Whọ Sae Salọ Emamọ Uzuazọ

Evaọ oware wọhọ ikpe idu esa gbe egba isoi (3,500) nọ i kpemu, Ọghẹnẹ ọ vuẹ idibo riẹ oware nọ u fo nọ a re ru re a sai yeri emamọ uzuazọ inọ: “Me fi uzuazọ gbe uwhu họ aro rai, eghale gbe eka na; wha rẹ salọ uzuazọ hrọ re wha ruẹse jọ uzuazọ, te owhai te emọ rai.”​—Iziewariẹ 30:19.

Re idibo Ọghẹnẹ yena a sai yeri emamọ uzuazọ, o gwọlọ nọ a rẹ salọ oware nọ u kiehọ. Ere ọvona o gwọlọ nọ ma rẹ salọ oware nọ u kiehọ nẹnẹ re. Ebaibol na ọ vuẹ omai oware nọ ma re ru re ma sai yeri emamọ uzuazọ inọ: “Ẹkwoma Jihova Ọghẹnẹ rai nọ wha re you, urru riẹ nọ wha rẹ gaviezọ kẹ.”​—Iziewariẹ 30:20.

ẸVẸ MA SAI RO YOU JIHOVA JẸ GAVIEZỌ KẸ URRU RIẸ?

WUHRẸ EBAIBOL NA: Re whọ sai you Jihova, o gwọlọ nọ whọ rẹ kaki wuhrẹ kpahe iẹe evaọ Ebaibol na. Nọ who bi wuhrẹ kpahe iẹe na, whọ te ruẹ nọ Ọghẹnẹ ọ rrọ yoyou, yọ ọ gwọlọ nọ eware i woma kẹ owhẹ. Ọ gwọlọ nọ whọ hae lẹ sei “keme ọ be daezọ [ra].” (1 Pita 5:7) Ebaibol na ọ ta nọ whọ tẹ daoma si kẹle Ọghẹnẹ, “o re ti si kẹle [owhẹ].”​—Jemis 4:8.

HAI RU EWARE NỌ WHO BI WUHRẸ: Re who dhesẹ nọ whọ be gaviezọ kẹ Ọghẹnẹ, o gwọlọ nọ who re ru lele ehrẹ riẹ nọ e rrọ Ebaibol na. Nọ who te ru ere, “eware e te riẹ nya kẹ owhẹ, who ve ti je ru eware avọ areghẹ.”​—Joshua 1:8.