UZUAZỌ OLELEIKRISTI
Jesu O Whu Kẹ Oniọvo Ra Re
Jesu ọ rọ uzuazọ riẹ dhe idhe kẹ erahaizi. (Rom 5:8) Uzẹme riẹ họ, oware nọ Jesu o ru kẹ omai nọ ọ rọ rehọ uzuazọ riẹ kẹ omai na o da omai ẹro fia. Ghele na, u fo nọ ẹsikpobi ma hae kareghẹhọ nọ Jesu o whu kẹ inievo mai re. Ẹvẹ ma sai ro dhesẹ ọkpọ uyoyou Kristi kẹ inievo mai nọ a gba ha wọhọ omai re? Roro kpahe idhere esa nana. Orọ ọsosuọ, ma re mu usu kugbe oghẹrẹ ahwo kpobi te enọ i wo ugho vi omai hayo enọ i wo te omai hi. (Rom 15:7; 2Kọ 6:12, 13) Orọ avọ ivẹ, ma rẹ yọroma re ma gbe ru eware hayo ta eme nọ e rẹ dha amọfa eva ha. (Rom 14:13-15) Orọ urere, otẹrọnọ ohwo jọ o ru eva dha omai, ma sae rọvrẹe ababọ oke oraha. (Luk 17:3, 4; 23:34) Ma tẹ dawo utho ẹgba mai rọ aro kele Jesu evaọ eware nana, Jihova ọ te rọ udhedhẹ avọ okugbe ghale ukoko na soso.
RRI IVIDIO NA GBẸ HAE DAOMA JỌ EMAMỌ OHWO VI EPAỌ ANWẸDẸ! KẸSENA WHA VẸ KIYO ENỌ NANA: