Eyae Ewharo Ivẹ

OKENỌ Ahwo-Izrẹl a ruọ eva uye, a te bo se Jihova. Jihova o yo kae ọ jẹ kae isu ewharo re ofiobọhọ kae. Ebaibol o se isu nana ibruoziẹ. Joshua ọ jọ obroziẹ ọsosuọ, ibroziẹ jọ nọ e te jariẹ nọ u noi no a je sai odẹ nọ Othniẹl, Ehud gbe Shamga. Rekọ imava jọ nọ ifiobọhọ kẹ ahwo Izrẹl eyae nọ a re se odẹ rai Debora gbe Jaẹl.

Debora ọruaro aye. Jihova ọ jẹ hae rehọ ovuẹ kẹe kpahe obaro, kọ ọ jẹ hẹ ta oware nọ Jihova ọ ta kẹ ahwo. Debora ọ jọ obroziẹ re. Ọ jẹ hae keria otọ oriẹ eva ukpehru orẹwho na, ahwo kọ a jẹ hae nya bru rie re awo obọfihọ rono obọ riẹ ze rọ kẹ ẹbẹbẹ rai.

Oke nana yọ Jabin ọ rọ ovie Kenan. O wo enyenya ẹmo 900. Egbaẹmo riẹ a tẹ ga hrọ nọ a rọ duọ Ahwo-Izrẹl buobu họ ze idibo Jabin. Ọ nọ owuzou egbaẹmo Jabin Ovie na, a re sei Sisera.

Ẹdẹjọ Debora ọ tẹ vuẹ uwou se Berak Obruoziẹ, ọ tẹ ta kẹe nọ: ‘Jihova ọ ta nọ: “Rehọ ezae 10,000 re who sua’i kpohọ ugbehru Tabọ. Etẹe mẹ te jọ rehọ Sisera se owhẹ. Mẹ rẹ te rehọ obọfikparọ riẹ avọ ogbaẹmo riẹ kẹ owhẹ.”’

Berak ọ tẹ ta kẹ Debora nọ: ‘Mẹ rẹ nya otẹrọnọ whore lele omẹ nya re.’ Debora o te lelie nya, rekọ ọ tẹ ta kẹ Berak inọ: ‘Whọ te sai wo odẹ obọkparọ naha, keme Jihova ọ be te rehọ Sisera fihọ obọ aye.’ Kọ onana họ onọ ovia.

Berak ọ tẹ ruọ otọ no ugbehru Tabọ be nyai zere egbaẹmo Sisera. Idudhena Jihova ọ tẹ rehọ ẹvo ku, egbaẹmo ewegrẹ na ibuobu etẹ da ame whu. Rekọ Sisera ọ ruọ ehru eketekete riẹ ọ tẹ dhẹ vabọ.

Nọ uno ere no omoke kakao ọ tẹ ze obọ uwoudhu Jaẹl. Aye na te sei ruọ uwou, ọ tẹ kẹe ame ivie jọ. Onana u te ruei wezẹ, ọ tẹ nwane wezẹ didi. Kesena Jaẹl ọ tẹ rehọ ozuẹ ro duwu uzou ọzae oyoma na. Uwhremuna nọ Berak ọnyaze, aye na o te dhesẹ ori ọ Sisera rọ kẹe! Fikiere whọ sae ruẹ nọ oware nọ Debora ọ ta urugba.

Ukuhọriẹ a kpe Jabin Ovie no, Ahwo-Izrẹl a te je wo udhedhẹ eva omoke.