Enọ Ahwo nọ A Se Ebe

Oke vẹ usi uwoma nọ ma be vuẹ ahwo na u ti ro kuhọ?

Jesu ọ ta nọ: “A te ta usi uwoma Uvie na evaọ akpọ na soso re o jọ isẹri kẹ erẹwho na kpobi, kẹsena urere na o vẹ te ze.” (Mat. 24:14) Ẹme Griki nọ a fa ẹme na “urere” no ze evaọ oria Ebaibol nana gbe evaọ owọ avọ 6 gbe 13 na họ teʹlos. Ẹme nana o bi dhesẹ okenọ akpọ Setan o ti ro kuhọ riẹriẹriẹ nọ ẹmo Amagidọn o te fi ze. (Evia. 16:14, 16) Onana u dhesẹ nọ ma te ta usi uwoma na bẹsenọ ẹmo Amagidọn o re muhọ efi no. Enẹ ma riẹ otọ ẹme yena enẹna, orọnikọ epanọ ma riẹ riẹ vẹre na ha.

Ma jẹ ta vẹre nọ okenọ ma te rọ siọ usi uwoma na ba ẹta họ nọ uye ulogbo na u te muhọ no, koyehọ nọ a te mu Babilọn Ologbo na họ ẹraha no. (Evia. 17:3, 5, 15, 16) Ma je roro nọ uye ulogbo na u te muhọ no yọ “ukpe aruoriwo Jihova” o re no ye. (Aiz. 61:2) Ma jẹ ta re nọ ahwo nọ a te zọ evaọ oke uye ulogbo na a ti ru eware nọ i dhesẹ nọ abọ Jihova a rrọ taure uye ulogbo na u te ti muhọ. Ma ta nọ o nwane wọhọ oware nọ o via evaọ okenọ a rọ raha Jerusalẹm evaọ ukpe 607 B.C.E. Keme a kpoka họ ahwo Ju nọ a te zọ no re a tẹ te raha Jerusalẹm. Yọ ahwo nana nọ a kpoka họ na a jẹ gọ Jihova no vẹre, jẹ kẹnoma kẹ eware nọ e rẹ dha Ọghẹnẹ eva. (Izik. 5:11; 9:4) Rekọ ẹme yena nọ ma jẹ ta vẹre na o rọwokugbe ẹme nọ Matiu 24:14 o ta ha. Oria Ebaibol nana u dhesẹ nọ ẹsejọhọ ahwo a ti gbe wo uvẹ nọ a re ro kurẹriẹ bẹsenọ ẹmo Amagidọn o ti ro fi ze nọ akpọ na o ti ro kuhọ riẹriẹriẹ.

Oghẹrẹ nọ ma riẹ otọ ẹme nọ ọ rrọ Matiu 24:14 na obọnana u ru nọ ma ro nwene oghẹrẹ nọ ma fa otọ ẹme nọ ọ rrọ Eviavia 16:21. Oria Ebaibol nana o ruẹaro ovuẹ nọ a ti whowho nọ o te jọ wọhọ oso-itho ologbo. Nọ ma kiẹ ẹme na ziezi, ma tẹ ruẹ nọ ẹme ọvona obe Matiu avọ Eviavia e be ta na. Ẹvẹ o rọ rrọ ere? Fiki oghẹrẹ nọ Ebaibol ọ ta nọ ahwo a ti rri usi uwoma Uvie na. Pọl ukọ na ọ ta nọ rọkẹ “enọ a bi ti siwi” na, ovuẹ na yọ emamọ usi, o wọhọ “ore awere uzuazọ” rọkẹ ae. Rekọ rọkẹ ewegrẹ Ọghẹnẹ, ovuẹ na yọ ekpehre usi. O wọhọ “ore uwhu nọ u bi su kpohọ uwhu.” (2 Kọr. 2:15, 16) A gwọlọ rọ ezọ yo ovuẹ Uvie na ha keme ma be vuẹ ae nọ akpọ nọ ọ be were ae oma na yọ akpọ omuomu, Ẹdhọ họ ohwo nọ o bi su ei, yọ a te raha akpọ na no.—Jọn 7:7; 1 Jọn 2:17; 5:19.

Oware ofa họ, ovuẹ nọ o wọhọ oso-itho na o te jọ onọ ‘a re ruẹ oghẹrẹ uye riẹ ẹdẹvo ho.’ Onana u dhesẹ nọ ẹsejọhọ usi uwoma nọ ma te ta evaọ oke uye ulogbo na u ti wo ẹgba vi onọ ma be ta obọnana, yọ ahwo a ti yo odẹ Jihova vi epaọ anwẹdẹ. (Izik. 39:7) Kinọ a tẹ raha Babilọn Ologbo na no, kọ ovuẹ nọ ma ti whowho na u ti gbo emamọ ore se ahwo jọ re a kurẹriẹ? O sae via ere. Ẹsejọhọ a te kareghẹhọ nọ u kri no nọ Isẹri Jihova a be rọ ta nọ a te raha egagọ erue.

Ọkpọ oware yena o via evaọ okenọ ahwo Izrẹl a ro no Ijipti nọ Iye Ikpe na e vrẹ no. Nọ Jihova o “bruoziẹ kpe eghẹnẹ Ijipti kpobi” no, nọ ahwo Izrẹl a je no Ijipti kpo, “ogbotu ahwo sa-sa” nọ a rrọ ahwo Izrẹl he a lele i rai. (Ọny. 12:12, 37, 38) A lele i rai kẹhẹ na, ẹsejọhọ fikinọ a ruẹ nọ Iye Ikpe nọ Mosis ọ ta ẹme kpahe na e ginẹ romavia.

Otẹrọnọ ohwo jọ o te kurẹriẹ nọ a tẹ raha Babilọn Ologbo na no, u woma. Keme oke yena yọ inievo Kristi jọ a gbẹ rrọ otọakpọ na. Fikiere uvẹ nọ ohwo yena ọ sai ro fiobọhọ kẹ inievo Kristi u gbe rovie. (Mat. 25:34-36, 40) Rekọ omoke jọ taure ẹmo Amagidọn o te ti fi, yọ enọ a rọ ẹzi wholo na nọ i kiọkọ otọakpọ na a kpobọ odhiwu no. Koyehọ uvẹ nọ a sai gbe ro fiobọhọ kẹ inievo Kristi o vrẹ no ye. Yọ ma riẹ nọ ohwo nọ o fiobọhọ kẹ inievo Kristi ọye a ti bruoziẹ kẹ inọ ogodẹ ọ rrọ.

Oghẹrẹ nọ ma riẹ otọ eria Ebaibol nana enẹna u dhesẹ nọ Jihova o gine wo uyoyou gbe ohrọ-oriọ gaga. Ọ “gwọlọ nọ a raha ohwo ọvo ho rekọ ọ gwọlọ nọ ahwo kpobi a wo uvẹ nọ a re ro kurẹriẹ.”—2 Pita 3:9.