Oghẹrẹ nọ Adha Ọ rẹ rọ Riẹ Eware nọ E Wariẹ e Riẹ Họ

Dede nọ edha e rẹ ruẹ ude, u wo oghẹrẹ nọ e rẹ rọ riẹ eware nọ e wariẹ e rai họ nọ e tẹ be rra evaọ aso. Edo nọ o bi no oware ze e rẹ rọ riẹ epanọ oware o kẹle hayo thabọ te. Wọhọ oriruo, u wo edha jọ nọ i re yo edo amara nọ ọ be rra vrẹ, a vẹ riẹ sọ unwe hayo ofe fiki oghẹrẹ nọ amara na o be tehe ibekpe riẹ vẹrẹ te.

Roro kpahe onana: Edha buobu e rẹ jọ urru rai ru edo, e vẹ rọ unu hayo inwe rọ edo na lahwe. Kẹsena nọ edo na o je kie oware jọ nọ o rrọ etẹe, e vẹ rọ ezọ ilogbo rai na riẹ epanọ oware na o kẹle hayo thabọ te. Edo nọ o bi no eware nana ze na oye adha ọ rẹ rọ riẹ oghẹrẹ nọ eware sa-sa nọ e wariẹ e riẹ họ e rrọ. Enẹ adha ọ rẹ rọ riẹ oria nọ oware ọ rrọ, oghẹrẹ nọ oware na u kpotọ hayo kpehru te, gbe epanọ o kẹle riẹ hayo thabọ kẹe te. Yọ adha ọ rẹ sai ru onana dede nọ edha efa nọ e rrọ etẹe i bi ru edo re.

U fo nọ ezọ adha e rẹ vẹvẹ ziezi keme ọ gbẹ riẹ oghẹrẹ nọ oware o kẹle hayo thabọ te he, ọ sae rra vrẹ oware nọ ọ gwọlọ na. Ahwo jọ nọ a re ru ekiakiẹ a ta nọ o rrọ bẹbẹ gaga re a sae rọ edo riẹ oria nọ oware o rrọ dẹẹ. Rekọ adha ọ rẹ sae rọ edo riẹ oria nọ oware o rrọ dẹẹ, gbe epanọ o kẹle hayo thabọ te, tube vi epanọ ahwo nọ a re ru ekiakiẹ a roro.

Ahwo nọ a re ru ekiakiẹ a ru oghẹrẹ ọkpọ jọ nọ ahwo nọ a tuaro a re kru rọ nya. Ọkpọ nana o re fiobọhọ kẹ ohwo nọ o tuaro riẹ eware nọ e wariẹ e riẹ họ, re ọ siọ owọ ba ekpehọ oware jọ. Ọkpọ na ọ rẹ sai tube fiobọhọ kẹ ohwo nọ o tuaro riẹ eware nọ e rrọ ehru uzou riẹ nọ ọ rẹ sai kpe uzou họ, wọhọ ogha ure. Ahwo nọ a ru ọkpọ nana, a se rie ọkpọ adha. Imava jọ evaọ usu ahwo nọ a ru ọkpọ na nọ a re se Brian Hoyle avọ Dean Waters a ta nọ: “Oware nọ o mai fiobọhọ kẹ omai evaọ iruo na họ, ma rri oghẹrẹ nọ adha ọ rẹ rọ rehọ edo nọ o bi no oware ze rọ riẹ eware nọ e wariẹ e riẹ họ.”

Ẹvẹ who roro? Kọ edhere igbunu nana nọ adha ọ rẹ rọ rehọ edo nọ o bi no oware ze rọ riẹ eware nọ e wariẹ e riẹ họ na, u mu romavia? Manikọ ẹma a ma riẹ?