Kake Ruẹrẹhọ Kugbe Oniọvo Ra​—Oghẹrẹ Vẹ?

Ma rehọ iẹe nọ whọ jẹ rria Galili evaọ oke Jesu. Who te kpohọ Jerusalẹm nyai ru Ehaa Iwou-Owhre. Okpẹwho na ọ vọ avọ ibe egọ Ọghẹnẹ nọ i zurie no eria avọ eria ze kẹ ehaa na. Whọ gwọlọ dhe idhe kẹ Jihova re. Whaọ, edhere obọ etẹmpol na ọ vọ avọ ahwo, whẹ avọ ẹwe nọ who bi si lele oma wha tẹ tubẹ be keke oma họ nya orọ imivu vrẹ. Nọ wha rọ udu gaga te obei no, whọ tẹ ruẹ nọ kpakọ ahwo nọ a gwọlọ dhe idhe ẹkpẹ họ ẹbe. Whọ tẹ be hẹrẹ bẹsenọ izerẹ na a ro ru te owhẹ. Epanọ whọ be rọ rehọ arao ra họ ozerẹ na obọ na, kọ etẹe whọ jẹ kareghẹhọ nọ who ru oniọvo ra oware jọ thọ. Whaọ, ẹsejọhọ oniọvo ra na ọ rrọ udevie ogbotu na hayo okpẹwho nọ ahwo a vọ na. Jesu ọ ta oware nọ who re ru. (Se Matiu 5:24.) Ẹvẹ whẹ avọ oniọvo ra nọ who ru thọ na wha sae rọ ruẹrẹhọ wọhọ epanọ Jesu ọ ta? Kpoka họ onọ o gba evaọ ekpẹti ivẹ nọ e rrọ obotọ na.

WHỌ RẸ . . .

• daoma lele oniọvo ra ta ẹme otẹrọnọ oware na u gine te oware nọ o rẹ lẹliẹ eva dhae

• daoma kpọ oniọvo ra họ otẹrọnọ who muẹrohọ nọ eva i re kru ei ẹdha ha hayo ọye o wo ẹbẹbẹ

• romatotọ gaviezọ nọ oniọvo ra o bi horie eva kẹ owhẹ na. O tẹ make rọ nọ who wo otoriẹ ẹme riẹ na ziezi hi, nabi wou unu kẹe fiki oghẹrẹ nọ oware na o riẹe oma hayo inọ othọ owhẹ obọ

ONIỌVO RA Ọ RẸ . . .

• vuẹ inievo efa evaọ ukoko na kpahe oware uyoma nọ who ru rie na

• whọku owhẹ, romatotọ kele ọmọludo oware nọ o via na, jẹ gba owhẹ họ re who wou unu kẹe

• ruẹ omarokpotọ gbe omodawọ nọ whọ rọ nya bru ei, ọ vẹ rọvrẹ owhẹ no eva ze

Dede nọ ma gbẹ be rọ erao dhe idhe nẹnẹ hẹ, fikieme Jesu ọ rọ ta nọ Ọghẹnẹ ọ rẹ jẹ egagọ mai rehọ họ nọ ma gbe ru udhedhẹ kugbe oniọvo mai hi?