Kọ Whọ be Ruẹ Oghẹrẹ nọ Ọghẹnẹ Ọ rrọ?

Kọ whọ be ruẹ iruo abọ Ọmemama na nọ who te rri ododo nọ o wo ekọlọ buobu, ehru nọ isi e vọ, ame nọ o bi hwẹ no ehru itho ze? Emama buobu nọ e wariẹ omai họ i bi dhesẹ oghẹrẹ nọ Jihova ọ rrọ via. (Rom 1:20) Nọ ma tẹ be hae rọ omoke jọ dhizu je roro kpahe eware nọ ma be ruẹ, ma rẹ ruẹ ogaga, uyoyou, areghẹ, ẹrẹreokie Ọghẹnẹ, gbe ọghoruo riẹ.—Ol 104:24.

Emama Ọghẹnẹ vẹ whọ be ruẹ kẹdẹ kẹdẹ? O tẹ make rọnọ whọ be rria ikpewho, whọ rẹ ruẹ evra gbe ire ghele. Nọ ma tẹ be hai muẹrohọ emama Jihova, u re ru nọ ma gbẹ ruawa ga hrọ họ, yọ ma rẹ gbẹ wọ ebẹbẹ mai họ uzou hu, ukpoye ma rẹ rẹroso Jihova inọ ọ te rẹrote omai bẹdẹ bẹdẹ. (Mt 6:25-32) Otẹrọnọ who yẹ emọ no, fiobọhọ kẹ ae riẹ oghẹrẹ nọ Jihova ọ rrọ. Epanọ ma wuhrẹ kpahe emama te, ere ma ti si kẹle Ọnọ ọ ma rai te re.—Ol 8:3, 4.

WHA RRI IVIDIO NA IGBUNU EMAMA I DHESẸ ORUARO ỌGHẸNẸ VIA—ELO GBE EKỌLỌ, KẸSENA WHA VẸ KIYO ENỌ NANA:

• Eme o re fiobọhọ kẹ omai ruẹ ekọlọ?

• Fikieme ma rẹ rọ ruẹ ekọlọ sa-sa evaọ oware ovo nọ who te rri ei no ofẹ sa-sa ze?

• Fikieme ma rẹ rọ ruẹ ekọlọ sa-sa evaọ ehru na?

• Ekọlọ iwoma vẹ whọ rẹ sae jọ emama nọ e kẹle uwou ra ruẹ?

• Fikieme u ro fo re ma nabe romatotọ rri emama nọ e wariẹ omai họ?