Me Fiobọhọ kẹ Ọzae Mẹ Kurẹriẹ “Ababọ Ẹme” nọ Mẹ Ta Kẹe

Ukpe 1952 a yẹ omẹ evaọ obọ Romania. Dede nọ oni mẹ ọ jọ Osẹri Jihova nọ ọ họ-ame no, o kruga evaọ ukoko na ha, fikiere me je kpohọ ewuhrẹ hẹ. U te no ere no, evaọ oke yena, esuo nọ ọ jọ orẹwho Romania yọ esuo nọ a jẹ jọ rọ obọ ogaga kru ahwo. Yọ egọmeti ọ rọwo nọ Isẹri Jihova a printi ebe hayo ta usi uwoma ha. Fikiere bọwo oke nọ mẹ rọ kpako te ikpe ọgbagbezeza, mẹ riẹ Jihova ha, yọ mẹ riẹ oware nọ o rrọ Ebaibol ho. Rekọ evaọ ukpe 1988 nọ mẹ avọ ọzae mẹ István ma jẹ rria ẹwho Satu-Mare, oware jọ o via nọ u nwene uzuazọ mẹ.

Oware jọ nọ Mẹ Sae Se Vievie He

Ẹdẹ jọ oni mẹ o te weze bru omẹ ze. Ọ tẹ ta kẹ omẹ nọ: “Mẹ gwọlọ nyae ruẹ oniọvo mẹ. Ma gbẹ nya? Ma tẹ ruẹ e riẹ no, ma ve kpobọ eki nyae dẹ eware.” Fikinọ me wo oware ovo nọ me bi ru ẹdẹ yena ha, mẹ tẹ rọwo nọ me re lele iei.

Nọ ma te obọ uwou oniọvo oni mẹ na, mẹ tẹ ruẹ nọ a be jọ uwou riẹ ru iwuhrẹ Isẹri Jihova evaọ ẹdẹ yena, yọ imazii efa a kuomagbe ai evaọ ewuhrẹ na. Kpakọ oni mẹ ọ wariẹ kruga ziezi no evaọ ukoko Jihova. Oware nọ me yo evaọ ewuhrẹ na ẹdẹ yena o te omẹ udu.

Nọ ewuhrẹ na o kuhọ no, oniọvo nọ o ru ewuhrẹ na ọ tẹ nyabru omẹ ze ti yere omẹ. Ọ ta nọ: “Odẹ mẹ János. Me muẹrohọ nọ whọ jẹ gaviezọ ziezi evaọ ewuhrẹ na. Kọ eware nọ who yo nẹnẹ na e were owhẹ?” Mẹ tẹ vuẹe nọ me ri kpohọ ewuhrẹ otiọna ẹdẹvo ho, yọ mẹ gwọlọ nyaze oke ofa. Ọ tẹ nọ omẹ nọ: “Kọ whọ gwọlọ nọ a wuhrẹ Ebaibol na kugbe owhẹ?” Onana yọ oware nọ mẹ sae se vievie he. Me rri rie nọ Ọghẹnẹ ọye ọ wha omẹ bru ahwo nana.

Okiokiọ riẹ, János o te dhesẹ omẹ kẹ oniọvo-ọmọtẹ jọ nọ a re se Ida, o te mu Ebaibol họ ewuhrẹ kugbe omẹ. Rekọ ozọ u je mu omẹ inọ eva e te were ọzae mẹ István he nọ ọ tẹ ruẹ nọ Isẹri Jihova a bi wuhrẹ Ebaibol kugbe omẹ. Mẹ daoma unuẹse buobu re mẹ vuẹ kpahe onana, rekọ ọ jẹ kẹ omẹ ovao ho. Mẹ riẹ nọ Ebaibol nọ me bi wuhrẹ na o were riẹ hẹ.

O make rrọ ere na, mẹ ruabọhọ uwuhrẹ Ebaibol na, mẹ tẹ họ-ame evaọ Aria 1989. Nọ emerae ene e vrẹ no, esuo nọ a jẹ jọ rọ obọ ogaga kru ahwo nọ o jọ orẹwho Romania oke yena u te kie, a te kpe osu orẹwho na no.

Ukpokpoma O Wariẹ Ga

Nọ esuo yena o kuhọ no, egọmeti ọ tẹ kẹ omai umuvẹ nọ ma jẹ rọ gọ Jihova. A kẹ Isẹri Jihova uvẹ nọ a rẹ rọ ta usi uwoma je kuomagbe ru iwuhrẹ ababọ ukpokpoma. Rekọ rọkẹ omẹ, uvẹ nana nọ egọmeti ọ kẹ omai na o lẹliẹ ukpokpoma nọ u je te omẹ ga. Ọzae mẹ ọ ta kẹ omẹ nọ, “Oware kpobi nọ whọ rọwo evaọ Ebaibol na, ovo u te omẹ hẹ. Thakpinọ whọ nyae ta usi uwoma no uwou ruọ uwou hu.”

Uzẹme riẹ họ, mẹ sae siọ usi uwoma ba ẹta ha. (Iruẹru Ikọ 4:20) Rekọ areghẹ me je ro ru ei. Ẹdẹ jọ, egbẹnyusu ọzae mẹ a tẹ ruẹ omẹ nọ mẹ be a usi uwoma no uwou ruọ uwou, a tẹ vuẹ ọzae mẹ. Nọ me te obọ uwou, ọzae mẹ o te bi do ku omẹ nọ, “Who bi kpomovuọ họ omẹ oma gbe uviuwou na soso!” O te fi amagha kẹle omẹ uvou, inọ o ti kpe omẹ no otẹrọnọ mẹ siọ usi uwoma ba ẹta ha.

Mẹ jẹ daoma vuẹ ọzae mẹ oware nọ mẹ gbẹ sae rọ siọ usi uwoma ba ha, mẹ tẹ jẹ vuẹe nọ me you rie. O wọhọ nọ ẹme nọ mẹ ta kẹe na ọ lẹliẹ udu riẹ te otọ evaọ omoke jọ. Rekọ nọ omoni ọzae mẹ jọ o je ru ehaa orọo, mẹ jẹ se nọ mẹ be nya ha, eva e tẹ jẹ wariẹ mu ọzae mẹ họ ẹdha. U te ru nọ o ro je mu eme edada họ ẹta kẹ omẹ.

O kẹ omẹ uye gaga inọ evaọ ikpe ikpegbesa mẹ reoja evaọ obọ ọzae mẹ fiki eva nọ e jẹ dhae na. Evaọ etoke yena, ọ jẹ tubẹ ta nọ ọ rẹ fa orọo mai na. Ẹsejọ, ọ rẹ kare ẹthẹ dhe omẹ fihọ otegu. Ẹsejọ ọ vẹ ta kẹ omẹ nọ mẹ kwa ewha mẹ re me no uwou na.

Eme o fiobọhọ kẹ omẹ thihakọ? Mẹ lẹ se Jihova inọ o ru re udu mẹ u totọ. Yọ o gine fiobọhọ kẹ omẹ gaga. (Olezi 55:22) Inievo ukoko na a bọ omẹ ga ziezi re. Ekpako ukoko gbe inievo-emetẹ jọ nọ i kruga ziezi evaọ ukoko na a tuduhọ omẹ awọ, a ta kẹ omẹ nọ mẹ siọ Jihova ba ẹgọ họ. A vuẹ omẹ nọ mẹ kareghẹhọ ẹme nọ Ebaibol ọ ta kpahe eyae jọ nọ i kru ẹrọwọ rai ghelọ oware kpobi nọ o via kẹhẹ, a tẹ rọ ere fiobọhọ kẹ ezae rai kurẹriẹ “ababọ ẹme nọ a ta kẹ ae.” (1 Pita 3:1) Uwhremu na, ere o via kẹ omẹ re.

Epanọ Eware I ro Nwene

Evaọ ukpe 2001, okie o kie ọzae mẹ, onọ u ru nọ ọ gbẹ jẹ sae rọ nya ha. Ọ jọ ọspito evaọ amara soso, kẹsena evaọ eka buobu ọ tẹ jọ oria nọ a jẹ jọ rẹrotei re oma riẹ na o ga. Evaọ oke yena kpobi, mẹ jọ kugbei. Mẹ jẹ kẹe emu, ta ẹme kẹe, jẹ ruẹ nọ oware ovo o kare riẹ hẹ.

Inievo ukoko na a jẹ nya bru ei ze te ruẹ e riẹ. Ọzae mẹ ọ tẹ te ruẹ epanọ inievo na a wo uyoyou gbe ẹwo te. Inievo na buobu a je lele omai ru iruo uwou. Yọ ekpako na a jẹ tuduhọ omai awọ jẹ sasa omai oma.

Oware nọ inievo ukoko na a ru na u te ọzae mẹ udu gaga, o tẹ jẹ kẹe uye gaga inọ o bi kpokpo omẹ anwẹdẹ. O te muẹrohọ nọ ogbẹnyusu riẹ ọvuọvo ọ nyaze te ruẹ e riẹ hẹ. Nọ ọzae mẹ o no ọspito ze no, ọ tẹ ta nọ, “Mẹ gwọlọ nọ a wuhrẹ Ebaibol na kugbe omẹ re me zihe ruọ Osẹri Jihova.” Eva e were omẹ te epanọ irui-oviẹ i je ro no omẹ aro ze.

Evaọ amara Asoi 2005, István ọzae mẹ ọ tẹ họ-ame. Fikinọ ọ be sae nya ha, inievo na ae a rọ akaba-ọmo ghelie ei kẹle oria ame-ọhọ na, a tẹ rọ ẹmẹrera wọe fihọ ame na, kẹsena a tẹ họe ame. Ọzae mẹ o te ti wo ọwhọ gaga kẹ usi uwoma Uvie na. Rite inẹnẹ, mẹ gbẹ be kareghẹhọ oke nọ mẹ avọ iẹe ma jẹ hai kpohọ usi uwoma ota, yọ eva e be were omai. U woma kẹhẹ! Ọzae nọ o je kpokpo omẹ inọ mẹ siọ usi uwoma ba ẹta na, ọye mẹ avọ iẹe ma be rọ evawere whowho usi Uvie na.

Ọzae mẹ o te ti you Jihova gaga, yọ ọ jẹ hae rọ uvẹ kpobi nọ o wo se Ebaibol na je wuhrẹ eria Ebaibol buobu fihọ uzou. O rẹ were iẹe gaga re o lele inievo ukoko na efa ta kpahe eria Ebaibol nọ o se. Ọ rẹ rọ uvẹ yena tuduhọ inievo na awọ.

Ẹyao ọzae mẹ na o te je dhe ẹgẹga. Nọ okie o kie ei unuẹse bro no, ọ gbẹ jẹ sae ta ẹme he, yọ uwhremu na o gbe je no ehwa ha. Kọ ẹbẹbẹ na ọ lẹliẹ e riẹ siọ Jihova ba ẹgọ? Kakaka! Ọ gbẹ jẹ daoma kpobi re o se Ebaibol na. Nọ inievo ukoko na a tẹ nyaze te ruẹ e riẹ, ọ rẹ rọ oware jọ nọ o wọhọ ekọmputa lele ai ta ẹme jẹ bọ ẹrọwọ rai ga. Oniọvo-ọmọzae jọ ọ ta nọ: “O rẹ were omẹ gaga re mẹ nyae ruẹ István. Oke kpobi nọ mẹ nyae ruẹ e riẹ, ọ rẹ sasa omẹ oma gaga, yọ ọwhọ ọ rẹ jọ omẹ oma.”

Evaọ amara Akpegbivẹ 2015, István ọzae mẹ o te whu. O kẹ omẹ uye gaga. Uwhu riẹ na o da omẹ wo umuo ho. Rekọ re a ta uzẹme, uwhu riẹ na o lẹliẹ udu te omẹ otọ. Ẹvẹ mẹ rọ ta ere? Ikpe buobu taure ọzae mẹ o te ti whu, o zihe ruọ ogbẹnyusu Jihova. Onana o lẹliẹ eva were omẹ thesiwa. Mẹ riẹ nọ István ọzae mẹ avọ oni mẹ a rọ usu ahwo nọ Jihova ọ te kpare ze evaọ akpọ ọkpokpọ na. Evaọ oke yena, me ve ti dede ai, yọ eva nọ e te were omai, a rẹ ruẹ unu gbiku riẹ hẹ.

O vrẹ ikpe ọgbagbisoi no nọ mẹ avọ oni mẹ ma rọ nyae ruẹ oniọvo oni mẹ na, yọ iweze yena ọ rẹ thọrọ omẹ ẹro ho. Mẹ dina kpako vrẹ ikpe udhosa-gbikpe no, yọ mẹ rrọ ọkobaro oke-kpobi. Utho nana nọ me bi ru na me bi ro yere Jihova rọkẹ eware kpobi nọ o ru kẹ omẹ no. (Olezi 116:12) O fiobọhọ kẹ omẹ kru ẹrọwọ mẹ je ru udu te omẹ otọ evaọ oke ukpokpoma. Yọ dede nọ ọzae mẹ o je kpokpo omẹ, mẹ ruẹ nọ eware e rẹ sai nwene. Dede nọ me rẹro riẹ inọ o te via ẹdẹvo ho, me fiobọhọ kẹ ọzae mẹ kurẹriẹ “ababọ ẹme” nọ mẹ ta kẹe.