Oware nọ Who re Ru re Whọ Sae Rria Akpọ Ọkpokpọ

Ma jọ izoẹme nọ e vrẹ na ruẹ nọ Ọghẹnẹ ọ te raha uyero-akpọ omuomu nana no kẹle je si ebẹbẹ nọ e rrọ akpọ na no. Ma riẹ nọ Ọghẹnẹ o ti ru eware nana nọ ọ ta na gba. Ẹvẹ ma rọ riẹ? Ebaibol na ọ ta nọ:

“Akpọ na ọ be vrẹ.”—1 JỌN 2:17.

U mu omai ẹro nọ ahwo jọ a te zọ keme oria Ebaibol yena ọ ta re nọ:

“Ohwo nọ o bi ru oreva Ọghẹnẹ ọ rẹ jọ bẹdẹ bẹdẹ.”

Fikiere, re ohwo ọ sae zọ, o gwọlọ nọ o re ru oreva Ọghẹnẹ. Re ma sae riẹ oware nọ oreva Ọghẹnẹ o rrọ, o gwọlọ nọ ma rẹ kake riẹ Ọghẹnẹ.

RE OHWO Ọ SAE ZỌ, ‘O GWỌLỌ NỌ Ọ RẸ RIẸ’ ỌGHẸNẸ

Iwoho na: 1. Enọso jọ nọ ọ keria otọ ẹsipito gheghe fikinọ oma o rrọ riẹ no gbe epanọ iruo na e ga te. 2. Nọ ọ keria bi serihọ evaọ oria nọ a rẹ jọ re emu, ọ tẹ ruẹ ibe oruiruo riẹ jọ nọ o bi se emagazini avọ eva nọ e be were iẹe. 3. Ibe oruiruo riẹ na o te se oria Ebaibol jọ kẹe, jẹ kẹe ekade jw.org.

Jesu ọ ta nọ: “Re a wo uzuazọ ebẹdẹ bẹdẹ, o gwọlọ nọ a rẹ riẹ owhẹ, Ọghẹnẹ uzẹme ọvo na.” (Jọn 17:3) Re ohwo ọ sae zọ jẹ rria bẹdẹ bẹdẹ, ‘o gwọlọ nọ ọ rẹ riẹ’ Ọghẹnẹ. Onana u dhesẹ nọ orọnikọ whọ rẹ riẹ nọ Ọghẹnẹ ọ rrọ ọvo ho hayo wuhrẹ emeware jọ kpahe iẹe ọvo ho. O gwọlọ nọ ma rẹ jọ egbẹnyusu riẹ re. Nọ ma tẹ gwọlọ nọ usu mai kugbe ogbẹnyusu mai jọ o rẹ jọ kpekpekpe, ma rẹ raha oke kugbei ziezi. Ere ọvona o gwọlọ nọ ma re ru re otẹrọnọ ma gwọlọ nọ usu mai kugbe Ọghẹnẹ o rẹ jọ kpekpekpe. Joma ta kpahe eware jọ nọ ma wuhrẹ evaọ Ebaibol na nọ i fiobọhọ kẹ omai mu usu kugbe Ọghẹnẹ, jẹ be daoma ru re usu na o jọ gaga.

Eware nọ Ma Wuhrẹ Evaọ Ebaibol Na

Ma wuhrẹ nọ Ọghẹnẹ ọ gwọlọ nọ ma rria aparadase.

Nọ Ọghẹnẹ ọ ma Adamu avọ Ivi no, o te fi ae họ oria uwoma jọ nọ a re se ọgbọ Idẹn. Aimava na a jọ gbagba, yọ Ọghẹnẹ ọ kẹ rai oware kpobi nọ a gwọlọ re a sae wereva evaọ uzuazọ. O hae jọnọ a yoẹme kẹ Ọghẹnẹ re a jọ egbẹnyusu riẹ, a hae te rria bẹdẹ bẹdẹ. Rekọ a ghẹmeeyo kẹ Ọghẹnẹ.

Ma wuhrẹ kpahe oware nọ ma be rọ ruẹ uye enẹna.

Fikinọ Adamu o yoẹme kẹ Ọghẹnẹ hẹ, o ku uvẹ nọ ọyomariẹ gbe ahwo-akpọ kpobi a hae te rọ rria bẹdẹ bẹdẹ kufiẹ. Ebaibol na ọ ta nọ: “Wọhọ epanọ uzioraha o rọ ẹkwoma omọvo ruọ akpọ na, uwhu u je no uzioraha ze na, ere uwhu u ro te ahwo kpobi oma.” (Ahwo Rom 5: 12) Wọhọ epanọ ọmọ ọ rẹ sai wo oka nọ o rrọ oma oni hayo ọsẹ riẹ na, ere ọvona emọ Adamu kpobi a reuku uzioraha mi ei. Fiki onana, ma be who je whu.

Ma wuhrẹ kpahe oware nọ Ọghẹnẹ o ru ro fiobọhọ kẹ omai.

Ebaibol na ọ ta nọ: “Ọghẹnẹ o you akpọ na gaga te epanọ o ro siobọno Ọmọ ọvo riẹ, re ohwo kpobi nọ o fi ẹrọwọ họ iẹe o gbe whu hu rekọ o ve wo uzuazọ ebẹdẹ bẹdẹ.” (Jọn 3:16) Ọghẹnẹ o vi Jesu ziọ otọakpọ na re ọ rọ uzuazọ riẹ dhe idhe kẹ omai. Ọzae jọ nọ a re se Prabhakar nọ ọ rrọ ikpe udhone gbe ezeza ọ ta kpahe oghẹrẹ uyoyou nana nọ Ọghẹnẹ o dhesẹ na inọ: “Onana u gine dhesẹ nọ Jihovaa o you omẹ gaga. Uyoyou nana u ru nọ mẹ te sai ro wo uzuazọ ebẹdẹ bẹdẹ.”

Ma wuhrẹ kpahe epanọ ma sai ro dhesẹ nọ oware nọ Ọghẹnẹ o ru kẹ omai na o da omai ẹro.

Ebaibol na ọ ta nọ ma sai dhesẹ nọ oware nọ Ọghẹnẹ o ru kẹ omai o da omai ẹro nọ ma te bi “koko ijaje riẹ.” (1 Jọn 2:3) Fikinọ Jihova o you omai, ọ vuẹ omai oware nọ ma re ru enẹna re ma sai wo evawere. (Aizaya 48:17, 18, ẹme-oruvẹ) Ọghẹnẹ ọ gwọlọ nọ ma rẹ ruẹ uye he. Ọ ya eyaa kẹ omai inọ ma te koko ijaje riẹ, ma ti wo evawere enẹna jẹ rria bẹdẹ bẹdẹ evaọ obaro.

HAI SE EBAIBOL NA KẸSE KẸSE

Evaọ oke eriosehọ, enọso na o bi rri ehru nọ o se Ebaibol no. — Re whọ sae zọ ruọ akpọ ọkpokpọ na, u fo nọ whọ rẹ lẹ se Jihova re o fiobọhọ kẹ owhẹ, jẹ daoma ru oreva riẹ

Ma rẹ re emu ẹsikpobi re ma sae jọ uzuazọ. Rekọ Jesu ọ ta nọ: “Orọnikọ ẹkwoma ebrẹdi ọvo ohwo ọ rẹ rọ jọ uzuazọ họ, rekọ ẹkwoma ẹme kpobi nọ o bi no unu Jihova ze.”—Matiu 4:4.

Nẹnẹ na, ma rẹ ruẹ ẹme Jihova evaọ Ebaibol na. Nọ who te bi wuhrẹ Ebaibol na, whọ rẹ ruẹ oware nọ Ọghẹnẹ o ru kẹ ahwo-akpọ evaọ oke nọ u kpemu, oware nọ o bi ru enẹna, gbe oware nọ o ti ru evaọ obaro.

LẸ SE ỌGHẸNẸ RE O FIOBỌHỌ KẸ OWHẸ

Eme who re ru otẹrọnọ whọ gwọlọ koko izi Ọghẹnẹ rekọ o rrọ bẹbẹ kẹ owhẹ re whọ siọ eware nọ o mukpahe ba eru? Nọ whọ tẹ riẹ Ọghẹnẹ ziezi, onana o rẹ sai fiobọhọ kẹ owhẹ.

Joma ta kpahe oriruo aye jọ nọ a re se Sakura, nọ o je yere uzuazọ ọfariẹ-ogbe. Nọ ọ kaki mu Ebaibol na họ ewuhrẹ, o wuhrẹ kpahe uzi Ọghẹnẹ nọ o ta nọ: “Dhẹ siọ ọfariẹ-ogbe ba.” (1 Ahwo Kọrint 6:18) Sakura ọ tẹ lẹ se Ọghẹnẹ re o fiobọhọ kẹe, yọ ọ sai siobọno ekpehre uruemu na. Rekọ o nwane lọhọ kẹe he. Ọ ta nọ: “Ẹsikpobi nọ iroro ọfariẹ-ogbe ọ tẹ ruọ omẹ udu, mẹ rẹ lẹ se Jihova keme mẹ riẹ nọ mẹ ọvo mẹ sai ti fi odawọ nana kparobọ họ. Olẹ u fiobọhọ kẹ omẹ nọ me ro si kẹle Jihova vi epaọ ọsosuọ.” Wọhọ Sakura, ahwo buobu a be daoma re a riẹ Ọghẹnẹ. Yọ Ọghẹnẹ o bi gine fiobọhọ kẹ ahwo nana re a sai ru inwene nọ u fo je yeri uzuazọ nọ o rẹ were iẹe.—Ahwo Filipai 4:13.

Nọ whọ tẹ be daoma re whọ riẹ Ọghẹnẹ ziezi, Ọghẹnẹ ọ te ‘riẹ owhẹ re,’ kẹsena whọ vẹ te jọ ogbẹnyusu oyoyou riẹ. (Ahwo Galesha 4:9; Olezi 25:14) Whọ vẹ te rọ ere zọ ruọ akpọ ọkpokpọ nọ Ọghẹnẹ ọ ya eyaa riẹ na. Rekọ ẹvẹ akpọ ọkpokpọ na ọ te jọ? Ma te jọ uzoẹme nọ o rrọ aro na ta kpahe onọ nana.

a Jihova họ odẹ Ọghẹnẹ evaọ Ebaibol na.