Abraham–Ogbẹnyusu Ọghẹnẹ

OMỌVO eria nọ ahwo a nya e ria nọ owhe na ọ vrẹ no a re sei Ọr. Ọ tẹ te jọ okpẹwho ologbo gaga avọ emamọ iwou nọ e riẹ. Rekọ ahwo nọ a jọ etẹe a jẹ gọ eghẹnẹ erue. Ere a je ru eva obọ Bebẹl re. Ahwo obọ Ọr avọ Bebẹl a wọhọ Noa avọ ọmọ riẹ Shẹm ho, nọ a gbẹ jẹ gọ Jihova.

Urere riẹ, nọ ikpe 350 e vrẹ no owhe na, Noa ohwo ẹrọwọ na o te whu. Ikpe ivẹ evo e vrẹ no tao re a te yẹ ọzae nọ whọ be ruẹ eva ifoto na. Ọ jọ ohwo oghẹrẹ sa gaga kẹ Ọghẹnẹ. A se odẹ riẹ Abraham. Avọ uviuwou riẹ a jẹ ria evaọ okpẹwho Ọr.

Ẹdẹ jọ Jihova ọ tẹ ta kẹ Abraham; ‘Nya se Ọr avọ imoni ra ba, who kpohọ orẹwho nọ me ti dhesẹ k’owhẹ.’ Kọ Abraham o yoẹme Ọghẹnẹ re ọ nya se ẹlọlọhọ Ọr ba? Ẹhẹ, o ru ere. Yọ fiki nọ kẹse kẹse Abraham o je he yoẹme Ọghẹnẹ jabọ nọ a je sei ogbẹnyusu Ọghẹnẹ.

Ahwo uviuwou Abraham jọ a lele i rie okenọ o no Ọr. Ọsẹ riẹ Tẹra o ru erei. Erere, ọmọ oniọvo riẹ Lọt. Yọ, whọ riẹ vẹre, aye Abraham, Sera ọ nya re. A te ti te oria nọ a re se Heran, etẹe Tẹra o je whu. A jọ thethabọ no Ọr.

Omoke o vrẹ, Abraham avọ ekru riẹ a te no Heran ze otọ nọ a re se Kenan. Etẹe Jihova ọ jẹ ta nọ: ‘Onana họ otọ nọ mẹ te rọ kẹ emọ ra.’ Abraham ọ tẹ daji eva Kenan jẹ ria eva iwou-iwhre.

Ọghẹnẹ o te mu obọ họ efihọ kẹ Abraham te epanọ o ro wo ithuru igodẹ buobu gbe erao efa gbe idibo buobu. Rekọ ọye avọ Sera a wo emọ obọ rai ọvuọvo ho.

Okenọ Abraham ọ kpako te ikpe 99, Jihova ọ tẹ ta nọ: ‘Mẹ ya nọ whọ te jọ ọsẹ kẹ erẹwho ahwo buobu.’ Rekọ k’ẹvẹ onana o te sae jọ, nọ Abraham avọ Sera a kpako vi ọmọ o yẹ no na?