Enọ Ahwo Nọ A S’ebe
Kọ Devidi o je roro nọ ọyomariẹ o ti whu hu jabọ nọ ọ rọ ta evaọ Olezi 61:8 inọ o ti jiri odẹ Ọghẹnẹ “bẹdẹ bẹdẹ”?
Ijo. Devidi o roro ere vievie he. Oware nọ o wo họ iroro sa.
Devidi ọ jọ oria ikere yena gbe efa ta nọ: “Mẹ . . . te so ile jiri odẹ ra bẹdẹ bẹde.” Ọ tẹ jẹ ta nọ: “Mẹ be rọ udu mẹ kpobi jiri owhẹ, O Jihova, Ọghẹnẹ mẹ, yọ mẹ te kẹ odẹ ra orro bẹdẹ bẹdẹ.” Ọ ta re nọ: “Me ti jiri odẹ ra bẹdẹ bẹdẹ.”—Ol. 61:8; 86:12; 145:1, 2.
Eme nana nọ Devidi o kere na i dhesẹ nọ o je roro nọ ọ te rria bẹdẹ bẹdẹ hẹ. Ọ riẹ nọ mai ahwo-akpọ, mai erahaizi, te ọyomariẹ te. Yọ Jihova ọ ta nọ ọrahauzi kpobi ọ rẹ seba ewhu hu. (Emu. 3:3, 17-19; Ol. 51:4, 5) U te no ere no, ọ riẹ nọ ahwo wọhọ amọ Abraham, Aiziki gbe Jekọp nọ a jọ egbẹnyusu Jihova dede a whu. Yọ ọ riẹ nọ ọyomariẹ o ti whu ẹdẹ jọ re. (Ol. 37:25; 39:4) Rekọ ẹme nọ ọ jọ Olezi 61:8 ta nọ o ti jiri odẹ Ọghẹnẹ bẹdẹ bẹdẹ na, u dhesẹ nọ ọ gba riẹ mu nọ o re jiri Jihova bọo ẹdẹ nọ o re whu.—2 Sam. 7:12.
Eme jọ nọ Devidi o kere na yọ eware nọ e via kẹe. Eme nọ e rrọ ehru Olezi avọ 18, 51, gbe 52 na o lẹliẹ omai riẹ ere. Ọ jọ Olezi avọ 23 ta nọ Jihova ọ wọhọ othuru-igodẹ, yọ ọ rẹ kpọ igodẹ riẹ, koyehọ idibo riẹ, ọ rẹ sasa ae oma, jẹ thọ ae. Nwanọ oghẹrẹ othuru-igodẹ otiọye Devidi ọ jọ. Oye o soriẹ ze nọ ọ rọ ta nọ Jihova ọ rẹ gọ ‘evaọ edẹ uzuazọ riẹ kpobi.’—Ol. 23:6.
U te no ere no, ma rẹ jẹ kareghẹhọ re nọ eme nọ Devidi o kere na kpobi, ẹzi ọfuafo na ọye ọ wọ riẹ kere ai. Eme jọ nọ o kere na yọ eruẹaruẹ nọ i ti rugba evaọ obaro. Ọjọ họ onọ a ta kpahe evaọ obe Olezi avọ 110 na. Devidi ọ jọ etẹe ta kpahe oke nọ Olori riẹ ọ te rọ “keria obọze [Ọghẹnẹ] evaọ obọ odhiwu, yọ a te kẹe ogaga ulogbo.” Eme ọ te rehọ ogaga na ru? Ọ te rehọ iẹe “bruoziẹ kpe erẹwho na,” jẹ raha ewegrẹ Ọghẹnẹ kpobi no. Unuwou Devidi Mesaya na, Jesu o no ze. O ti su odhiwu gbe otọakpọ na soso. Yọ ọ te jọ “ozerẹ bẹdẹ bẹdẹ.” (Ol. 110:1-6) Jesu ọ ta nọ eruẹaruẹ nọ e rrọ Olezi avọ 110 na, ọyomariẹ i kiekpahe yọ i ti rugba evaọ obaro.—Mat. 22:41-45.
Jihova o ru nọ Devidi o ro kere kpahe eware nọ e via evaọ uzuazọ riẹ. Yọ evaọ obaro, a te kpare iẹe ze, o ve ti wo uvẹ nọ o re ro jiri Jihova bẹdẹ bẹdẹ. Onana u dhesẹ nọ eme nọ e rrọ Olezi 37:10, 11, 29 i kiekpahe oke ahwo Izrẹl. Yọ e be jẹ ta kpahe oghẹrẹ nọ eware e te jọ nọ Uvie Ọghẹnẹ u te mu otọakpọ na họ esu no.—Rri edhe-ẹme avọ 8 evaọ uzoẹme na, “Who ti Lele Omẹ Jọ Aparadase” nọ o rrọ Uwou-Eroro nana.
Ma ruẹ no inọ eme nọ e rrọ Olezi 61:8 na gbe oghẹrẹ eme itieye na nọ e rrọ eria efa i dhesẹ nọ Devidi ọ gwọlọ nọ o re jiri Jihova bọo ẹdẹ nọ o re whu. Eme yena i te je dhesẹ oware nọ Devidi o ti ru nọ a tẹ kpare iẹe ze no evaọ obaro.