“Onọ O Mae Rọ Aro Whai Ohwo Ọ Rọ Uyoyou Nọ O Rẹ Hiẹ Hẹ You Ohwo”

Okugbe-inievo mai na yọ oghale nọ u no obọ Jihova ze. (Ol. 133:1) Agbẹta nọ Pita ukọ na o ro kere nọ: “Urere eware kpobi o kẹlino; fikiere wha jaja aro vi wha je he roro hẹ lẹ olẹ rai. Onọ o mae rọ aro whai ohwo ọ rọ uyoyou nọ o rẹ hiẹ hẹ you ohwo.” (1 Pita 4:7, 8) Fikinọ ma rrọ ukoko Ileleikristi nọ o wọhọ uviuwou ọvo evaọ akpọ na soso, ma rrọ udevie ahwo nọ e wọhọ esẹ, ini, inievo-emezae gbe erọ emetẹ nọ ma gbẹ be gọ Ọghẹnẹ. (Mak 10:29, 30) Dede na, eware buobu e rẹ sae wha ẹbẹbẹ họ udevie mai avọ inievo mai. Fikiere, eme ma re ru re uyoyou mai o seba ẹyẹ evaọ akpọ nana nọ uyoyou o rrọ họ na? Ẹme nọ ma be te ta na u ti fi obọ họ kẹ omai riẹ otọ ẹme nọ Pita ukọ na ọ ta evaọ 1 Pita 4:7, 8. O te jẹ lẹliẹ omai riẹ oghẹrẹ nọ ma sai ro dhesẹ nọ ma you inievo mai gbe ahwo nọ e rrọ ukoko na ha.

Oware nọ o rẹ mae lẹliẹ omai you ohwohwo họ fikinọ ‘Ọghẹnẹ o wo uyoyou.’ (1 Jọn 4:7) Jihova ọnọ ọ rrọ yoyou na ọye ọ kaki you omai, yọ o dhesẹ onana ẹkwoma Ọmọ riẹ nọ o vi ze ti whu uwhu oja fiki mai, “re ma ruẹse rọ fiki riẹ zọ.” (1 Jọn 4:9) Ẹvẹ ma re ro dhesẹ nọ uyoyou ulogbo nana o d’omai ẹro? Obe 1 Jọn 4:11 o ta nọ: “Re Ọghẹnẹ o te you omai ere, ufore mai ohwo o you ohwo ere re.” Ma te you inievo mai, ma re rẹro nọ Ọghẹnẹ o ti yere omai hi. Ukpoye, mai ma re yere Ọghẹnẹ nọ ọ rọ kẹ omai inievo iwoma buobu. Fikinọ ma bi rẹro nọ ahwo nọ e rrọ ukoko na ha a te nyaze ti lele omai gọ Jihova ẹdẹjọ, ma re you rai, yọ uyoyou yena o rẹ lẹliẹ omai ta ‘usiuwoma’ kẹ ae ẹsikpobi. (Aiz. 52:7) Nọ akpọ na o bi re no na, joma gbe dhesẹ nọ ma you inievo mai evaọ akpọ na soso!