Jọ Ohwo nọ O re Koko Oke
1. Didi oriruo Jihova o fihotọ kpahe oke nọ a re koko?
1 Jihova o re koko oke ẹsikpobi. Wọhọ oriruo, o re fiobọhọ kẹ idibo riẹ “evaọ ẹruoke.” (Hib. 4:16, NW) Ọ be jẹ rọ eme riẹ wuhrẹ omai “nọ oke u te” te. (Mat. 24:45) Fikiere, ma wo imuẹro nọ ẹdẹ ofu riẹ nọ ọ be tha na o “te raha oke he.” (Hab. 2:3) Oke nọ Jihova o re koko na o rrọ erere ologbo kẹ omai. (Ol. 70:5) Rekọ fikinọ ma gba ha yọ eware e vọ omai abọ, o rẹ dina jọ bẹbẹ kẹ omai ẹsejọ re ma koko oke. Fikieme ma rẹ rọ daoma koko oke?
2. Fikieme oke nọ ma re koko o rẹ rọ wha orro se Jihova?
2 Evaọ edẹ urere nana nọ ahwo a jọ you omobọ rai jẹ kare omonyẹ na, ahwo buobu a bi koko oke he. (2 Tim. 3:1-3) Fikiere nọ Ileleikristi a tẹ be hai koko oke evaọ oria iruo rai, gbe okenọ avọ ohwo a tẹ ta ẹme mu, jẹ kaki kpohọ iwuhrẹ ukoko, amọfa a re muẹrohọ onana, yọ o rẹ wha orro se Jihova. (1 Pita 2:12) Kọ whọ be hae kaki kpohọ okọ ra, rekọ nọ u je te iruẹru egagọ ra whọ vẹ hai leti? Ma tẹ be hae kaki kpohọ ewuhrẹ jẹ jariẹ nọ a be so ole emuhọ avọ olẹ, yọ ma be rọ aro kele Ọsẹ obọ odhiwu mai nọ o re ru eware kpatiẹ na.—1 Kọr. 14:33, 40.
3. Fikieme oke nọ ma re koko u re ro dhesẹ nọ ma wo ororokẹ rọkẹ amọfa?
3 Oke nọ ma re koko u re je dhesẹ nọ ma wo ororokẹ rọkẹ amọfa. (Fil. 2:3, 4) Wọhọ oriruo, nọ ma tẹ be hae kaki kpohọ ewuhrẹ gbe usiuwoma ota, u ti ru nọ ma gbe ro kpokpo amọfa ha. Rekọ nọ a tẹ rọ ileti riẹ owhẹ no, u re dhesẹ nọ who se iruẹru ra gboja vi erọ amọfa. Whọ tẹ be hai koko oke, yọ who bi dhesẹ kẹ amọfa nọ who re se oware gboja, whọ tẹ jẹ rrọ ohwo nọ a re fievahọ.
4. Nọ ma tẹ be hai leti, ẹvẹ ma sai ro kuobọ riẹriẹ?
4 Otẹrọnọ who re leti ẹsikpobi, daoma riẹ oware nọ o be whae ze. Ruẹrẹ iruẹru ra họ ziezi, re whọ sai ru eware nọ whọ ma omaa rai evaọ ẹruoke. (Ọtausi. 3:1; Fil. 1:10) Lẹ se Jihova re o fiobọhọ kẹ owhẹ. (1 Jọn 5:14) Oke nọ ma re koko ẹsikpobi yọ edhere jọ nọ ma re ro koko izi ivẹ nọ e mae rro na, eyehọ uyoyou kẹ Ọghẹnẹ gbe amọfa.—Mat. 22:37-39.