EPANỌ MA SAE RỌ WHAHA OMUKPAHỌ

1 | Whaha Uruemu Ọriẹwẹ

Ebaibol na Ọ Ta Nọ:

“Ọghẹnẹ o wo ọriẹwẹ hẹ, rekọ evaọ orẹwho kpobi, ohwo nọ ọ be dhozọ riẹ je bi ru oware nọ u kiehọ ọ rẹ jẹe rehọ.”—IRUẸRU IKỌ 10:34, 35.

Oware nọ Onana U Dhesẹ:

Jihovaa Ọghẹnẹ ọ rẹ jẹ ohwo kpobi rehọ ghelọ orẹwho nọ o no ze, uyẹ riẹ, ovioma riẹ, hayo uruemu ẹwho riẹ. Oware nọ o re rri họ, oghẹrẹ ohwo nọ ma rrọ evaọ obeva. Ebaibol na ọ ta nọ “oware nọ ibiaro ohwo-akpọ e be ruẹ ọvo ọ rẹ ruẹ, rekọ Jihova ọ rẹ ruẹ obọ udu na.”—1 Samuẹle 16:7.

Oware nọ Whọ rẹ Sai Ru:

Dede nọ ma sae riẹ oware nọ o rrọ udu ohwo ho, ma sae rọ aro kele Ọghẹnẹ rri ohwo kpobi epọvo na ababọ ọriẹwẹ. Ukpenọ ma rẹ rọ oria nọ ohwo o no ze ro dhesẹ iẹe, ma rẹ daoma riẹ ohwo na ziezi. Who te muẹrohọ nọ who wo iroro nọ i fo ho kpahe amọfa, ẹsejọhọ kpahe ahwo nọ a no orẹwho ọfa ze hayo ahwo nọ a wo ovioma ọfa, lẹ se Ọghẹnẹ re o fiobọhọ kẹ owhẹ si ekpehre iroro yena no udu ra no. (Olezi 139:23, 24) Whọ tẹ ginẹ lẹ se Ọghẹnẹ no udu ze re o fiobọhọ kẹ owhẹ whaha uruemu ọriẹwẹ, riẹ nọ ọ te gaviezọ kẹ owhẹ je fiobọhọ kẹ owhẹ.—1 Pita 3:12.

a Jihova họ odẹ Ọghẹnẹ.—Olezi 83:18.

“Rri bọo ẹdẹ yena, mẹ avọ ohwo oyibo ma re keria oria ọvo dhedhẹ kugbe he, . . . Enẹna mẹ rrọ usu inievo nọ i you ohwohwo evaọ akpọ na soso.”—TITUS

Iku Uzuazọ—TITUS

Ọ Sae Whaha Omukpahọ

Fiki izi okienyẹ nọ a fihọ kẹ ahwo ovioma ọfa evaọ orẹwho riẹ, ọzae jọ nọ a re se Titus o te kuomagbe utu ugbarugba jọ nọ a re ru ozighi gaga. Ọ ta nọ: “Ma re kpohọ eria nọ ahwo obiebi a rẹ rueva ha, wọhọ ehọtẹle, gbe eria nọ a rẹ jọ da idi, re ma ruẹse họre ahwo nọ a rrọ etẹe.” Titus ọ ta nọ o je ru eware nana fiki omukpahọ ọgaga nọ o jọ udu riẹ, yọ ọ ta re nọ: “Nọ mẹ avọ ohwo jọ kpobi ma tẹ be whọ, te ọzae hayo aye, mẹ họ ohwo nọ ọ rẹ kake tehe ohwo na.”

Titus o te muhọ enwene nọ Isẹri Jihova a mu ei Ebaibol na họ ewuhrẹ. Nọ o mu Ebaibol na họ ese, eware nọ o se i duobọtei udu gaga. Oware jọ nọ o mai duobọtei udu họ, eyaa nọ Ọghẹnẹ ọ ya inọ evaọ obaro “uwhu o gbẹ te jọ ofa ha, yọ uweri hayo oviẹ hayo edada e gbẹ te jọ ofa ha.”—Eviavia 21:3, 4.

Evaọ oke ọsosuọ, o jọ bẹbẹ kẹ Titus re o si omukpahọ no udu riẹ. Ọ ta nọ: “O jọ bẹbẹ kẹ omẹ re me nwene iroro mẹ gbe uruemu mẹ.” Rekọ oware nọ u fiobọhọ kẹe họ, ẹme nọ ọ rrọ obe Iruẹru Ikọ 10:34, 35, nọ o ta nọ Ọghẹnẹ o wo ọriẹwẹ hẹ.

Eme u no rie ze? Titus ọ ta nọ: “Nọ mẹ ruẹ epanọ Isẹri Jihova a bi ro dhesẹ uyoyou kẹ ohwohwo ghelọ ovioma rai hayo uyẹ nọ a no ze, u te ti mu omẹ ẹro nọ Isẹri Jihova họ egagọ uzẹme na. Taure mẹ tẹ te họ-ame dede, ohwo oyibo jọ evaọ ukoko na o tube zizie omẹ kpohọ uwou riẹ nyae re emu. O jọ wọhọ ewezẹ kẹ omẹ. Rri bọo ẹdẹ yena, mẹ avọ ohwo oyibo ma re keria oria ọvo dhedhẹ kugbe he, kabikọ re mẹ nyae re emu evaọ uwou riẹ. Enẹna mẹ rrọ usu inievo nọ i you ohwohwo evaọ akpọ na soso.”