Eria Ekiakiẹ Rọkẹ Obe Ewuhrẹ Uzuazọ Oleleikristi gbe Usi Uwoma Ota Mai
AKPE 7-13
EWARE AGHAE NỌ E RRỌ EBAIBOL NA | JEMIS 3-5
“Dhesẹ Areghẹ nọ O No Obọ Ọghẹnẹ Ze”
Kọ “Areghẹ nọ O Nehru Ze” Ọ Be Jọ Uzuazọ Ra Ruiruo?
9 “Muhọ avọ ẹfuọ.” Re a jọ fuafo u dhesẹ nọ a kare epe gbe egbegbe orọnikọ evaọ okafe ọvo ho rekọ te obọ eva. Ebaibol na o dhesẹ areghẹ kugbe udu na, rekọ areghẹ nọ o no odhiwu ze ọ sae ruọ udu nọ iroro, isiuru, gbe ẹjiroro imuomu i gbeku hu. (Itẹ 2:10; Matiu 15:19, 20) Dede na, udu mai o tẹ rrọ fuafo—koyehọ, epanọ o lọhọ te kẹ ahwo-akpọ sebaẹgba—ma re ‘siobọno umuomu je ru ewoma.’ (Olezi 37:27; Itẹ 3:7) Kọ u gbe fo inọ ẹfuọ a fodẹ wọhọ okwakwa ọsosuọ areghẹ? Whaọ, ma gbẹ fo evaọ uruemu gbe abọ-ẹzi hi, ẹvẹ ma sai ro dhesẹ ekwakwa efa erọ areghẹ nọ o n’ehru ze na gbagba?
10 “Kẹsena udhedhẹ.” Areghẹ nọ o no odhiwu ze ọ rẹ wọ omai le udhedhẹ, onọ o rrọ ubi ẹzi Ọghẹnẹ. (Ahwo Galesha 5:22) Ma rẹ daoma whaha ẹraha ‘okugbe udhedhẹ’ nọ o ku ahwo Jihova gbe na. (Ahwo Ẹfisọs 4:3) Ma rẹ jẹ daoma zihe udhedhẹ ze evaọ okenọ a tẹ raha iẹe. Fikieme onana u je wuzou? Ebaibol na ọ ta nọ: “Wha jọ evaọ udhedhẹ, jọ Ọghẹnẹ uyoyou avọ udhedhẹ na o lele owhai ria.” (2 Ahwo Kọrint 13:11) Fikiere nọ ma be rria dhedhẹ na, Ọghẹnẹ udhedhẹ na ọ rẹ jọ kugbe omai. Oghẹrẹ nọ ma bi yeri kugbe ibe egegagọ u w’obọ kpahe usu mai kugbe Jihova. Ẹvẹ ma re ro dhesẹ nọ mai yọ enọ i bi ru udhedhẹ? Roro kpahe oriruo jọ.
Kọ “Areghẹ nọ O Nehru Ze” Ọ Be Jọ Uzuazọ Ra Ruiruo?
12 “Wo iroro.” Eme u dhesẹ re a wo iroro? Wọhọ epanọ ewena-isukulu e ta, o rrọ bẹbẹ re a fa ẹme Griki ọsosuọ nọ a fa “wo iroro” eva Jemis 3:17 na. Efefafa e fa riẹ no wọhọ “ewolẹ,” “ithihakọ,” gbe “ororokẹ.” Otofa gheghe ẹme Griki na họ “re a rehọ orọ omọfa.” Ẹvẹ ma sai ro dhesẹ nọ abọ nana ọrọ areghẹ nọ o n’ehru ze na o bi ruiruo evaọ oma mai?
Kọ “Areghẹ nọ O Nehru Ze” Ọ Be Jọ Uzuazọ Ra Ruiruo?
14 “Yoẹme vẹrẹ.” Ubiẹme Griki nọ a fa “yoẹme vẹrẹ” na a rẹ jọ oria ofa evaọ Ikereakere Griki Ileleikristi na duku ei hi. Wọhọ epanọ ọwena-isukulu jọ ọ ta, a rẹ rehọ ẹme nana “ta kpahe ewuhrẹ isoja.” Otofa riẹ họ “ohwo nọ a rẹ sae tẹzẹ vẹrẹ vẹrẹ” jegbe ọnọ o re “yoẹme.” Ohwo nọ areghẹ nọ o n’ehru ze ọ be kpọ o re yoẹme vẹrẹ vẹrẹ kẹ onọ Ikereakere na e ta. A rẹ riẹ ohwo na wọhọ ọnọ o re ru orọ udu riẹ hẹ a tẹ make rọ uzẹme na lahwe. Ukpoye, o re nwene vẹrẹ vẹrẹ ọ tẹ ruẹ imuẹro Ikereakere nọ i dhesẹ nọ ọ j’owọ thọ hayo o rri ẹme jọ thọ. Kọ ere amọfa a riẹ owhẹ?
“Vọ avọ Ohrọ gbe Emamọ Ibi”
15 “Vọ avọ ohrọ gbe emamọ ibi.” Ohrọ yọ abọ ologbo ọrọ areghẹ nọ o no ehru ze, keme a dhesẹ areghẹ na nnọ ọ ‘vọ avọ ohrọ.’ Muẹrohọ nọ a fodẹ “ohrọ” gbe “emamọ ibi” kugbe. Onana u fo, keme evaọ Ebaibol na, ohrọ họ ọdawẹ kẹ amọfa, ororokẹ nọ ọ rẹ mọ ibi uruemu ẹwo buobu. Obe jọ u dhesẹ ohrọ wọhọ “uweri kẹ eware iyoma nọ e be via kẹ omọfa re a jẹ daoma ru oware jọ kpahe iẹe.” Fikiere, orọnikọ areghẹ Ọghẹnẹ ọ rrọ kpikpimẹ, hayo oware nọ o rrọ uzou gheghe he. Ukpoye, o rrọ sasasa, n’udu ze, je wo ọdawẹ. Ẹvẹ ma sai ro dhesẹ nọ ma vọ avọ ohrọ?
Kọ “Areghẹ nọ O Nehru Ze” Ọ Be Jọ Uzuazọ Ra Ruiruo?
18 “O re fiabọ ọriẹwẹ.” Areghẹ Ọghẹnẹ ọ rẹ whaha omohẹriẹ uyẹ gbe omoya orẹwho. Areghẹ otiọye na ọ tẹ be kpọ omai, ma rẹ daoma si iroro edhesẹ ọriẹwẹ kpobi no udu mai. (Jemis 2:9) Ma re rri amọfa ovao ho fiki isukulu nọ a nya, ugho nọ a wo, hayo ọkwa rai evaọ ukoko na; yọ ma re rri ibe ọgegagọ mai vo ho, makọ epanọ ma roro nọ a kpotọ te kẹhẹ. Otẹrọnọ Jihova o ru ahwo itieye na wo uyoyou riẹ, ma re rri rai wọhọ enọ i te kẹ uyoyou mai re.
19 ‘O re fiabọ eviẹhọ.’ Ubiẹme Griki kẹ “eviẹhọ” a sae rehọ iẹe dhesẹ “ohwo nọ ọ rẹ zaro.” Evaọ oke anwae, ahwo Griki gbe Rom nọ e be zaro a rẹ rọ ikpe ilogbo ruru ovao. Fikiere, ubiẹme Griki kẹ “eviẹhọ” u dhesẹ ohwo nọ o bi ru ẹghẹ, hayo ọnọ ọ be rọ oma ru omọfa evaọ arozaha. Abọ nana ọrọ areghẹ Ọghẹnẹ na ọ rẹ kpọ omai orọnikọ evaọ epanọ ma re yeri kugbe ibe egegagọ ọvo ho rekọ te epanọ ma re roro kpahe ae.
Romatotọ Kiẹ Eware Aghae Via
Oruvẹ no Ebe-Ovuẹ ọ Jemis gbe Pita Ze
4:5—Oria Ebaibol vẹ Jemis ọ wariẹ ẹme riẹ? Orọnikọ oria Ebaibol jọ dẹẹ oye Jemis ọ wariẹ ẹme riẹ hẹ. Rekọ o sae jọnọ a rehọ eme nana nọ Ọghẹnẹ ọ kẹ riẹ ẹgba kere na no eria jọ Ebaibol na ze, eria wọhọ Emuhọ 6:5; 8:21; Itẹ 21:10; gbe Ahwo Galesha 5:17.
Ẹrọwọ O Re Ru Omai Wo Odiri Gbe Oma-Olẹ
8 O rọ uzioraha re ma t’ẹme mukpahe ibe ọnọ ọ rọwo. (Jemis 4:11, 12) Ghele na ahwo jọ a rẹ fo ibe Ileleikristi, ẹsejọhọ fiki uruemu ukiẹrẹe obọ rai hayo fikinọ a gwọlọ kpare oma rai kpehru ẹkwoma amọfa nọ a re hrẹ kpotọ. (Olezi 50:20; Itẹ 3:29) Ubiẹme Griki nọ a fa ‘ta mukpahe’ na u dhesẹ egrẹ gbe ẹme nọ a fi orọ obọ ohwo họ hayo ota o bọwo. Onana o tẹ rọ oniọvo nọ a re guẹdhọ kpe. Ẹvẹ onana o rọ rọ ‘ẹmeọta mukpahe gbe ẹdhoguo uzi Ọghẹnẹ’? Whaọ, ikere-ebe gbe otu Farisi na a ‘rọ ẹghẹ fi ujaje Ọghẹnẹ họ akotọ’ a tẹ be rehọ ute obọ rai guẹdhọ. (Mak 7:1-13) Epọvo na, ma te brukpe oniọvo ọnọ Jihova o brukpe he, kọ o gbẹ jọ nọ ma bi ‘gu uzi Ọghẹnẹ ẹdhọ’ jẹ be rehọ emuemu dhesẹ nọ uzi na o kẹre te he? Yọ ma tẹ be fo oniọvo mai thọthọ, yọ ma bi ru uzi uyoyou gba ha.—Ahwo Rom 13:8-10.
Ẹme nọ A re Ru Ovavo
Kọ Ọghẹnẹ Ọ Gwọlọ nọ Ma Feva Izieraha Mai?
Ono U Fo nọ Ma rẹ Feva Izieraha Mai Kẹ?
Nọ ohwo ọ tẹ thuzi mukpahe Ọghẹnẹ, Ọghẹnẹ ọ kẹ ohwo-akpọ udu nọ ọ rẹ rọ rehọ izieraha itieye na rọvrẹ ohwo na ha; Ọghẹnẹ ọvo ọ rẹ rehọ izieraha itieye na rọvrẹ ohwo. Ebaibol na ọ ta kẹ omai vevẹ nọ: “Nọ ma tẹ feva izieraha mai, Ọghẹnẹ o re ru ẹme riẹ gba o te je kiẹrẹe, fikiere ọ te rọ izieraha mai rọvrẹ omai je ru omai fo no iruo imuomu kpobi.” (1 Jọn 1:9) Nọ o rrọ ere na, ono u fo nọ ma rẹ feva izieraha mai kẹ?
Nọ orọnọ Ọghẹnẹ ọvo ọ rẹ rehọ izieraha rọvrẹ na, ọye ọvo ma rẹ feva izieraha mai kẹ. Ere Devidi o ru, wọhọ epanọ ma ta no vẹre na. Kọ eme ohwo o re ru re a sae rọ izieraha riẹ rọvrẹ riẹ? Ebaibol na ọ ta nọ: “Fikiere, wha kurẹriẹ, wha nwene idhere rai re a sai voro izieraha rai no, re ezi omosasọ o ruẹsi no obọ Jihova omariẹ ze te owhai.” (Iruẹru 3:19) Ere o rrọ, orọnikọ nọ ohwo o te vuhumu nọ ọ thuzi jẹ feva no a vẹ nwane rọvrẹ riẹ hẹ, rekọ u re je no ohwo na eva ze nọ o re kurẹriẹ je siobọno oware uyoma na. Onana o sae jọ bẹbẹ ẹsejọ. Rekọ oware jọ o riẹ nọ o sai fiobọhọ kẹ omai ru ei.
Kareghẹhọ eme Jemis olele na nọ ma ta kpahe vẹre no na: “Wha feva izieraha rai via kẹ ohwohwo jẹ lẹ kẹ ohwohwo, re a ruẹsi siwi owhai.” Jemis o te je fibae nọ: “Olẹ ayare-ọgaga ohwo okiẹrẹe u re ru iruo gaga.” (Jemis 5:16) O sae jọnọ ‘ohwo okiẹrẹe’ nọ Jemis ọ ta kpahe na yọ omọvo jọ evaọ udevie “ekpako ukoko” nọ ọ fodẹ evaọ owọ avọ 14 na. Evaọ ukoko Ileleikristi na, ma wo “ekpako” nọ a ro mu nọ i re fiobọhọ kẹ enọ e gwọlọ erọvrẹ Ọghẹnẹ. Ọkpako ukoko ọvuọvo ọ sae rehọ izieraha ohwo rọvrẹ riẹ hẹ, keme ohwo-akpọ ọvo o wo udu nọ ọ rẹ rọ rehọ izi nọ a thọ wọso Ọghẹnẹ rọvrẹ ohwo ho. Rekọ, ekpako ukoko a te ahwo nọ a rẹ whọku jẹ kpọ ohwo nọ ọ thuzi ulogbo họ, je fiobọhọ kẹ ohwo na vuhu epanọ uzi nọ ọ thọ na u yoma te gbe epanọ u ro fo nọ o re kurẹriẹ.—Ahwo Galesha 6:1.
Fikieme Ma rẹ rọ Feva Izieraha Mai?
Makọ oghẹrẹ nọ uzioraha na o rrọ kẹhẹ, ohwo nọ ọ thuzi na ọ raha usu riẹ kugbe Ọghẹnẹ gbe ahwo-akpọ. Fiki onana udu riẹ o sai brukpei hayo ọ sae ruawa. O rẹ via ere fiki obruoziẹ-iroro nọ Ọghẹnẹ ọ kẹ omai ahwo-akpọ. (Ahwo Rom 2:14, 15) Nọ o tẹ via ere, eme ma re ru?
Ma tẹ wariẹ rri obe Jemis na, ma rẹ ruẹ eme uduotahawọ nana: “Kọ ohwo jọ ọ riẹ nọ ọ be mọ evaọ udevie rai? Jọ o se ekpako ukoko na, re a lẹ kẹe, jẹ rọ ewhri wholo iei evaọ odẹ Jihova. Olẹ nọ a rọ ẹrọwọ lẹ u ve ti ru ọnọ ọ be mọ na ga, Jihova ọ vẹ te kpare iẹe kpama. Ofariẹ, otẹrọnọ ọ raha izi, a te rọvrẹ riẹ.”—Jemis 5:14, 15.
A wariẹ jọ etenẹ na ta kẹ ekpako ukoko nọ a fiobọhọ kẹ uthuru na. Evaọ oghẹrẹ vẹ? Orọnikọ a rẹ gaviezọ nọ ohwo nọ ọ raha uzi ọ tẹ be feva ọvo ho. Ukpoye, nọ orọnọ usu ohwo na kugbe Ọghẹnẹ o raha na, a re ru oware jọ ro fiobọhọ kẹe re oma riẹ o ga. Jemis ọ fodẹ eware ivẹ nọ a rẹ sai ru.
Orọ ọsosuọ, a rẹ “rọ ewhri wholo” ohwo na. Koyehọ Ebaibol na nọ a re ro fiobọhọ kẹ ohwo na. Pọl ukọ na ọ ta nọ “ẹme Ọghẹnẹ ọ rrọ uzuazọ, o te je wo ẹgba, . . . yọ o rẹ sae kiẹ iroro gbe ẹjiroro udu na via,” ọ vẹ jẹ nya thabọ te obotọ iroro gbe udu na. (Ahwo Hibru 4:12) Ekpako na a rẹ sae rehọ Ebaibol na fiobọhọ kẹ ọnọ ọ thuzi na ruẹ oware nọ o whariẹ ze nọ ọ rọ thuzi na gbe oware nọ o re ru re ọ ruẹrẹ usu riẹ họ kugbe Jihova.
Kẹsena a vẹ lẹ ‘olẹ ẹrọwọ’ kugbe ohwo na. Dede nọ elẹ ekpako na i re nwene ẹdhoguo okiẹrẹe Ọghẹnẹ hẹ, Ọghẹnẹ nọ ọ rẹ rehọ izieraha vrẹ fiki idhe ẹtanigbo Kristi na o re rri elẹ itieye na ghaghae. (1 Jọn 2:2) Ọghẹnẹ o re fiobọhọ kẹ ohwo kpobi nọ ọ thuzi nọ u no eva ze nọ o re kurẹriẹ je ru “eware nọ i re dhesẹ ekurẹriẹ.”—Iruẹru Ikọ 26:20.
Ugogo ẹjiroro nọ ma rẹ rọ feva uzi nọ ma thọ wọso Ọghẹnẹ hayo ohwo-akpọ họ, re ma wo emamọ usu kugbe Ọghẹnẹ. Jesu ọ ta nọ re ma sae gọ Ọghẹnẹ avọ emamọ obruoziẹ-iroro, o gwọlọ nọ ma rẹ kake ruẹrẹhọ kugbe inievo mai je ru udhedhẹ kugbe ai. (Matiu 5:23, 24) Itẹ 28:13 o ta nọ: “Ọnọ ọ be ko izieraha riẹ dhere ọ te kparobọ họ, rekọ ọnọ ọ feva je siobọno ai a te re iẹe ohrọ.” Nọ ma tẹ romakpotọ evaọ aro Jihova Ọghẹnẹ jẹ yare iẹe rọkẹ erọvrẹ, ọ rẹ re ohrọ mai jẹ kpare omai kpehru nọ oke u te te.—1 Pita 5:6.
[Ẹme-obotọ]
Ahwo jọ a rẹ ta nọ eme Jesu nọ e rrọ Jọn 20:22, 23 na u dhesẹ nọ ohwo-akpọ jọ a rẹ feva izieraha kẹ. Re whọ ruẹ eme efa nọ a ta kpahe ẹme nana, rri Uwou-Eroro Ane 15, 1996, ẹwẹ 28-29.
AKPE 14-20
EWARE AGHAE NỌ E RRỌ EBAIBOL NA | 1 PITA 1-2
“Wha rẹ Jọ Ọrẹri Hrọ”
Ẹtanigbo na “Okẹ Ogbagba” nọ U No Obọ Ọsẹ na Ze
5 Ẹvẹ ma sai ro dhesẹ nọ ma you odẹ Ọghẹnẹ? Uruemu ma re ro dhesẹ onana via. Jihova ọ gwọlọ nọ ma rẹ jọ ọrẹri hayo fuafo. (Se 1 Pita 1:15, 16.) Onana u dhesẹ nọ Jihova ọvo ma rẹ gọ yọ ma rẹ rọ udu mai kpobi yoẹme kẹe. Makọ evaọ okenọ ma tẹ rrọ otọ ukpokpoma, ma rẹ daoma kpobi ruẹ nọ ma ru lele ehri-izi gbe izi ikiẹrẹe riẹ. Ma te bi yeri uzuazọ ẹrẹreokie, yọ ma be kuvẹ re elo mai o lo, rọ ere wha orro se odẹ Ọghẹnẹ. (Mat. 5:14-16) Nọ ma rrọ ahwo ọrẹri na, ma rẹ rọ uzuazọ uyero mai dhesẹ nọ izi Jihova e rrọ wowoma gbe inọ oware nọ Setan ọ ta evaọ ọgbọ Idẹn na yọ ọrue. Oware o tẹ thọ omai obọ, wọhọ epanọ o rẹ via ẹsejọ na, u fo nọ o rẹ da omai kẹsena ma ve siobọno oghẹrẹ uruemu kpobi nọ o rẹ wha ekela se odẹ Ọghẹnẹ.—Ol. 79:9.
Epanọ Ma rẹ rọ Salọ Eware nọ Ma re Rri Hayo Se
6 Jihova ọ vuẹ omai nọ: “Wha rẹ jọ ọrẹri hrọ, keme mẹ ọrẹri.” (1 Pita 1:14-16; 2 Pita 3:11) Nọ iruẹru egagọ mai e tẹ rrọ fuafo ọvo Jihova ọ rẹ rọ jẹ ae rehọ. (Iziewariẹ 15:21) Egagọ mai e rẹ sae fo ho nọ ma te bi ru eware nọ Jihova o mukpahe, wọhọ oriruo nọ ma te bi gbe-ọfariẹ, ru ozighi, hayo duobọhọ iruẹru imizi. (Ahwo Rom 6:12-14; 8:13) Eva e rẹ jẹ dha Jihova re nọ ma tẹ be hai rri ughe eware itieye na rọ sasa oma. Onana o rẹ sai gbe egagọ mai ku je ru nọ Jihova ọ gbẹ rọ jẹ ai rehọ họ. O rẹ sae jẹ raha usu mai kugbe Jihova riẹriẹriẹ.
Digging for Spiritual Gems
Oruvẹ no Ebe-Ovuẹ ọ Jemis gbe Pita Ze
1:10-12. O jọ ikọ-odhiwu oja re a wo otoriẹ eware ididi nọ i no obọ Ọghẹnẹ ze enọ eruẹaro anwae Ọghẹnẹ a kere kpahe ukoko Ileleikristi nọ a wholo na. Rekọ okenọ Jihova ọ rẹriẹ ovao ku ukoko na no ọvo eware nana i ro vẹ. (Ẹf. 3:10) U re woma re ma lele oriruo ikọ-odhiwu na re ma daoma kiẹ “eware ididi Ọghẹnẹ” via.—1 Kọr. 2:10.
it-2 565 ¶3
Ọsẹro
Ọsẹro nọ Ọ Mai Kpehru Na. Eme Aizaya 53:6 nọ a jọ obe 1 Pita 2:25 wariẹ na i kiekpahe ahwo nọ a “wọhọ igodẹ nọ i vru.” Pita ọ tẹ jẹ ta nọ: “Rekọ enẹna wha zihe bru othuru-igodẹ gbe ọsẹro uzuazọ rai ze no.” Ababọ avro, Jihova Ọghẹnẹ eme nana i kiekpahe, keme ahwo nọ Pita o kere eme nana se na a ri vru siọ Kristi Jesu ba ha, ukpoye, ẹkwoma riẹ a ro zihe bru Jihova Ọghẹnẹ ze, ọnọ ọ rrọ Othuru-Igodẹ Ologbo ahwo riẹ. (Ol 23:1; 80:1; Jer 23:3; Iz 34:12) Jihova ọ tẹ jẹ rrọ ọsẹro, ọnọ ọ rẹ kiẹ eware riwi. (Ol 17:3) O sae jọnọ eware nọ Ọghẹnẹ ọ rẹ kiẹ riwi (evaọ Griki, e·pi·sko·peʹ) na i wobọ kugbe ẹdhoguo obrukpe riẹ, wọhọ epanọ o via kẹ ahwo nọ a jọ Jerusalẹm evaọ ikpe-udhusoi ọsosuọ nọ a ro muẹrohọ oke nọ a rọ “kiẹ [ai] riwi hi [evaọ Griki, e·pi·sko·pesʹ]” na. (Luk 19:44) Hayo onana o sae wha erere ze, wọhọ epanọ o te via kẹ enọ e be kẹ Ọghẹnẹ oruaro evaọ ẹdẹ “ọkiẹriwo riẹ [evaọ Griki, e·pi·sko·pesʹ]” na.—1Pi 2:12.
AKPE 21-27
EWARE AGHAE NỌ E RRỌ EBAIBOL NA | 1 PITA 3-5
“Urere Eware Kpobi O Kẹle No”
‘Wha Hae Lẹ Ẹsikpobi’
ỌZAE jọ nọ ọ jẹ hai ru iruo aso ọ ta nọ: “Oke u te muhọ erie no, ẹsiẹe owezẹ o rẹ mae gwọlọ su ohwo.” Ẹsejọhọ amọfa nọ a rrọ iruo aso a te rọwo kugbe ẹme ọzae nana. Mai Ileleikristi nẹnẹ ma rrọ oke utiona keme akpọ Setan nana o bi te ekuhọ no. (Rom 13:12) U ti yoma gaga nọ ma te kie ruọ owezẹ evaọ oke urere nana nọ ma rrọ na. Fikiere u wuzou gaga re ma ru lele ohrẹ Ebaibol nọ o ta nọ ma ‘jaja aro vi jẹ hae lẹ’ ẹsikpobi na.—1 Pita 4:7.
w99 4/15 22 ¶3
Epanọ Ma Sai ro Vuhu Eware nọ E rẹ Wha Elọhoma Ze je Fi Ai Kparobọ
Orọ urere, fi eme uduotahawọ nọ Pita ukọ na ọ ta na họ iroro, inọ: “Urere eware kpobi o kẹle no. Fikiere, wha wo iroro nọ e gba, jẹ jaja aro vi evaọ abọ olẹ. Maero, wha wo uyoyou ogaga kẹ ohwohwo, keme uyoyou u re ruru izieraha buobu.” (1 Pita 4:7, 8) O rrọ lọlọhọ gaga re ma kuvẹ re ethobọ amọfa gbe erọ omobọ mai i ru omai zoruẹ. Setan ọ riẹ nọ mai ahwo-akpọ ma wo elọhoma itieye na. Fiki oyena, ọ rẹ gwọlọ fi ohẹriẹ họ udevie mai re ọ sae rọ ere fi omai kparobọ. Fikiere nọ amọfa a te ru omai thọ, o gwọlọ nọ uyoyou ogaga nọ ma wo kẹ ae o wọ omai rọvrẹ rai no eva ze, re ma gbẹ “kẹ Ẹdhọ uvẹ hẹ.”—Ahwo Ẹfisọs 4:25-27.
U Wuzou Gaga re Ma Hai Dede Amọfa Rehọ!
2 Ohrẹ jọ nọ Pita ọ kẹ ibe Ileleikristi riẹ họ: “Wha hai dede ohwohwo rehọ.” (1 Pita 4:9) Ẹme Griki nọ a fa “ọrara-odederehọ” na u dhesẹ “uyoyou nọ a re dhesẹ hayo ewoma nọ a re ru kẹ erara.” Rekọ muẹrohọ nọ Pita ọ ta kẹ ibe Ileleikristi riẹ nọ a hai dede “ohwohwo” rehọ, koyehọ inievo rai nọ a riẹ jẹ be hai kuomagbe no vẹre. Ẹvẹ u ti ro fiobọhọ kẹ ae nọ a tẹ be hai dede ohwohwo rehọ?
3 U ti ru ai sikẹle ohwohwo ziezi. Roro kpahe onana. Kọ ohwo jọ o zizie owhẹ kpohọ uwou riẹ no ẹdẹjọ? Kọ oke nọ wha raha kugbe ẹdẹ yena, u gbe ru eva were owhẹ? Kọ ẹdẹ nọ who zizie inievo jọ evaọ ukoko ra, onana u gbe ru usu rai kpekpe vi epaọ anwẹdẹ? Ma tẹ be hai zizie inievo na ziọ uwou mai, o te kẹ omai uvẹ nọ ma te rọ riẹ ae vi epaọ anwẹdẹ. O gwọlọ nọ Ileleikristi ikpe-udhusoi ọsosuọ na a re si kẹle ohwohwo ziezi nọ eware i je dhe eyeyoma na. Epọvo na o gwọlọ nọ Ileleikristi a re ru re evaọ “edẹ urere” nana.—2 Tim. 3:1.
Romatotọ Kiẹ Eware Aghae Via
Enọ Ahwo Nọ A s’Ebe
Ebaibol na ọ ta nọ Jesu ọ “vuẹ izi nọ e rọ uwou-odi ovuẹ.” (1 Pita 3:19) Eme onana u dhesẹ?
▪ Pita ukọ na ọ ta nọ izi hayo ikọ-odhiwu nana họ, “enọ e kezọ oke ọsosuọ họ, nọ Ọghẹnẹ o thihakọ hẹrẹ eva edẹ Noa.” (1 Pita 3:20) O rrọ vevẹ, Pita ọ jẹ ta kpahe ikọ-odhiwu nọ i kuomagbe Setan wọso Ọghẹnẹ. Jud ọ ta kpahe ikọ-odhiwu nọ “e yọre ọkwa rai hi,” inọ Ọghẹnẹ “ọ rehọ egbregba ebẹdẹ bẹdẹ kare [ae] fihọ eva edidi obiebi bọ ẹdẹ ologbo oziẹobro na.”—Jud 6.
Oghẹrẹ vẹ ikọ-odhiwu a rọ ghẹmeeyo evaọ edẹ Noa? Taure Owhe Ologbo na o te ti ku, ikọ-odhiwu nana a nwene oma ruọ ahwo-akpọ, oware nọ Ọghẹnẹ ọ jiroro riẹ kẹ ae he. (Emu. 6:2, 4) U te no ere no, a je lele eyae wezẹ, onọ o rrọ oware aghọ. Ọghẹnẹ ọ ma ikọ-odhiwu re a lele eyae wezẹ hẹ. (Emu. 5:2) Ọghẹnẹ ọ te raha ikọ-odhiwu nana nọ e ghẹmeeyo na evaọ oke nọ o fihọ. Rekọ wọhọ epanọ Jud ọ ta, obọnana a rrọ “eva edidi obiebi,” koyehọ oghẹrẹ nọ a gbẹ sai ro wo usu ovuovo kugbe Ọghẹnẹ hẹ.
Oke vẹ gbe oghẹrẹ vẹ Jesu ọ rọ vuẹ “izi nọ e rọ uwou-odi” na ovuẹ? Pita o kere nọ onana o via okenọ a kpare Jesu no uwhu ze “eva ẹzi.” (1 Pita 3:18, 19) Muẹrohọ onana re, Pita ọ ta nọ Jesu ọ ‘vuẹ ovuẹ,’ onana u dhesẹ nọ Jesu ọ vuẹ ovuẹ na no taure Pita o te ti kere obe Pita ọsosuọ. Fikiere, o wọhọ nọ okenọ a kpare Jesu no uwhu ze no o ro whowho ovuẹ ọraha nọ o ti te ikọ-odhiwu aghẹmeeyo na. O jọ ovuẹ ẹruore he, rekọ orọ ẹdhoguo ọraha kufiẹ. (Jona 1:1, 2) Jesu o kru ẹrọwọ riẹ jẹ dadamu usu riẹ kugbe Ọghẹnẹ bọo oke uwhu, Ọghẹnẹ ọ tẹ jẹ kpare iẹe no uwhu ze no, onọ u dhesẹ nọ Setan o wo ogaga vi ei hi, fikiere o wo udu nọ ọ sai ro whowho ovuẹ obrukpe otiọye na.—Jọn 14:30; 16:8-11.
Evaọ obaro, Jesu ọ te gba Setan avọ ikọ-odhiwu aghẹmeeyo yena o ve ti gbolo ae fihọ ọgọdọ nọ o wo oba ha na. (Luk 8:30, 31; Evia. 20:1-3) Taure oke yena u te ti te, ikọ-odhiwu nọ e ghẹmeeyo na a rrọ evaọ ebi ọlala, koyehọ oghẹrẹ nọ a gbẹ sae ro wo usu ovuovo kugbe Ọghẹnẹ hẹ. Avro ọ riẹ hẹ, a te raha ae kufiẹ riẹriẹriẹ.—Evia. 20:7-10.
Oruvẹ no Ebe-Ovuẹ ọ Jemis gbe Pita Ze
4:6—Amono họ “otu nọ o whu no,” enọ a “whowho usiuwoma na” kẹ? Enana họ ‘enọ i whu no evaọ izieraha rai,’ hayo enọ e riẹ Ọghẹnẹ hẹ taure a te ti yo emamọ usi na. (Ẹf. 2:1) Rekọ nọ a fi ẹrọwọ họ emamọ usi na no, a te “zihe ruọ [ahwo] ekpokpọ” evaọ abọ-ẹzi.
AKPE 28–AKPEGBỌVO 3
EWARE AGHAE NỌ E RRỌ EBAIBOL NA | 2 PITA 1-3
“Wha Wo Ẹdẹ Ọzino Jihova Họ Iroro”
Jihova O Ti “Bruoziẹ”
11 Dede na, oghẹrẹ otoriẹ vẹ u fo nọ ma re wo kpahe uduotahawọ Jesu na inọ Jihova o ti bruoziẹ hayo kioja idibo riẹ “vẹrẹ”? Ẹme Ọghẹnẹ ọ ta inọ, dede nọ “[Jihova] o re thihakọ krẹkri,” ọ te kioja ahwo riẹ nọ oke na u te te. (Luk 18:7, 8; 2 Pita 3:9, 10) Evaọ oke Noa nọ Ẹvo ologbo na o ro ku, o raha oke re ahwo omuomu na a te whu hu. Epọvo na o jọ evaọ oke Lọt, nọ oso-erae ọ rrọ no odhiwu ze, irumuomu na a whu. Jesu ọ ta nọ: “Ere o rẹ te jọ ẹdẹ nọ a rẹ te rehọ Ọmọ ohwo via re.” (Luk 17:27-30) Epọvo na re, “idudhe na ọraha” o ti ro te ahwo omuomu. (1 Ahwo Tẹsalonika 5:2, 3) Evaọ uzẹme, ma rẹ sai fi eva kpobi họ inọ Jihova ọ te kuvẹ kẹ akpọ Setan re ọ rehọ ẹdẹ ọvo vrẹ epanọ uvi-oziẹ o gwọlọ họ.
“Ẹdẹ Ologbo ỌNOWO Na Ọ Kẹle I No”
18 Agbẹta nọ Pita ukọ na ọ rọ hrẹ omai nọ ma “rẹro ẹtha ẹdẹ Ọghẹnẹ vẹrẹ vẹrẹ” na! Ẹvẹ ma sai ro ru onana? Edhere jọ nọ ma sai ro ru ere họ, ẹkwoma “uzuazọ ẹfuọ gbe orọ Ọghẹnẹ” nọ ma rẹ yọrọ. (2 Pita 3:11, 12) Nọ ma tẹ be hae jọ owhreze evaọ iruẹru itieye na, u ti fi obọ họ kẹ omai rọ ọwhọ rẹro ẹtha “ẹdẹ ỌNOWO na.” Ẹme Griki nọ a fa “rẹro” na u dhesẹ epanọ a re “ru oware vẹrẹ.” Eva uzẹme, ma wo ẹgba nọ ma sai ro ru ẹdẹ Jihova re o te vẹrẹ hẹ. Ghele na, nọ ma be hẹrẹ ẹdẹ yena na, oke na o te dhẹ vẹrẹ vẹrẹ evaọ aro mai nọ ma tẹ rrọ owhreze evaọ iruo Ọghẹnẹ.—1 Ahwo Kọrint 15:58.
Romatotọ Kiẹ Eware Aghae Via
Oruvẹ no Ebe-Ovuẹ ọ Jemis gbe Pita Ze
1:19—Ono họ “esi ohiohiẹ” na, oke vẹ ọ rọ va ze, kọ ẹvẹ ma rọ riẹ inọ ọ va ze no? “Esi ohiohiẹ” na họ Jesu Kristi evaọ okenọ a rehọ iẹe mu ovie no. (Evia. 22:16) Evaọ 1914, Jesu ọ jọ iraro emama kpobi va ze wọhọ Ovie Mesaya na, onọ u dhesẹ inọ ẹdẹ ọkpokpọ o te no. Ẹrẹriẹ na o jọ ẹmẹvo orọ oruaro gbe ogaga Uvie Jesu, onọ u dhesẹ inọ a rẹ rẹroso ẹme nọ Ọghẹnẹ ọ ta. Ezọgaviẹ kẹ ẹme yena o rẹ k’omai otoriẹ, onọ ma rẹ rọ riẹ inọ Esi Ohiohiẹ na ọ va ze no.
Oruvẹ no Ebe-Ovuẹ ọ Jemis gbe Pita Ze
2:4—Eme họ “ẹri-uye” nọ a jọ etenẹ fodẹ na, kọ oke vẹ a ro gbolo ikọ-odhiwu iyoma na fihọ iẹe? “Ẹri-uye” yọ oria nọ o wọhọ uwou-odi nọ a ti fi ikọ-odhiwu iyoma na ọvo họ, orọnikọ ahwo-akpọ họ. O rrọ uyero nọ o kare otoriẹ orọ ẹjiroro Ọghẹnẹ. Enọ e rrọ Tatarọs a wo ẹruore he. Ọghẹnẹ o fi ikọ-odhiwu aghẹmeeyo na họ uyero nana evaọ oke Noa, yọ uyero utioye na ọvo a te jọ bẹsenọ a ti ro kpe ai.