Lele Oriruo nọ Jesu O Fihotọ
1. Didi oriruo Jesu o fihotọ?
1 Nọ ma te bi wobọ evaọ iruo ilele-iruo na, u fo re ma woi họ iroro inọ oriruo mai o re kpomahọ amọfa nọ a bi muẹrohọ omai. Jesu ọ rọ ẹme gbe oriruo riẹ ro wuhrẹ ahwo. Ahwo nọ a je muẹrohọ iẹe a sae ruẹ ajọwha riẹ, uyoyou nọ o wo kẹ ahwo, isiuru riẹ nọ ọ rọ gwọlọ ru odẹ Ọsẹ riẹ fo, gbe ọtamuo nọ ọ rọ gwọlọ ru oreva Ọsẹ riẹ gba.—1 Pita 2:21.
2. Evaọ idhere vẹ oriruo mai ọ sai ro kpomahọ ahwo nọ ma gbẹ rrọ usu evaọ odibọgba na?
2 Nọ Ma Tẹ Rrọ Odibọgba n’Uwou ruọ Uwou Na: Wọhọ epanọ Jesu o ru, oriruo mai o re kpomahọ ahwo nọ ma gbẹ rrọ usu. Iwhowho-uvie ekpokpọ gbe enọ i wo ona usiuwoma ota tere he nọ i muẹrohọ ajọwha mai evaọ odibọgba na a ti roro kpahe epanọ a sai ro ru ona rai evaọ iruo usiuwoma ota na w’ẹgba ziezi. Nọ a te muẹrohọ oghọghọ mai gbe uvi isiuru mai kpahe amọfa, o te kareghẹhọ ae epanọ u wuzou te re a dhesẹ ekwakwa-aghae itieye na evaọ odibọgba rai. Nọ a tẹ ruẹ epanọ ma be rọ Ikereakere na ruiruo ziezi, ru izihebro gbe ebe-iwuhrẹ Ebaibol, oma o te wọ ae re a ru epaọ ọvona.
3. Ẹvẹ oriruo mai ọ sai ro wuhrẹ emọ-uwuhrẹ Ebaibol, kọ eme a rẹ sai wuhrẹ?
3 Nọ Ma Te Bi Ru Ebe-Iwuhrẹ Ebaibol: Emọ-uwuhrẹ Ebaibol mai a ti muẹrohọ uruemu mai ziezi. Wọhọ oriruo, dede nọ ma ti ru ei vẹ kẹ ae oware nọ u je wuzou re a ruẹrẹ oma kpahe kẹ ewuhrẹ na, se ikere nọ e rrọ idhe-eme na, je si usi họ otọ igogo-eme na, a ti muẹrohọ sọ mai oma mai ma ruẹrẹ oma họ. (Rom 2:21) Otẹrọnọ ma be hae nya evaọ ẹruoke lele oke nọ ma fihọ nọ ma re ro wuhrẹ kugbe ai, a ti ru nọ eware efa i gbe kpomahọ uwuhrẹ Ebaibol rai hi. A ti muẹrohọ nọ ma be rehọ oma mai kpobi kẹ odibọgba na, gbe nọ ma wo ẹrọwọ ọgaga. U re gb’omai unu hu inọ emọ-uwuhrẹ Ebaibol ahwo nọ a be nya lele oriruo Jesu kpekpekpe a rẹ jọ iwhowho-uvie ajọwha, nọ i re wo ẹnyaharo ziezi.
4. Nọ ma te kpohọ iwuhrẹ ukoko, eme oriruo mai ọ rẹ sae wuhrẹ amọfa?
4 Nọ Ma Te Kpohọ Iwuhrẹ Ukoko: Ahwo kpobi nọ a rrọ ukoko Ileleikristi na a wo obọ evaọ oriruo nọ a re ro wuhrẹ amọfa evaọ iwuhrẹ ukoko. Ahwo nọ a wo isiuru nọ i mu iwuhrẹ họ ẹnyaze a re wo erere no emamọ oriruo nọ a muẹrohọ evaọ ukoko na ze. A ti muẹrohọ okugbe-inievo ọsasa mai, gbe ẹgọ avọ osẹ nọ e rrọ kpatiẹ. (Ol. 133:1) Iwuhrẹ ukoko nọ ma rẹ nya ẹsikpobi gbe iyo ọbọga nọ ma rẹ jọ iwuhrẹ na kẹ e te jọ emamọ oriruo nọ a ti muẹrohọ re. Ohwo jọ nọ ọ ziọ ewuhrẹ mai jọ o muẹrohọ epanọ ọmọtẹ ọmaha jọ ọ rọ kaki rovie ku oria Ebaibol nọ a gwọlọ se gbe epanọ ọ rọ jọ Ebaibol riẹ rri lele ohwo nọ o bi se na. Oriruo ọmọtẹ ọmaha na ọ wọ ohwo nana nọ ọ rọ yare obe-uwuhrẹ Ebaibol.
5. Fikieme ma je si oware nọ oriruo mai ọ rẹ sae wha ze gboja?
5 Ebaibol e tuduhọ omai awọ inọ ma rọ aro kele emamọ oriruo ohwohwo. (Fil. 3:17; Hib. 13:7) Fikiere, ma rẹ kareghẹhọ inọ ma te lele oriruo Jesu kpekpekpe, amọfa a ti mu ẹro họ iẹe, yọ onana o sai kpomahọ ae wowoma. Nọ ma riẹ ere no na, joma fi eme ọ 1 Timoti 4:16 nana họ iroro: “Sẹro oma ra gbe uwuhrẹ ra.”