2 | “Omosasọ nọ U re No Ikereakere na Ze”

EBAIBOL NA Ọ TA NỌ: “Eware kpobi nọ a kere fihotọ anwẹdẹ na a kere ai re ma wuhrẹ no ai ze, re ma rọ ẹkwoma ithihakọ mai gbe omosasọ nọ u re no Ikereakere na ze wo ẹruore.”—AHWO ROM 15:4.

Oware nọ Onana U dhesẹ

Eware nọ e rrọ Ebaibol na e rẹ sasa omai oma, je fiobọhọ kẹ omai whaha iroro ethọthọ hayo ru nọ ma gbe ro roro iroro ga hrọ họ. Ebaibol na ọ tẹ jẹ kẹ omai ẹruore inọ kẹle na, ẹyao iroro gbe oghẹrẹ edada kpobi i ti kuhọ.

Oghẹrẹ nọ Ebaibol na Ọ Sai ro Fiobọhọ

Mai kpobi na ma rẹ ruawa ẹsejọ, rekọ ahwo nọ a rẹ ruawa gaga hayo ahwo nọ a wo ẹyao ọkora, ẹbẹbẹ nana ọ rẹ kẹ ae uye kẹdẹ kẹdẹ. Ẹvẹ Ebaibol na ọ sai ro fiobọhọ?

Ma rẹ jọ Ebaibol na se kpahe eware nọ e rẹ lẹliẹ eva were omai, nọ ma gbe ro roro kpahe eware nọ e be kẹ omai uye he. (Ahwo Filipai 4:8) Eware nana e rẹ sasa omai oma, ru udu te omai otọ, je fiobọhọ kẹ omai whaha iroro egaga.—Olezi 94:18, 19.
Ẹsejọ ma re rri omamai nọ ma fioka ha, rekọ Ebaibol na o re fiobọhọ kẹ omai whaha iroro yena.—Luk 12:6, 7.
Ma rẹ jọ eria buobu evaọ Ebaibol na ruẹ nọ amọfa a wo ọkpọ ẹbẹbẹ nọ ma wo na, yọ Jihova nọ ọ ma omai na, ọ riẹ epanọ eware e rrọ omai oma.—Olezi 34:18; 1 Jọn 3:19, 20.
Ọghẹnẹ ọ ya eyaa evaọ Ebaibol na inọ o ti si eware kpobi nọ e be wha edada se omai no. (Aizaya 65:17; Eviavia 21:4) Ma tẹ be mọ ẹyao nọ ọ be lẹliẹ omai ruawa je roro iroro egaga, eyaa nana e rẹ sai fiobọhọ kẹ omai thihakọ.

Epanọ Ebaibol na O bi ro Fiobọhọ kẹ Jessica

Mẹ rẹ Jọ Ọkọkora

“Nọ mẹ jọ ikpe 25, me te mu iroro họ eroro gaga. A tẹ jọ obọ ọspito vuẹ omẹ nọ ẹyao ọkora ọgaga mẹ be mọ na. Eware iyoma nọ e via kẹ omẹ evaọ oke nọ u kpemu e rẹ ziọ omẹ iroro idudhe, e vẹ be kẹ omẹ uye. Edọktọ ọ tẹ vuẹ omẹ nọ oware nọ o be wha ọkora na ze họ, ekpehre eware nọ e via kẹ omẹ no evaọ uzuazọ nọ me bi roro kpahe. A kẹ omẹ imu nọ mẹ jẹ lọ, yọ a daoma fiobọhọ kẹ omẹ riẹ oware nọ o be whae ze nọ me bi ro roro ekpehre iroro gbe epanọ mẹ sae rọ whaha iroro yena.”

Epanọ Ebaibol na O bi ro Fiobọhọ kẹ Omẹ

“Okenọ ọkora mẹ na ọ tẹ ga, udu mẹ u re gbe te otọ te ehru hu, owezẹ u re gbe su omẹ hẹ, yọ mẹ rẹ ruawa gaga. Ẹsibuobu evaọ aso, me re roro iroro gaga, mẹ rẹ gbẹ riẹ oware nọ me re ru hu. Wọhọ epanọ Ebaibol na ọ ta evao obe Olezi 94:19, Ọghẹnẹ ọ rẹ sae sasa omai oma je ru udu te omai otọ nọ awaọruọ ọ tẹ da omai oma fia. Fikiere me fi Ebaibol gbe omobe jọ họ kẹle ehwa mẹ. Me kere eria Ebaibol nọ e rẹ tuduhọ omẹ awọ fihọ omobe na. Nọ owezẹ o gbe bi su omẹ hẹ, me re se eria Ebaibol jọ nọ e rẹ lẹliẹ udu te omẹ otọ.

“Ebaibol na ọ tuduhọ omai awọ inọ ma whaha ekpehre iroro kpobi nọ e wọso oware nọ Ọghẹnẹ ọ ta. Evaọ oke nọ u kpemu, mẹ jẹ hai roro nọ me fioka ha, yọ Ọghẹnẹ o you omẹ hẹ. Rekọ mẹ jọ Ebaibol na wuhrẹ nọ Ọghẹnẹ ọ rrọ yoyou, ọ vọ avọ ohrọ-oriọ, yọ ọ be daezọ mai omomọvo. Ẹmẹrera na, mẹ tẹ be daoma kpọ iroro mẹ. Me gbe bi roro kpahe eware iyoma kpobi nọ e ziọ omẹ udu hu. Mẹ be daoma rri omamẹ epanọ Ọghẹnẹ o bi rri omẹ. Onana u bi fiobọhọ kẹ omẹ rri omamẹ epanọ u fo jẹ whaha ekpehre iroro.

“Me bi rẹro oke nọ ma gbe ti ro wo ekpehre iroro ho, hayo kareghẹhọ eware iyoma nọ e via kẹ omai no ho. Mẹ riẹ nọ evaọ obaro, ohwo ọvo ọ gbẹ te mọ ẹyao iroro ho. Ẹruore nana o bi fiobọhọ kẹ omẹ thihakọ enẹna, je bi rẹro okenọ ọkora mẹ na o ti ro kpo no riẹriẹriẹ.”