Amono A bi Ru Oreva Jihova Nẹnẹ?​—Epanọ A rẹ rọ Rehọ iẹe Wuhrẹ

Ibroshọ Amono A bi Ru Oreva Jihova Nẹnẹ? na a ru rie re ma rehọ iẹe wuhrẹ kugbe ọmọ-uwuhrẹ Ebaibol koke koke nọ ma ti mu hayo ku uwuhrẹ na họ.a Uwuhrẹ 1 rite 4 u re fiobọhọ kẹ ọmọ-uwuhrẹ Ebaibol riẹ oghẹrẹ nọ ma rrọ, uwuhrẹ avọ 5 rite 14 u re fiobọhọ kẹe riẹ iruẹru mai, yọ orọ avọ 15 rite 28 u dhesẹ epanọ ukoko mai o rrọ. O mai woma re a wuhrẹ izoẹme na unọjọ utọjọ, rekọ a sae la kpohọ uzoẹme jọ nọ o gwọlọ nọ ọmọ-uwuhrẹ na ọ rẹ riẹ okioke yena. Uwuhrẹ ovuọvo u theri vi ẹwẹ-obe ọvo ho, yọ a rẹ sae rehọ iẹe wuhrẹ ohwo evaọ oware wọhọ iminiti isoi rite iminiti ikpe.

• 

  Kaki se uzoẹme uwuhrẹ na kẹ ohwo na

• Se uzoẹme na kpobi ẹsiẹvo, hayo se edhe-eme na unọjọ utọjọ

• Ta ẹme kpahe oware nọ wha se na. Nọ enọ nọ e rrọ obotọ ẹwẹ-obe na jẹ ta ẹme kpahe ifoto na. Se jẹ ta kpahe eria Ebaibol nọ who rri nọ e te mai fiobọhọ. Fi elo họ izoẹme esese nọ a kere mu gbalọ na keme eye e kuyo onọ uzoẹme na

• Otẹrọnọ ẹkpẹti “Gbẹ Kiẹ Via” na ọ riẹ, sei kpobi kugbe whọ vẹ vuẹe re o ru eware nọ a ta kpahe na