Eme Whọ rẹ Sai Wuhrẹ Mi Inievo nọ I Kruga Ziezi Evaọ Ukoko Na?

Ma rẹ jọ ikoko sa-sa ruẹ inievo-emezae gbe erọ emetẹ nọ e kpako no nọ e gọ Jihova te ikpe buobu no. Yọ ma sai wuhrẹ oghẹrẹ nọ ma re ro fievahọ Jihova mi inievo nana. Ma sae nọ ae kpahe eware nọ e via no evaọ ukoko Jihova gbe epanọ Jihova o ro fiobọhọ kẹ ae fi ebẹbẹ nọ i te rai kparobọ. Ma sai tube zizie inievo nana jọ re a kuomagbe omai evaọ Egagọ Uviuwou mai, re ma nọ ae kpahe eware jọ nọ a rọ ẹro ruẹ no evaọ uzuazọ.

Otẹrọnọ whẹ yọ oniọvo nọ ọ kpako no evaọ ukoko na, daoma gbiku eware nọ whọ rọ ẹro ruẹ no kẹ izoge nọ e rrọ ukoko na. Jekọp avọ Josẹf a gbiku eware nọ a rọ ẹro ruẹ no kẹ emọ rai. (Emu 48:21, 22; 50:24, 25) Uwhremu na, Jihova ọ ta kẹ enọ i wuzou uviuwou inọ a wuhrẹ emọ rai kpahe iruo igbunu riẹ. (Izi 4:9, 10; Ol 78:4-7) Evaọ oke mai nana, u fo nọ esẹgbini gbe amọfa evaọ ukoko na a hai gbiku eware igbunu nọ a rọ ẹro ruẹ nọ Jihova o ru no evaọ ukoko na kẹ izoge na.

WHA RRI IVIDIO NA A YỌRỌ OKUGBE EVAỌ OTỌ AWHAHA, KẸSENA WHA VẸ KIYO ENỌ NANA:

• Oghẹrẹ vẹ uwou ogha nọ o rrọ obọ Austria o ro fiobọhọ kẹ inievo mai nọ e rrọ orẹwho nọ a jo fi awhaha họ iruo mai?

• Ẹvẹ inievo mai nọ e rrọ erẹwho yena a ro kru ẹrọwọ rai evaọ oke ẹbẹbẹ nana?

• Fikieme iwhowho-uvie buobu evaọ orẹwho Romania a rọ hẹriẹ oma no ukoko Jihova, kọ oghẹrẹ vẹ a ro zihe ze?

• Oghẹrẹ vẹ iku inievo nana o rọ bọ ẹrọwọ ra ga no?