—1 Ahwo Kọrint 6:11.

20, 21. (a) Eme obe nana u ti fi obọ họ kẹ owhẹ ru? (b) Wọhọ Ileleikristi, didi ufuoma ma be reawere riẹ, kọ ẹvẹ ma rẹ rehọ iẹe ruiruo?

²⁰ A kere obe nana re u fi obọ họ kẹ owhẹ wo oghọghọ yena, je wo iroro efuafo no oke nana vrẹ rite ekuhọ edẹ urere idabolo erọ uyerakpọ Setan na. O lọhọ họ re ma jọ obe nana t’ẹme kpahe izi gbe ehri-izi Ebaibol kpobi nọ i fo nọ who re roro kpahe je fihọ iruo evaọ otọ uyero kpobi. Ofariẹ, who rẹro ho inọ ma te jọ obe nana fi izi jọ họ evaọ oware nọ o gwọlọ nnọ ohwo ọ rẹ jọ jiroro kẹ omobọ riẹ. Ẹjiroro obe nana họ re u fi obọ họ kẹ owhẹ wuhrẹ obroziẹ-iroro ra ẹkwoma ewuhrẹ epanọ who re fi eme Ebaibol họ iruo evaọ uzuazọ ikẹdẹ kẹdẹ ra. Wo ohẹriẹ no uzi Mosis na, “uzi Kristi” o rẹ tuduhọ ahwo awọ re a lele ehri-izi Ebaibol gbe onọ udu rai o ta, orọnikọ izi jọ nọ a kere fihọ otọ họ. (Ahwo Galesha 6:2) Fikiere Jihova ọ kẹ Ileleikristi ufuoma nọ a rẹ rọ salọ onọ u je rai. Rekọ Ebaibol na e kareghẹhọ omai inọ ma rẹ rehọ ufuoma nana “ru umuomu hu.” (1 Pita 2:16) Ukpoye, ufuoma utioye na o k’omai obọdẹ uvẹ nọ ma re ro dhesẹ uyoyou mai kẹ Jihova.

²¹ Whọ tẹ roma totọ roro kpahe epanọ o mai woma nọ who re ro fi ehri-izi Ebaibol họ iruo, re who je fi iroro nọ whọ jẹ na họ iruo, whọ te ruabọhọ eruo oware nọ who ru evaọ okenọ whọ kake riẹ kpahe Jihova. Whọ te rehọ ere wuhrẹ ẹgba iroro ra nọ whọ be rehọ iẹe ruiruo ẹsikpobi na. (Ahwo Hibru 5:14) Obroziẹ-iroro ra nọ whọ rehọ Ebaibol wuhrẹ no o vẹ te jọ oghale kẹ owhẹ evaọ edẹ uzuazọ ra kpobi. Wọhọ ohwo nọ ọ rẹ kpọ ohwo nọ o bi kpohọ erẹ na, obroziẹ-iroro ra u ti fi obọ họ kẹ owhẹ jiroro nọ e rẹ wha evawere se Ọsẹ obọ odhiwu ra. Onana yọ uvi edhere nọ whọ rẹ rọ daji uyoyou Ọghẹnẹ.

[Oruvẹ-obotọ]

ẸVẸ WHỌ TE K’UYO?

▪ Nọ ma riẹ inọ Jihova o bi muẹrohọ omai ẹsikpobi na, ẹvẹ onana u re kpomahọ obroziẹ-iroro mai?—Ahwo Hibru 4:13.

▪ Ẹvẹ obroziẹ-iroro Josẹf o ro fi obọ họ kẹe fi odawọ kparobọ?—Emuhọ 39:1, 2, 7-12.

▪ Re ma sae lẹ se Jihova, fikieme iroro efuafo e rọ roja?—Ahwo Hibru 10:22.

▪ Fikieme ma je roro kpahe obroziẹ-iroro amọfa nọ e rrọ ibe Ileleikristi mai hi?—2 Ahwo Kọrint 4:1, 2.

[Uwoho nọ e rrọ ẹwẹ-obe avọ 21]

Obroziẹ-iroro ra nọ whọ rehọ Ebaibol wuhrẹ no o rẹ sai fi obọ họ kẹ owhẹ jiroro sọ whọ da udi hayo whọ da ha

[Uwoho nọ e rrọ ẹwẹ-obe avọ 22]

Emamọ obroziẹ-iroro o rẹ sae kpọ omai evaọ uzuazọ, k’omai oghọghọ gbe udhedhẹ iroro