Wuhrẹ Mi Iwhowho-Uvie nọ E Riẹ Usiuwoma Ẹta Ziezi

Iwhowho-uvie nọ e riẹ usiuwoma ẹta ziezi evaọ ukoko na a rrọ ghaghae kẹ omai. Inievo nana jọ a talamu egagọ Jihova no anwọ ikpe buobu ze. Efa jọ a rọ ẹmẹrera wo onaa usiuwoma ota ziezi no. A ruẹ epanọ Jesu ọ be rọ kpọ ukoko Ileleikristi evaọ edẹ urere na evaọ oghẹrẹ nọ a be rọ ta usiuwoma na kẹre haro je wuhrẹ amọfa re a zihe ruọ ilele Jesu. (Mat. 28:19, 20) Fikinọ a bi w’obọ evaọ usiuwoma ota na, Jihova ọ kẹ rai “ogaga nọ u vi ogaga” no nọ a be sai ro thihakọ ebẹbẹ gbe edawọ. (2 Kọr. 4:7) Eware buobu e vọ riẹ nọ ma re wuhrẹ mi inievo nana nọ i wo onaa ziezi na. Nọ uvẹ u te rovie fihọ, eva e rẹ were ae re a wuhrẹ amọfa eware nọ a riẹ. (Ol. 71:18) Fikiere, joma hai bigba ae re ma rọ ere wuhrẹ mi ae. Ẹvẹ ma sai ro ru ere?

Evaọ Usiuwoma. Re ma sai ru uzẹme na te ahwo udu, o gwọlọ nọ a re wuhrẹ iwhowho-uvie ekpokpọ hayo enọ e riẹ usiuwoma ẹta tere he. Eware buobu e vọ riẹ nọ ma re wuhrẹ mi iwhowho-uvie nọ e riẹ usiuwoma ẹta ziezi nọ ma tẹ be gaviezọ je muẹrohọ oghẹrẹ nọ a be rọ ta usiuwoma. (Rri uzoẹme na “Gbe Wo Ajọwha kẹ Usiuwoma Ota Na,” edhe-ẹme avọ esa uzoẹme osese na “Fiobọhọ kẹ Inievo nọ I Wo Onaa Tere He” evaọ Uwou-Eroro Ava 15, 2015) Erere vẹ who wo no nọ who lele oniọvo nọ ọ riẹ usiuwoma ẹta ziezi kpohọ usiuwoma?

Kọ whọ gbẹ vuẹ oniọvo nọ o wo onaa ziezi inọ whọ gwọlọ lele ei kpohọ usiuwoma? Otẹrọnọ oma riẹ o gbẹ ga tere he, whọ sae wha ọmọ-uwuhrẹ Ebaibol ra kpohọ oria riẹ nyai wuhrẹ n’oke t’oke. Wha te wuhrẹ re no, nọe oware nọ o muẹrohọ gbe oria nọ whọ rẹ gbẹ jọ daoma.

Daoma Riẹ Inievo na Ziezi: Daoma riẹ inievo nọ e riẹ usiuwoma ẹta ziezi ẹkwoma oke nọ whọ rẹ raha kugbe ae. Zizie ọjọ ziọ egagọ uviuwou rai re wha jẹ nọe enọ. Otẹrọnọ ọ gbẹ be sai no uwou ze he, wha sae jọ obọ uwou riẹ ru egagọ uviuwou na. Wha nọe epanọ ọ rọ ziọ ukoko na. Eghale vẹ i te rie no? Ẹvi vẹ ọ ruẹ no evaọ ukoko rai? Eme ọ kẹ riẹ evawere no evaọ egagọ Jihova?

Whọ nwani roro nọ oware kpobi a riẹ eru hu, fikiere who rẹro vi epanọ o gwọlọ họ. Du ohwo duọ ọvuọ okẹ riẹ, yọ ere ọvona iwhowho-uvie nọ e riẹ usiuwoma ẹta ziezi nọ e kpako no a wo abọ nọ a be jọ daoma evaọ usiuwoma. (Rom. 12:6-8) Fikinọ ejọ rai e who no, o sae whae ze nọ a gbe kuomagbe omai kri tere he. O make rrọ ere na, ma rẹ sai wuhrẹ obọdẹ onaa mi ai fikinọ a rrọ ukoko Jihova kri no jẹ riẹ usiuwoma ẹta ziezi.