Osu Ọkpokpọ gbe Eyae Ivẹ nọ E Gudu

Nọ Joshua o su ahwo Jihova ahwo Izrẹl ikpe buobu no, o te ti whu evaọ okenọ ọ jọ ikpe udhusoi-gbikpe (110). Okenọ Joshua ọ jọ akpọ, ahwo Izrẹl a jẹ gọ Jihova. Rekọ nọ Joshua o whu no, a te mu edhọ họ ẹgọ wọhọ epanọ ahwo Kenan a je ru. Fikinọ ahwo Izrẹl a gbẹ jẹ gọ Jihova ha, Jihova ọ tẹ kẹ ovie Kenan nọ a re se Jabin uvẹ re o ru akpọ bẹ ai. Ahwo Izrẹl a tẹ jẹ viẹ se Jihova nọ o fiobọhọ kẹ ai. Fikiere Jihova ọ tẹ rehọ osu ọkpokpọ nọ a re se Berak mu kẹ ai. Osu ọkpokpọ nana o ti fiobọhọ kẹ ai zihe bru Jihova ze.

Ọruẹaro-aye jọ nọ a re se Debora o te vi ohwo nyai se Berak nọ ọ nyaze. Ọ tẹ ta kẹe nọ Jihova ọ ta nọ: ‘Rehọ ezae idu ikpe (10,000) lele oma, re wha nyai lele egbaẹmo Jabin họre evaọ oko-ame Kaeshọn. Etẹe wha ti jo fi oletu ogbaẹmo Jabin nọ a re se Sisera kparobọ.’ Berak ọ tẹ ta kẹ Debora nọ: ‘Otẹrọnọ who ti lele omẹ, mẹ te nya.’ Debora ọ tẹ ta kẹe nọ: ‘Me ti lele owhẹ. Rekọ riẹ nọ whẹ họ ọnọ o ti kpe Sisera ha. Jihova ọ ta nọ aye o ti kpe Sisera.’

Debora o te gine lele Berak avọ egbaẹmo riẹ kpobọ Ugbehru Tebọ re a ruẹrẹ oma kpahe kẹ ẹmo na. Nọ Sisera ọ nwani yo kpahe onana, o te koko egbaẹmo riẹ họ ukiekpotọ Kaeshọn na. Debora ọ tẹ ta kẹ Berak nọ: ‘Nẹnẹ na Jihova o ti ru owhai fi kparobọ.’ Berak avọ egbaẹmo idu ikpe (10,000) riẹ a tẹ họrọ ruọ ukiekpotọ na bru egbaẹmo egaga Sisera.

Jihova o te ru oso rrọ nọ ukiekpotọ na soso u ro ku ame. Ekẹkẹ-ẹmo Sisera i te zue ruọ ọloho. Sisera o te nwrotọ no akẹkẹ-ẹmo riẹ, o te muhọ ẹdhẹ. Berak avọ egbaẹmo riẹ a te fi egbaẹmo Sisera kparobọ, rekọ Sisera ọ dhẹ vabọ! Sisera ọ tẹ dhẹ nyai dhere uwou aye jọ nọ a re se Jeẹl. Aye na ọ tẹ kẹe imiliki da. Kẹsena Sisera o te kiẹzẹ, aye na ọ tẹ rehọ ohọ wowo iei. Fikinọ oma o rrọ Sisera no, owezẹ u te su ei vrẹ. Kẹsena Jeẹl ọ tẹ kuẹlẹ ze, ọ tẹ tehe ughele nọ a rẹ rọ tehe uwou-udhu nyaotọ fihọ uzou riẹ. Sisera o te whu.

Berak ọ tẹ gwọlọ Sisera te uwou Jeẹl. Nọ Jeẹl o no uwou ze ọ tẹ ta kẹ Berak nọ: ‘Ruọ uwou me dhesẹ ọzae nọ whọ be gwọlọ na kẹ owhẹ.’ Berak ọ tẹ ruọ uwou, ọ tẹ ruẹ Sisera nọ o whu fihọ otọ. Berak avọ Debora a tẹ so ile ro jiri Jihova fikinọ o fiobọhọ kẹ ai fi ewegrẹ rai kparobọ. Evaọ ikpe udhuvẹ (40) nọ i lele i rie, ahwo Izrẹl a te wo udhedhẹ.