Mẹ jẹ Dhomovuọ Rekọ Me Ru Iruo Imishọnare

A yẹ omẹ evaọ ukpe 1951 evaọ obọ Vienna orọ Austria. Ichọche Katọlik mai kpobi ma jẹ nya. Mẹ jẹ hae dhomovuọ gaga rekọ mẹ jẹ hae sae lẹ se Ọghẹnẹ ẹsikpobi, keme mẹ rọwo nọ Ọghẹnẹ ọ riẹ. Uwhremu na Isẹri Jihova a te mu ọsẹ mẹ Ebaibol họ ewuhrẹ. Oke yena yọ mẹ jọ ikpe izii. Nọ u te oria jọ no a te mu oni mẹ họ ewuhrẹ re.

Mai kpobi ma te mu ewuhrẹ họ ẹnya. Yọ ukoko Döbling evaọ obọ Vienna ma jẹ nya. Evaọ uwou mai na, mai kpobi ma jẹ hai ru eware kugbe. Ma jẹ hai se Ebaibol kugbe, jẹ romatotọ wuhrẹ iẹe. Mai kpobi ma jẹ hae nya usu kpohọ ewuhrẹ. Nọ ma te kpohọ okokohọ, ma rẹ fialoma via re ma ru iruo. Ọsẹ mẹ o fiobọhọ kẹ omẹ no emaha ze re me you Jihova no udu ze. Mẹ kareghẹhọ olẹ jọ nọ ọsẹ mẹ ọ jẹ hae lẹ. Ọ jẹ hae lẹ inọ, mẹ gwọlọ nọ emọ ivẹ mẹ na a re ru ọkobaro oke-kpobi. Mẹ avọ oniọvo mẹ ọmọtẹ ọ be ta na. Rekọ nọ ọsẹ mẹ ọ make jẹ lẹ ere na, ovao mẹ o jọ eware yena kpobi hi.

OKENỌ ME RO MU ỌKOBARO OKE-KPOBI HỌ

Mẹ họ-ame evaọ ukpe 1965. Yọ ikpe ikpegbene (14) mẹ jọ. Nọ mẹ make họ-ame no, ozọ o jẹ hai mu omẹ re mẹ ta usi uwoma kẹ ahwo nọ mẹ riẹ hẹ. Mẹ jẹ hai roro nọ ehwa mẹ i woma vi omẹ. Fikiere mẹ jẹ daoma epanọ me re ro ru eware nọ ehwa mẹ a bi ru. Nọ mẹ họ-ame no u gbe kri hi, me te bi lele ahwo nọ a be gọ Jihova ha nya usu. Nọ mẹ tẹ rrọ kugbe ae eva e rẹ were omẹ. Rekọ udu o jẹ hai brukpe omẹ inọ ahwo nọ a be gọ Jihova ha me bi lele nya usu na. Mẹ riẹ ere, rekọ re mẹ siọ usu na ba, ọziọ oware he. Kọ eme o fiobọhọ kẹ omẹ?

Evaọ oke yena ọvona, oniọvo-ọmọtẹ jọ nọ ọ rrọ ikpe ikpegbezeza ọ tẹ ziọ ukoko mai. Odẹ riẹ Dorothée. Epanọ a rẹ ta nọ ohwo o wo ọwhọ, ere oniọvo na o wo ọwhọ usi uwoma ota. Nọ mẹ ruẹ oghẹrẹ nọ ọ be daoma te, mẹ tẹ ta nọ me re ru ẹkẹ mẹ. Me vi oniọvo na, rekọ oniọvo na o kpohọ usi uwoma vi omẹ. Me te bi roro nọ: ‘Ọsẹgboni mẹ a rrọ ukoko na, rekọ ọsẹgboni oniọvo na a riẹ hẹ. Mae tubẹ rro na ọye ọ be rẹrote oni riẹ nọ ọ be mọ. Avọ ere ghele na usi uwoma u re voi hi.’ Emamọ oriruo oniọvo nana o fiobọhọ kẹ omẹ ta nọ mẹ rẹ daoma kpohọ usi uwoma vi epanọ mẹ jẹ nya. Kọ ere mai imava ma ro mu ọkobaro họ. Ọkobaro obufihọ ma kaki ru. Oke yena a je sei ọkobaro ehọlide. Uwhremu na, mai imava ma te mu ọrọ oke-kpobi họ. Usi uwoma o jẹ were Dorothée gaga. Yọ o ru usi uwoma were omẹ re. Oniọvo na ọye o ru nọ me ro wo ohwo ọsosuọ nọ me je wuhrẹ Ebaibol. Ẹmẹrera na mẹ gbẹ jẹ dhomovuọ họ. Me te ti wo udu nọ me je ro kporo ẹthẹ ahwo, jẹ ta usi uwoma kẹ ahwo evaọ oria kpobi, makọ evaọ akotọ edhere dede.

U wo oniọvo-ọmọzae jọ nọ ọ ziọ ukoko mai, Heinz họ odẹ riẹ. Oniọvo na ohwo Austria. Okenọ ọ rọ ziọ ukoko mai na yọ me ri ru ọkobaro te ukpe ọvo ho. Okenọ ọ rọ jọ kugbe oniọvo riẹ ọmọzae evaọ obọ Canada o ro kurẹriẹ. Yọ oniọvo riẹ na ọ jọ ukoko na re. Ukoko oye u vi Heinz ziọ ukoko mai nọ o rrọ Vienna, yọ ọkobaro obọdẹ ọ jọ. Oniọvo na ọ were omẹ anwọ okenọ ọ rọ ziọ ukoko mai obọ. Rekọ ọ jẹ ta nọ imishọnare ọ gwọlọ jọ. Yọ imishọnare e were omẹ hẹ. Nọ mẹ ruẹ nọ iruo evona ma gwọlọ ru evaọ ukoko na ha, mẹ gbẹ vuẹe nọ ọ were omẹ hẹ. Rekọ uwhremu na mai imava ma te mu usu orọo họ. Ma tẹ te rehọ ohwohwo. Kọ ere me ro kuomagbei je ru ọkobaro evaọ Austria.

IMISHỌNARE I TE MU OMẸ HỌ ẸWERE

Oke kpobi ọzae mẹ Heinz ọ jẹ hae vuẹ omẹ nọ imishọnare e were riẹ gaga. Nọ ọ be make vuẹ omẹ na ọ rẹ gba omẹ họ nọ me gbe ru ei hi oja na ha. Rekọ enọ nọ ọ rẹ nọ omẹ i re ru omẹ roro kpahe iẹe. Enọ jọ nọ ọ rẹ nọ họ: “Kinọ ma gwọlọ yẹ ọmọ họ na, kọ u gbe woma re ma ru iruo kẹ Jihova vi epanọ ma bi ru na?” Rekọ fikinọ mẹ jẹ hae vuoma me je roro nọ mẹ sae jọ imishọnare he. Mẹ yọ ọkobaro, rekọ ozọ imishọnare u je mu omẹ. Rekọ ọzae mẹ o fiobọhọ kẹ omẹ. Ọ jẹ hae vuẹ omẹ epanọ imishọnare e were te. Ọ vuẹ omẹ nọ mẹ hai fiobọhọ kẹ amọfa, inọ u ti ru nọ me gbe ti roro kpahe omamẹ ọvo ho. Ohrẹ nana nọ ọ kẹ omẹ na u fiobọhọ kẹ omẹ gaga.

Ẹmẹrera na imishọnare ọ tẹ ruọ omẹ oma no. Fikiere mẹ avọ ọzae mẹ ma te fili efọmo Isukulu Giliad. Rekọ oniọvo nọ ọ jẹ rẹrote iruo nọ a bi ru evaọ obọ uwou ogha ọ tẹ vuẹ omẹ nọ o te mai woma re mẹ riẹ Oyibo ziezi tao. Mẹ tẹ daoma ru ere ikpe esa. Rekọ u gbe omai unu nọ ukoko u vi omai kpobọ Salzburg evaọ Austria. Yọ ukoko ẹvẹrẹ Yugoslavian a ta nọ ma jọ. Ikpe ihrẹ ma jọ obei ta usi uwoma. Evaọ ikpe ihrẹ yena, ọzae mẹ ọ jọ ọsẹro ọnyawariẹ evaọ ukpe ọvo. Ahwo nọ ma jẹ ta usi uwoma kẹ na a rẹ ta ẹvẹrẹ Serbo-Croatian. O lọhọ re ohwo o wuhrẹ ẹvẹrẹ na ha. Ghele na, ma wo ahwo buobu nọ ma je wuhrẹ Ebaibol.

Evaọ 1979, ukoko o vuẹ omai nọ ma kpobọ Bulgaria wọhọ ẹsenọ ma bi kpohọ erẹ eriosehọ, re ma sae rọ ere whariẹ ebe mai jọ se inievo mai nọ e rrọ obei. Egọmeti ọ gbẹ rọwo nọ Isẹri Jihova a jọ obei ta usi uwoma ha. Fikiere nọ ma nya na ma ta usi uwoma ha. Rekọ ma lẹlẹ wha emebe mai jọ lele oma re ma rọ kẹ inievo-emetẹ isoi mai nọ e rrọ ẹwho nọ a re se Sofia. Etẹe osu Bulgaria ọ rrọ su. Ozọ u je mu omẹ. Rekọ Jihova o fiobọhọ kẹ omẹ. Inievo-emetẹ isoi na a gbẹ jẹ gọ Jihova vrẹ avọ evawere dede nọ egọmeti ọ sai mu ae. Nọ mẹ ruẹ epanọ a wo udu te, mẹ tẹ ta nọ mẹ rẹ daoma ru iruo kpobi nọ Jihova ọ kẹ omẹ evaọ ukoko riẹ.

Ma tẹ wariẹ fili efọmo Isukulu Giliad. Yọ ukoko o rọwo nọ ma nya. Ma je roro nọ obọ United States ma ti ro kpohọ isukulu na, gbe nọ Oyibo a ti ro ru isukulu na. Rekọ uwou ogha nọ o jọ Wiesbaden evaọ Germany ma jọ kpohọ isukulu na evaọ Akpegbọvo 1981. Yọ ẹvẹrẹ German a ro ru Isukulu na. Mẹ riẹ ẹvẹrẹ German vi Oyibo. Fikiere mẹ riẹ otọ eware nọ a wuhrẹ omai ziezi. Kinọ ma ti nwrotọ no isukulu na, bovẹ ukoko o ta nọ ma nya?

ẸMO GBE OZIGHI Ọ JỌ OBONỌ UKOKO O TA NỌ MA NYA

Obọ Kenya ukoko o ta nọ ma nya vẹre. Rekọ nọ ma te uwou ogha nọ o rrọ Kenya, inievo na a tẹ nọ omai sọ ma sai kpohọ orẹwho nọ ọ kẹle rai. Odẹ orẹwho na Uganda. Oke yena, yọ o vrẹ ikpe ikpe no nọ General Idi Amin ọ rọ rehọ isoja rọ ogaga mi egọmeti Uganda esuo. Nọ o muhọ esuo no a kpe idu ahwo buobu. Yọ uye nọ o bẹ ima ahwo buobu ọziọ oware he. Nọ u te 1979, a te je mi General Idi Amin esuo no. Iku eware nọ me yo na i te ru ozọ obei je mu omẹ. Rekọ isukulu Giliad na i fiobọhọ kẹ omai, keme isukulu na i wuhrẹ omai nọ ma fievahọ Jihova. Fikiere ma tẹ ta nọ ma rẹ nya.

Nọ ma te obọ Uganda no, oware nọ o jọ obei jẹ via o were vievie he. Evaọ Obe Ẹgbukpe 2010 ọzae mẹ Heinz ọ ta oghẹrẹ nọ eware e jọ evaọ obei. Anọ: “Eware buobu i gbe je ru iruo evaọ obọ Uganda ha. Ame ọ jariẹ hẹ, enẹtuọko nọ a rẹ rọ ta ẹme evaọ ifonu e jariẹ hẹ. Yọ ẹsikpobi who re yo edo iwhunu nọ a be sa. Yọ iji e jẹ kwa eware ahwo rehọ. Ohwo ọ sai tube no uwou riẹ ze evaọ aso ho. Nọ ohwo ọ make rrọ uwou riẹ evaọ aso na yọ ọ be lẹ nọ jọ ekpehre ohwo ọ nyaze he.” Nọ eware nana kpobi e be make via na, inievo na a gbẹ jẹ gọ Jihova ghele.

Evaọ ukpe 1982, mẹ avọ ọzae mẹ ma ro te Kampala nọ osu Uganda ọ jọ je su. Nọ ma te obei, uwou Brọda Sam Waiswa avọ aye riẹ Christina ma jẹ rria. Yọ emerae isoi ma rria etẹe. Oniọvo na avọ aye riẹ a daoma kẹ omai gaga, keme a wo emọ isoi, yọ imoni ene rai e jọ uwou na re. Ẹsibuobu ẹsiẹvo okpẹdẹ a rẹ re emu evaọ uwou na. Rekọ avọ ere ghele na a rọwo nọ ma jọ uwou na kugbe ai. Inievo na a ginẹ daoma. Mẹ avọ ọzae mẹ ma wuhrẹ eware buobu nọ ma jọ uwou na. Eware nọ ma wuhrẹ na i fiobọhọ kẹ omai evaọ iruo imishọnare na. Wọhọ oriruo, okenọ ma jọ etẹe na amame ọkakao ma jẹ hae rọ họ. Nọ ma tẹ họ no ma re ku ame na kufiẹ hẹ. Ma rẹ rọ ame yena ọvona wozẹ etọlẹte nọ ma te kuame no. Ukpe 1983 mẹ avọ ọzae mẹ ma rọ ruẹ uwou evaọ Kampala, yọ oria na u dhẹ oma omojọ.

Usi uwoma obei o were gaga. Evaọ amara ọvuọvo ma rehọ emagazini nọ i bu vi idu ene (4,000) kẹ ahwo. Oghẹrẹ nọ ahwo na a rẹ rọ gaviezọ họ oware nọ o mai were omai. Ẹme Ọghẹnẹ ọ rẹ were ahwo Kampala oma. Ahwo nọ ọzae mẹ o je wuhrẹ Ebaibol a re te imakpe hayo ikpegbisoi ẹsejọ, yọ ere omẹ re. Ma wuhrẹ eware jọ mi ahwo nọ ma je wuhrẹ Ebaibol. Wọhọ oriruo, ahwo nọ ma je wuhrẹ Ebaibol a jẹ hae nya otọ ziọ ewuhrẹ koka koka. Rekọ yọ eva e be were ae ghele, a je si ovao họ họ.

A wariẹ fi ẹmo isiava efa evaọ ukpe 1985 gbe 1986 evaọ Uganda. Ma jẹ ruẹ emọboba nọ e rrọ isoja oke yena avọ igbeke nọ a wọ. A jẹ hai dikihẹ edhere je breki ahwo nọ a be dhẹ vrẹ. Oke yena ma jẹ hae lẹ re Jihova ọ kẹ omai ereghẹ je ru re ma wo udu re ma sae ta usi uwoma na. Jihova o yo olẹ mai na. Keme eva e jẹ were omai nọ ma tẹ nyaku ohwo nọ ọ gaviezọ kẹ omai. Oke yena ma rẹ gbẹ tubẹ riẹ sọ oware jọ ozọ họ.

Ma jẹ ta usi uwoma kẹ erara gaga oke yena. Yọ eva e jẹ were omai. U wo ọzae avọ aye jọ nọ ma nyaku oke yena nọ ma je wuhrẹ Ebaibol. Odẹ ọzae na Murat Ibatullin, odẹ aye riẹ Dilbar. Aimava na ahwo Tatarstan, koyehọ Central Russia. Murat yọ edọktọ. Ọye avọ aye riẹ a te ti kurẹriẹ ziọ ukoko na, yọ a be gọ Jihova enẹna. Uwhremu na, me te je wuhrẹ aye ọfa jọ Ebaibol. Odẹ riẹ Tatjana Vileyska. Aye na yọ ohwo Ukraine. Ọ jẹ gwọlọ nọ o re thuru whu no. Rekọ o kurẹriẹ uwhremu na. Nọ ọ họ-ame no, o te zihe kpobọ Ukraine. Uwhremu na ọ tẹ jọ usu ahwo nọ a rẹ fa ebe mai no Oyibo fihọ ẹvẹrẹ rai.a

EBẸBẸ EFA NỌ I TE OMAI

Evaọ ukpe 1991 nọ mẹ avọ ọzae mẹ ma ro kpobọ ẹwho mai Austria, uwou ogha nọ o rrọ obei o tẹ vuẹ omai nọ a ti vi omai kpohọ oria ofa. Anọ obọ Bulgaria ma te jọ ta usi uwoma. Nọ esuo Eastern Europe u nwene no, egọmeti ọ tẹ wariẹ kẹ Isẹri Jihova uvẹ re a ta usi uwoma evaọ Bulgaria. Wọhọ epanọ mẹ ta no vẹre na, oke ẹdẹ nọ ma rọ nya kpobọ Bulgaria na ma lẹlẹ wha ebe ukoko na jọ lele oma keme oke yena egọmeti ọ kuvẹ nọ a jọ obei ta usi uwoma ha. Rekọ obọnana a kuvẹ no. Oye ukoko o rọ vuẹ omai nọ ma nya na.

Ukoko o vuẹ omai nọ ma gbe zihe kpobọ Uganda ha. Koyehọ ma te sai zihe nyae kwa eware mai nọ e rrọ obei he. Yọ ma sae te vuẹ egbẹnyusu mai nọ e rrọ obei nọ ma bi kpohọ oria ọfa ha. Fikiere ma te kpohọ uwou ogha nọ o rrọ Germany, ma tẹ rehọ omoto, ma tẹ dhẹ kpobọ Bulgaria. Oria nọ ukoko u vi omai nya evaọ obei họ Sofia. Utu jọ ukoko o ta nọ ma kuomagbe evaọ obei. Oware wọhọ iwhowho-uvie udhe (20) e jọ utu na.

Ma nyaku ebẹbẹ jọ evaọ obọ Bulgaria. Ọjọ họ, ma riẹ ẹvẹrẹ nọ ahwo obei a rẹ ta ha. Ere ọvo ho, ebe ivẹ ọvo a fa fihọ ẹvẹrẹ Bulgaria. Eye họ, Uzẹme nọ U re Suohwo kpo Uzuazọ Ebẹdẹbẹdẹ avọ Obe Ikuigbe Ebaibol Mẹ. O lọhọ kẹ omai hi re ma wo ahwo nọ ma re wuhrẹ obe. Nọ o make rọnọ eware yena e jẹ kẹ omai uye na, inievo nọ e jọ utu na a jẹ daoma ta usi uwoma na vrẹ ọvo. Nọ ahwo ichọche Ọtọdọs a ruẹ nọ ahwo buobu a be gaviezọ kẹ omai, a te mu omai họ ekpokpo.

Egọmeti a voro odẹ Isẹri Jihova no obe rai no evaọ ukpe 1994. Anọ a gbẹ gwọlọ omai hi. A mu inievo mai jọ. Yọ a je gu erue fihọ omai uzou evaọ irediyo, etẹlẹvishọno gbe ebe-usi. Anọ Isẹri Jihova a bi kpe emọ rai jẹ be vuẹ Isẹri Jihova efa re a kpe omarai no. Oke yena, re mẹ avọ ọzae mẹ ma ta usi uwoma o lọhọ họ. Keme nọ ma te kpohọ usi uwoma ma rẹ nyaku ahwo nọ eva mai e be dha nọ i re doku omai. Ahwo jọ dede a re se ipolisi re a mu omai. Efa a rẹ rọ eware fi omai. O lọhọ vievie he re ukoko o fa ebe ze ẹwho na. Oke yena ma jẹ ruẹ oria nọ ma rẹ haya jọ ru ewuhrẹ hẹ. Ẹdẹ jọ dede, ipolisi e nyaze te wha ozighi họ okokohọ ologbo mai. Onana o jọ orọ ọsosuọ nọ mẹ avọ ọzae mẹ ma be rọ ruẹ eware itieye na. Obọ Uganda nọ ma no ze na, a rẹ gaviezọ nọ ma tẹ be ta usi uwoma. Kọ eme o fiobọhọ kẹ omai?

Inievo na nọ ma jẹ hae jọ kugbe ẹsikpobi u fiobọhọ kẹ omai. Eva e jẹ were inievo na inọ a be gọ Jihova. Eva e were rai re inọ ukoko u vi omai nya re ma fiobọhọ kẹ ae. Mai kpobi ma you ohwohwo gaga. Yọ ma je ru eware kugbe. Ma wuhrẹ oware jọ no eware nọ e via na kpobi ze. Ma wuhrẹ nọ re ma sae rọ evawere ru iruo nọ Jihova ọ kẹ omai kpobi, o gwọlọ nọ ma re kuomagbe ahwo.

Eware i te ti muhọ ewoma ze. Egọmeti ọ wariẹ kuvẹ re Isẹri Jihova a kere odẹ fihotọ evaọ ukpe 1998. Nọ egọmeti ọ kẹ omai uvẹ no, ukoko o tẹ fa ebe ẹvẹrẹ Bulgaria se omai. Nọ ukpe 2004 u te, ukoko o tẹ rọ uwou ogha nọ a bọ mudhe kẹ Jihova. Ma be ta ẹme na ikoko udhuvẹ gbe ikpegbihrẹ (57) e rrọ Bulgaria. Iwhowho-uvie idu ivẹ, egba izii gbe udhuvẹ gbe ikpegbesa (2,953) e rrọ obei. Evaọ ukpe iruo nọ u kpo na, ahwo nọ a nyaze Ekareghẹhọ uwhu Jesu a bu te idu ezeza, egba ene, gbe udhosa gbe ikpegbisoi (6,475). Inievo isoi ọvo e jọ Sofia vẹre. Rekọ ikoko izii e rrọ etẹe obọnana. Onana u ru nọ ma rọ ruẹ nọ eruẹaruẹ Ebaibol i bi rugba, inọ “ọnọ ọ rrọ kakao na” o ti “zihe ruọ odu.”—Aiz. 60:22.

EBẸBẸ EFA JỌ NỌ I TE OMẸ

Ẹyao ọ be kẹ omẹ uye gaga. Anwọ ikpe buobu ze na me wo ẹyao-ọta. Eware jọ e rẹ ta no omẹ oma ze. Ọjọ dede ọ ta no uzou mẹ ze. Mẹ kaki kpohọ usiwo jọ nọ a jọ ru epanọ oware nọ o ta ze na o rẹ rọ kpọ. Uwhremu na, a tẹ bẹre omẹ evaọ obọ India re a bru oware na no. O rehọ euwa ikpegbivẹ (12) soso re a te ti bru oware nọ o ta ze na kẹle ere no. Nọ me no obẹrọ na ze no, a te fi omẹ họ uwou ogha nọ o rrọ India bẹsenọ oma mẹ o rẹ ga. Nọ oma mẹ o ga no ma te zihe kpobọ Bulgaria.

Ọzae mẹ o te je muhọ ẹmọ. Odẹ ẹyao na Huntington. Ẹyao na o re no oma ọsẹ hayo oni ruọ ohwo, yọ a rẹ kake ruẹ ọkpọ riẹ hẹ. Fiki ẹyao na ọ rẹ sae nya hayo ta ẹme ziezi hi, yọ ọ sae kpọ omariẹ ziezi hi. Ẹyao na ọ kẹ riẹ uye gaga. U tube te epanọ me je ro ru eware buobu kẹe. Ọmọziọ uye o jẹ bẹ omẹ hẹ. O lẹliẹ omẹ jẹ ruawa gaga. Rekọ u wo uzoge oniọvo-ọmọzae jọ nọ a re se Bobi. Ọ jẹ hae nyabru ọzae mẹ ze re a gbe kpohọ usi uwoma. Oma o jẹ vuọ oniọvo na ha fikinọ ọzae mẹ ọ be ta ẹme gba ha hayo inọ ẹsejọ ọ rẹ riẹ obonọ ọ rẹ nya rri hi. Ẹsejọ nọ eware e gbẹ lọhọ kẹ omẹ hẹ, Bobi mẹ jẹ hae ta kẹ re o fiobọhọ kẹ omẹ ru eware jọ kẹ ọzae mẹ. Dede nọ mẹ avọ ọzae mẹ ma ta nọ ma re yẹ emọ họ evaọ akpọ nana, Ọghẹnẹ ọ rọ oniọvo ọmaha nana ro fiobọhọ kẹ omai wọhọ ọmọ mai.—Mak 10:29, 30.

Ọzae mẹ o te je wo ẹyao ekansa nọ o jẹ lahiẹe gaga. Nọ u te ukpe 2015, ọzae mẹ o te whu. O da omẹ gaga. Nọ o whu no, o jọ omẹ oma nọ ewezẹ mẹ rrọ. O tẹ wọhọ nọ akpọ mẹ o re no. Rekọ fiki ẹruore nọ ma wo na o rrọ omẹ oma nọ ọzae mẹ ọ gbẹ rrọ uzuazọ. (Luk 20:38) Ẹsikpobi mẹ rẹ kareghẹhọ emamọ eme gbe ehrẹ nọ ọ jẹ kẹ omẹ. Eva e were omẹ gaga inọ mai imava ma rọ ikpe yena kpobi gọ Jihova re o te ti whu.

ME YERE JIHOVA GAGA INỌ O FIOBỌHỌ KẸ OMẸ

Jihova ọ sẹro uzuazọ mẹ evaọ ebẹbẹ yena kpobi nọ i te omẹ na. O fiobọhọ kẹ omẹ nọ mẹ rọ siọ omovuọ ba nọ mẹ be sai ro kuomagbe ahwo. Yọ o ru nọ me ro ru iruo imishọnare. (2 Tim. 1:7) Me yere Jihova gaga re nọ mẹ avọ oniọvo mẹ ọmọtẹ ọrọ ọmaha ma rrọ iruo odibọgba oke-kpobi. Ọzae oniọvo mẹ na yọ ọsẹro okogho. Ikoko nọ a rẹ jọ ta ẹvẹrẹ Serbian o bi rri evaọ Europe. Olẹ nọ ọsẹ mẹ ọ jẹ lẹ inọ ọ gwọlọ nọ emọ ivẹ riẹ a rẹ jọ iruo odibọgba oke-kpobi na, Ọghẹnẹ o gine yoi.

Eware nọ mẹ jọ Ebaibol wuhrẹ i bi ru eva were omẹ. Nọ eware e tẹ rrọ gaga kẹ omẹ, mẹ rẹ “ruabọhọ olẹ ga viere.” Yọ ere Jesu o ru evaọ okenọ ọ jọ otọakpọ. (Luk 22:44) Ukoko Nadezhda mẹ rrọ evaọ Sofia. Jihova ọ rọ inievo nọ ma gbẹ rrọ ukoko na rọ kẹ uyo elẹ mẹ no. Inievo na a you omẹ gaga. A re zizie omẹ ẹsejọ re ma gbẹ reakpọ kuoma. Yọ a re yere omẹ gaga kẹ epanọ mẹ be daoma te. Enana kpobi e be lẹliẹ eva were omẹ gaga.

Ẹsibuobu me re roro kpahe oghẹrẹ nọ eware e te jọ evaọ okenọ Ọghẹnẹ ọ te kpare ahwo nọ a whu no ze. Mẹ rẹ jọ iroro mẹ ruẹ ọsẹgboni mẹ nọ a rrọ aro uwou mai nọ oma rai o rrọ bọbọbọ nwane wọhọ epanọ a jọ evaọ oke nọ a rọo obọ. Yọ mẹ rẹ ruẹ oniọvo-ọmọtẹ mẹ nọ o bi there emamọ emu jọ. Mẹ rẹ jọ iroro mẹ ruẹ ọzae mẹ nọ o dikihẹ kẹle anyenya riẹ. Eware nana nọ mẹ be hai roro kpahe na e be lẹliẹ udu te omẹ otọ. Yọ u ru nọ me bi ro yere Jihova gaga.

Nọ mẹ tẹ kareghẹhọ eware nọ me ru, uzuazọ nọ me yeri no, je roro kpahe oghẹrẹ nọ eware e te jọ evaọ obaro, o rẹ lẹliẹ eva were omẹ. Yọ o lẹliẹ omẹ riẹ nọ ẹme nọ Devidi ọ ta evaọ Olezi 27:13, 14 na uzẹme, inọ: “Diẹse mẹ hae te jọ ogbẹrọnọ me wo ẹrọwọ họ inọ mẹ te ruẹ ewoma Jihova evaọ ẹkwotọ enọ e rrọ uzuazọ? Fi ẹruore ra họ Jihova; wo udu je kru oma ga. Ẹhẹ, fi ẹruore ra họ Jihova.”