Ehru Uzou Emeri nọ A re Se Remora

Remora yọ oghẹrẹ emeri ọsese jọ nọ ọ rẹ sae ta omariẹ mu emama ilogbo nọ e rrọ abade, ọ vẹ jẹ sai si omariẹ no lọlọhọ, yọ ọ rẹ nwa omama ologbo nọ ọ tamu na oma ha. U kri no nọ oware nana nọ emeri nana ọ be sai ru na, u bi ro gbe ahwo nọ a rẹ kiẹ kpahe oghoghẹrẹ eware unu.

Roro kpahe onana: Emeri nana ọ rẹ sai tamu iye ekpakpala sa-sa, eshake, igbe-ame, iwheli, gbe emama efa nọ e rrọ abade na, ghele oghẹrẹ nọ ohọrọ rai hayo ekpe rai o riẹriẹ hayo krase te. Emera gbe emu nọ eri ologbo nọ ọ tamu na ọ re kiọkọ, ọye emeri nana ọ rẹ re. Evaọ oke nana kpobi yọ eri ologbo nọ ọ tamu na ọ be wọe dhẹ kpohọ oria kpobi, wọhọ ohwo nọ ọ ruọ omoto ọvẹvẹ, omama nọ ọ tamu na o vẹ jẹ thọe nọ emama efa nọ e rẹ sae re iẹe no. Ahwo nọ a rẹ kiẹ kpahe oghoghẹrẹ eware a bi wuhrẹ kpahe ehru uzou emeri nana nọ o rẹ tamu na, re a riẹ oghẹrẹ nọ o be sae rọ tamu oghoghẹrẹ eria ababọ oria nọ ọ tamu na nọ ọ rẹ nwa oma, yọ o re kie noi hi.

Remora nọ e be ya ame lele eshake

Oria nọ emeri nana ọ rẹ rọ tamu omama ofa na o rrọ gheghelie, yọ ehru uzou riẹ o rrọ. Akotọ oria ugheghelie na wariẹ họ u wo okpa jẹ rrọ lọlọhọ, nọ u re ru nọ ọ sae rọ tamu oware kakaraka, yọ o re kie noi hi. Obeva oria ugheghelie na u wo igbuhru esese nọ e rrọ gaga nọ i dhe uhie họ. Nọ eria nọ e rrọ igbigburu na e tẹ zare vi, emeri na ọ vẹ rọ oria nana tamu eri ologbo na, yọ o re kie no oria nọ ọ tamu na ha, ajokpanọ ọye ọvo o re si omariẹ no. Oghẹrẹ nana nọ emeri nana ọ rẹ rọ tamu oria na, u re ru nọ ọ rẹ rọ tamu ziezi ababọ ekie nọ o re kie, ghelọ oghẹrẹ nọ ehri ologbo nọ ọ tamu na ọ be dhẹ vẹrẹ te hayo nọ ọ tẹ maki kuomarẹriẹ idudhe.

Oware nọ o rrọ ehru uzou emeri nọ a re se remora nọ o rẹ tamu na o were ahwo nọ a re ku eware gaga, fikiere a te ku oware ugheghelie nọ o wọhọ orọ emeri nọ o rẹ tamu na. Oware ugheghelie rai nọ a ku na o rẹ sae tamu oghoghẹrẹ eria. Nọ ahwo nọ a re ku eware na a jẹ gwọlọ si ei no oria nọ a rehọ e riẹ ta mu, o jọ bẹbẹ gaga re a sai si ei noi, dede nọ oware nọ a je ro si ei no na o rehọ akwa udhusoi gbẹdẹ vi ei.

A sae rehọ eware nọ a rri uzou emeri nana ro ku ru eware buobu. Eware jọ nọ a sae rehọ ai ru họ, a sae rehọ ae tamu emama nọ e rrọ obọ abade re a sae kiẹ kpahe ae, a sae rehọ ae kiẹ kpahe eware nọ e be via evaọ obotọ abade, a sae je rehọ ae tamu ikpẹ gbe eware efa nọ a re fihọ obotọ akwa nọ imoto e rẹ dhẹ gbe obotọ ekọ ilogbo.

Ẹvẹ who roro? Kọ ehru uzou emeri nọ a re se remora nọ ọ rẹ rọ tamu emama sa-sa na u mu romavia? Manikọ ẹma a ma riẹ?