Kọ Whọ Kareghẹhọ?

Kọ whọ romatotọ se Uwou-Eroro nọ a siobọno enukpe nana? Dai rri sọ whọ sae kẹ iyo enọ nọ e rrọ obotọ na:

Erere vẹ o ti te omai nọ ma tẹ be hae lẹ, se Ebaibol, je roro didi kpahe eware nọ ma wuhrẹ?

Iroro nọ ma te jẹ kpobi e te hae jọ ziezi, ma te riẹ epanọ a re wuhrẹ ahwo ziezi, ẹrọwọ mai ọ te ga, yọ ma ti you Jihova gaga.—w22.01, ẹwẹ. 30-31.

Eme o ti noi ze nọ ma te fievahọ Jihova gbe ahwo nọ o ro mu?

Ma re dhesẹ nọ ma rọwo nọ Jihova o re ru oware nọ o gba ẹsikpobi. Ma re fievahọ ekpako na yọ ma re ru oware nọ a vuẹ omai nọ ma ru. Ma tẹ be hai ru ere enẹna, ma ti ru oware kpobi nọ a ta nọ ma ru evaọ oke uye ulogbo na, o tẹ make rrọ oghẹrẹ jọ.—w22.02, ẹwẹ. 4-6.

Eme họ otọ ẹme ukọ-odhiwu na inọ a te jọ obọ “Zerubabẹl [ọba na] ruẹ ufi nọ a rẹ rọ ma oware sọ o kpọvi na”? (Zẹk. 4:8-10)

Oware nọ ukọ-odhiwu na ọ jẹ vuẹ idibo Ọghẹnẹ na họ, dede nọ etẹmpol ọkpokpọ na o te ọrọ ọsosuọ họ, a te bọe re, yọ a te bọe epanọ Jihova ọ gwọlọ.—w22.03, ẹwẹ. 16-17.

Ẹvẹ ma sai ro dhesẹ emamọ “oriruo . . . evaọ ẹmeọta”? (1 Tim. 4:12)

Ma rẹ rọ unu kpotọ ta ẹme kẹ ahwo avọ adhẹẹ evaọ usi uwoma, ma rẹ so ile no udu mai ze evaọ obọ ewuhrẹ jẹ kuyo. Ma rẹ hae ta ẹme nọ ọ rẹ bọ ahwo ga, jẹ ta uzẹme, yọ ma rẹ la ahwo eka ha.—w22.04, ẹwẹ. 6-9.

Fikieme arao ojihẹ nọ a fodẹ evaọ Eviavia 13:1, 2 na o ro wo eware nọ erao ijihẹ ene nọ a fodẹ evaọ Daniẹl izou 7 na a wo?

Orọnikọ egọmeti ọvo jọ wọhọ egọmeti Rom oye arao ojihẹ nọ a fodẹ evaọ Eviavia izou 13 na o dikihẹ kẹ hẹ. Ukpoye o dikihẹ kẹ egọmeti kpobi nọ i su ahwo-akpọ no.—w22.05, ẹwẹ. 9.

Ẹvẹ ma re ro dhesẹ nọ ma fievahọ Jihova inọ o ti bru uvioziẹ?

Nọ ohwo jọ o te ru oware nọ o kẹ omai uye, ọ tẹ la omai eka, hayo o te ru oware nọ o da omai te ẹzi, ma rẹ daoma kpairoro vrẹ riẹ. Ma rẹ nyase ẹme na ba kẹ Jihova keme ọ te ruẹrẹ eware kpobi nọ uzioraha o wha ziọ akpọ na họ.—w22.06, ẹwẹ. 10-11.

Nọ a tẹ vuẹ oniọvo-ọmọzae jọ inọ ọ lẹ evaọ ewuhrẹ, eme u fo nọ ọ rẹ kareghẹhọ?

A rẹ rọ olẹ whọku inievo ukoko na hayo rọ uvẹ yena woro eware jọ kẹ ukoko na ha. U du gwọlọ nọ ma rẹ ‘ta eme bu’ hu maero evaọ olẹ emuhọ. (Mat. 6:7)—w22.07, ẹwẹ. 24-25.

Fikieme Ebaibol ọ rọ ta nọ “enọ i ru eware iyoma” a ti wo “ẹkparomatha ẹdhoguo”? (Jọn 5:29)

Orọnikọ ẹdhoguo na họ, a ti brukpe ai hi fikinọ a ru eware iyoma taure a te ti whu. Ukpoye kọ a ti muẹrohọ ae sọ a be daoma ru oware nọ u kiẹrẹe nọ a kpare ae ze no na.—w22.09, ẹwẹ. 18.

Ẹme jọ vẹ Brọda J. F. Rutherford ọ ta rọ tuduhọ ahwo awọ evaọ okokohọ jọ nọ a ru evaọ Azie 1922?

Evaọ okokohọ nọ a jọ Cedar Point, Ohio, obọ U.S.A. ru, ọ ta nọ: “Ovie na o muhọ esuo no! Whai họ ahwo-ẹro riẹ. Fikiere wha whowho, wha whowho, wha whowho, Ovie na avọ uvie riẹ.”—w22.10, ẹwẹ. 3-5.

Idhere esa jọ vẹ Aizaya izou 30 o ta nọ Ọghẹnẹ ọ rẹ rọ kẹ omai ẹgba thihakọ?

Oria Ebaibol yena o ta kpahe eware esa jọ. Orọ ọsosuọ, Jihova o bi yo elẹ mai. Orọ avọ ivẹ, o bi wuhrẹ omai. Orọ avọ esa, ọ be ghale omai enẹna, yọ ọ te ghale omai evaọ obaro.—w22.11, ẹwẹ. 9.

Ẹvẹ ma rọ riẹ nọ eme nọ e rrọ Olezi 37:10, 11, 29 i rugba evaọ oke anwae, yọ i ti rugba evaọ obaro?

Eme nọ Devidi ọ jọ oria Ebaibol yena ta e nwani kiehọ oghẹrẹ nọ eware e jọ evaọ Izrẹl oke nọ Solomọn o je ro su. Yọ oke nọ Jesu ọ jẹ ta kpahe Aparadase, ọ ta ẹme nọ ọ rrọ owọ avọ 11 na. (Mat. 5:5; Luk 23:43)—w22.12, ẹwẹ. 8-10, 14.