Uzou 1

Okugbe Evaọ Egagọ—Eme U fo nọ U re Dhesẹ k’Owhẹ?

1, 2. (a) Ẹkwoma eme a be sae rọ rehọ okugbe egagọ rọ ze evaọ edẹ mai na? (b) Ẹvẹ Ebaibol i dhesẹ oware nọ o be via na?

WARIẸ akpọ na họ ẹnyaharo ogbunu jọ ọ riẹ kpahọ okugbe egagọ. U bi si ahwo erẹwho gbe erua gbe erọ-unu kpobi kugbe. Orọnọ ẹjẹrehọ orọwọ amọfa o be wha okugbe rai onana ze he. A bi woi fikinọ a be whaha eme iyoma e ta kpahe iyero uzuazọ nọ e rọwo kugbe Ẹme Ọghẹnẹ ha ha. Kọ eme o be wha onana ze? Uzẹme na họ ahwo nọ i no egheghẹrẹ eria ze a be nyaze te riẹ Jihova wọhọ Ọghẹnẹ uzẹme ọvo na, u te je bi no ai eva ze re a rehọ izuazọ rai rọwo kugbe idhere ikiẹrẹe riẹ.—Wawo Eviavia 15:3, 4.

² Onana yọ orugba eruẹaruẹ nọ Maeka o kere fihọ otọ ole ikpe 2,700 jọ nọ i kpemu no. Rọ kpahe “edẹ urere” na, o kere nọ: “Erẹwho buobu e rẹ te tha, a vẹ te ta nọ: ‘Wha nyaze, re ma kpobọ ugbehru ỌNOWO na, obọ uwou Ọghẹnẹ Jekọp; re o wuhrẹ omai idhere riẹ jegbe re ma nya evaọ idhere riẹ.’” (Mae. 4:1, 2)a Whọ be ruẹ oyena nọ o be via?

3, 4. (a) Ẹvẹ o rọ rọ uzẹme nọ “erẹwho” i bi kurẹriẹ bru Jihova? (b) Didi enọ ma rẹ nọ omobọ mai?

³ “Erẹwho” ọvuọvo nọ ai kpobi e rehọ oma rai ziọ uwou ẹzi Jihova kẹ egagọ no e riẹ hẹ. Rekọ omomọvo rono erẹwho eyena ze i bi ru ere. Epanọ a ro wuhrẹ kpahe ẹjiroro oyoyou gbe iruemu isiuru ọ Jihova Ọghẹnẹ, u te duobọ te ai udu. A tẹ be rehọ omarokpotọ n’ekpẹ oware nọ Ọghẹnẹ ọ gwọlọ mi ai. Olẹ rai o wọhọ orọ Devidi, ọzae ẹrọwọ nọ ọ ta nọ: “Wuhrẹ omẹ re me ru orọ eva ra, keme whẹ họ Ọghẹnẹ mẹ.”—Ol. 143:10.

⁴ Kọ whọ ruẹ omara eva usu ogbotu obuobu ọyena nọ e be gọ Jihova? Kọ uyo nọ whọ be kpahe fihọ ehrẹ nọ who bi yo na e be kẹ imuẹro nọ who ghine wo ovuhumuo nnọ Jihova họ ehri riẹ? Ẹvẹ whọ be jọ evaọ ‘idhere riẹ nya te’?

Oghẹrẹ Nọ A Ro Woi

5. (a) Ẹvẹ a ti wo okugbe egagọ thabọ te evaọ obaro? (b) Fikieme o jẹ rọ oware okpakpata re ohwo o zihe ruọ ọnọ ọ be gọ Jihova obọnana, kọ ẹvẹ ma rẹ sai ro fiobọhọ kẹ amọfa ru onana?

⁵ Ẹjiroro Jihova họ re emama nọ i wo areghẹ kpobi a jọ okugbe eva egagọ—ọvuọvo nọ erue i re su thọ ọ rẹ jariẹ hẹ, ọvuọvo nọ o re we fikinọ a sae be ruẹ uvi otofa uzuazọ họ ọ rẹ ja riẹ hẹ. Ẹvẹ ma bi rẹro ẹdẹ na te nọ enọ e be rria kpobi a ti jiri Ọghẹnẹ uzẹme ọvo na! (Ol. 103:19-22) Rekọ taure oyena o tẹ te ze, Jihova ọ te kaki si ahwo nọ e be se ọkwa-ovie oyoyou riẹ gbe enọ e rẹ gwọlọ raha akpọ ku amọfa abọ no. Ọ rọ ohrọriọ kẹ ọjọriẹ krẹkri kpahe oware nọ o bi ti ru. Eva eria kpobi ahwo a wo uvẹ nọ a rẹ sai ro nwene idhere rai. Fikiere evaọ oke mai na ovuẹ okpakpata onana a be tae nya akpọ na soso duwu: “Dhozọ Ọghẹnẹ jẹ rehọ oruaro kẹ e, keme oke oziẹobro riẹ o te no; wha jẹ gọ e, Ọnọ Ọ ma odhiwu gbe akpọ gbe abade, gbe iyeri ame.” (Evia. 14:6, 7) Kọ who dede uzizie oyena rehọ no? Otẹrọ ere, oghale o rọ k’owhẹ re who ru iruo kugbe ukoko Jihova re who fiobọhọ kẹ amọfa re a ti ru ere.

6. Nọ ma te wuhrẹ kpahe iwuhrẹ eboba Ebaibol na no, ẹnyaharo ọfa vẹ ma rẹ gbẹ daoma le?

⁶ O rọ ẹjiroro Ọghẹnẹ hẹ re ọ rehọ ahwo ze ukoko riẹ nọ e be fake rehọ igbenu gheghe ta nọ a rọwo Jihova jẹ gwọlọ rria Aparadase rekọ okiovo na a gbe bi le isiuru oriobọ rai. Ọ gwọlọ nọ ahwo a ti wo ‘uvi eriariẹ oreva riẹ,’ yọ a re dhesẹ onana via evaọ izuazọ rai. (Kọl. 1:9, 10) Nọ ahwo nọ i wo ovuhumuo a te wuhrẹ kpahe ehri iwuhrẹ Ebaibol na no, a rẹ gwọlọ tua haro kpohọ ẹkpako Oleleikristi. Ẹgwọlọ rai họ re a te riẹ Jihova kpekpekpe, re a ru otoriẹ kpahe Ẹme riẹ kẹre je kodo viere, re a je fi ei họ iruo vọvọ ziezi evaọ uzuazọ rai. A gwọlọ jọ wọhọ Ọsẹ obọ odhiwu rai, bi dhesẹ ekwakwa riẹ via je riwi eware epanọ o re riwi. Onana o wọ rai gwọlọ idhere nọ a rẹ sai ro wo aghale vọvọ epanọ a rẹ sae daoma te kpobi evaọ iruo otọakpọ nọ o bi ru eva edẹ mai na. Kọ who bi ru oyena?—Ẹf. 5:1; Hib. 5:12–6:3; 1 Tim. 4:15.

7. Evaọ idhere vẹ okugbe uzẹme ọ sae rọ lọhọ obọnana, kọ ẹvẹ a bi ro woi te obọ?

⁷ Ebaibol na i dhesẹ nọ enọ e be gọ Jihova a rẹ jọ ahwo okugbe. (Ẹf. 4:1-3) Okugbe nana ọ rẹ jọ obọnana, dede nọ ma be rria akpọ nọ ọ hẹrioma jẹ be họre kugbe sebaẹgba omobọ mai. Jesu ọ lẹ gaga re ilele riẹ kpobi a jọ ọvo, nọ e rẹ riawere okugbe uzẹme. Eme onana u ti dhesẹ? Orọ ọsosuọ kpobi a re wo emamọ usu kugbe Jihova jegbe Ọmọ riẹ. Ofariẹ, a rẹ jọ ọvo kugbe ohwohwo re. (Jọn 17:20, 21) A be sai wo onana t’obọ enẹna ẹkwoma ehrẹ nọ a bi wo no “uwou” Jihova ze nọ a bi fihọ iruo.

Didi Ekwakwa I Re Fiba Okugbe?

8. (a) Didi ẹnyaharo ma re wo otẹrọnọ ma be rehọ Ebaibol na za enọ nọ i kpomahọ omai? (b) Ẹkwoma enọ obọ ehru na nọ whọ rẹ za, hẹhẹ izẹme nọ i bi fiba okugbe Ileleikristi fihọ otọ.

⁸ Ivieware jọ nọ i re fiba okugbe ọnana e rọ obotọ na. Nọ whọ be te za enọ nọ ilele enana, roro oghẹrẹ nọ ọvuọvo rai o kpoma họ usu ra kugbe Jihova gbe ibe Ileleikristi ra. Eroro kpahe izẹme nana avọ obufihọ ikereakere nọ e riẹ na i ti fiba ẹnyaharo ẹgba iroro ra gbe otoriẹ Ọghẹnẹ, nọ erọ ekwakwa nọ mai kpobi a gwọlọ. (Itẹ 5:1, 2; Fil. 1:9-11) Fikiere roro kpahe ekwakwa nana ọvuọvo:

(1) Mai kpobi a be gọ Jihova ma te je vuhu ogaga riẹ mu wọhọ ọnọ o re fi ute oware nọ uwoma gbe onọ uyoma họ k’omai.

Ẹvẹ Jihova o re rri rie otẹrọnọ ma keke aro fihọ gbabọ kẹ ẹme nọ ma roro nọ ọ rẹ kakao evaọ aro mai? (Luk 16:10; wawo Malakae 1:6-8.)

Kọ u re kpoma họ amọfa otẹrọnọ ma re yo ẹme kẹ ijaje Jihova ẹsikpobi ha? (Wawo Ahwo Rom 5:12; Joshua 7:20-26; 1 Ivie 14:16.)

(2) Oria nọ ma rọ kpobi eva akpọ na, ma wo Ẹme Ọghẹnẹ nọ o re su omai.

Ma tẹ be jẹ iroro, didi enwoma ọ riẹ ma te bi ru oware nọ ma ‘roro’ nọ u kiẹrẹe? (Jer. 17:9; Itẹ 14:12)

Otẹrọnọ ma riẹ ohrẹ nọ Ebaibol na e kẹ eva oghẹrẹ ẹme jọ họ, eme ma re ru? (Itẹ 2:3-5)

(3) Mai kpobi a bi wo erere no ọruẹrẹfihotọ no emu ẹzi ọvo na ze.

Didi eyere e rọ udevie enọ i bi wo ovuhumuo ọruẹrẹfihotọ emu ẹzi ọ Jihova ha? (Wawo Aizaya 1:3; 9:16; 65:14.)

(4) Jesu Kristi ọvo, orọnọ ohwo jọ họ, ọye họ Osu mai jegbe ọnọ ma rẹ sae rehọ ẹkwoma riẹ nya kẹle Jihova evaọ egagọ.

Kọ omọvo mai jọ o wo oware nọ o soriẹ nọ ọ rọ rọwo nnọ wọhọ ahwo ma rro vi amọfa? (Rom 3:23, 24; 12:3; Mt. 23:8-10)

(5) Makọ oghẹrẹ oria nọ ma be rria kpobi, ma re rri kpohọ Uvie Ọghẹnẹ wọhọ ọye ọvo họ ẹruore rọkẹ ahwo.

Ẹvẹ onana o rẹ sae rọ th’omai uke no ẹzi ọ omohẹriẹ? (Mt. 6:9, 10; Mae. 4:3)

(6) Ẹzi ọfuafo ọ rẹ mọ ekwakwa nọ i wuzou eva okugbe Ileleikristi fihọ enọ e be gọ Jihova oma.

Ẹvẹ ma re ro rovie edhere fihọ kẹ ẹzi Ọghẹnẹ re ọ jọ eva mai mọ ibi riẹ? (Ol. 1:2; Itẹ 22:4; Evia. 3:6; Iruẹru 5:32)

Ẹvẹ ibi ẹzi na nọ ma re wo o rẹ kpọ usu mai kugbe Jihova? Kugbe inievo mai? (Gal. 5:22, 23)

(7) Mai kpobi a wo owha-iruo nọ ma rẹ rọ ta usiuwoma Uvie Ọghẹnẹ.

Ẹvẹ abọ nọ ma re wo ziezi evaọ iruo usiuwoma ota nana kugbe ibe Ileleikristi u re kpomahọ oghẹrẹ nọ ma re roro kpahe ai? (Wawo Ahwo Kọlọsi 4:7, 11.)

9. Eme u re noi ze otẹrọnọ ma ghine fi izẹme nana họ iruo evaọ uzuazọ mai?

⁹ Ẹrọwo kugbe izẹme nana yọ oware jọ. Ẹria kugbe ai o gwọlọ viere. Rekọ nọ ma te ru ere, ma re si kẹle Jihova. Usu onya mai kugbe ibe enọ e rọwo orẹ jẹ jọ ehri omosasọ. Wọhọ epanọ Olezi 133:1 ọ ta: “Ẹvẹ uwoma je fo te re inievo i wo ọriakugbe ọvo!” Kọ whẹ ọvo ọ gbẹ te rehọ ẹro ruẹ epanọ o rẹ jọ omosasọ te re whọ nya siọ akpọ na ba, avọ mọvuọria riẹ kpobi, re whọ jọ eva iwuhrẹ kugbe amọfa nọ i ghine you Jihova?

Whaha Ẹzi Ọ Omohẹriẹ

10. Fikieme ma jẹ gwọlọ sẹro oma mai re ma whaha ẹzi ọ mẹrẹjomẹsa?

¹⁰ Re ma siọ okugbe ọghaghae ọyena ba ẹraha, ma rẹ whaha ẹzi ọ omohẹriẹ. Ọvo rai jọ nọ ọ karo họ ẹzi ọ mẹrẹjomẹsa. Jihova o bi fiobọhọ k’omai re ma whaha iẹe ẹkwoma edhesẹvia ọnọ o mu rie i họ, Setan Ẹdhọ na. Ọye họ ọnọ ọ lẹliẹ Ivi họ roro nọ u ti woma kẹe otẹrọnọ o gbabọ kẹ oware nọ Ọghẹnẹ ọ ta re ọ jẹ jiroro obọ riẹ. Adamu o te lele iei eva edhere ọwọsuọ otiọye na. Oware nọ u no rie ze họ okpẹtu rọ kẹ ae gbe omai. (Emu. 2:16, 17; 3:1-6, 17-19) Ma be rria akpọ nọ ẹzi otiọye na ọ vaha fihọ, fikiere u re gb’omai unu hu otẹrọnọ ufo re ma kpọ ẹzi otiọye na evaọ oma mai. Jihova ọ be rehọ uyoyou fiobọhọ k’omai ru ere ẹkwoma ehrẹ nọ i bi no ukoko riẹ tha.

11. Eme u re dhesiẹe via sọ ma be ghinẹ ruẹrẹ oma kpahe kẹ uzuazọ eva eyero ọkpokpọ okiẹrẹe Ọghẹnẹ?

¹¹ Ẹkwoma ukoko oyena ze ma wuhrẹ kpahe eyaa oruaro Jihova no nọ ọ te rọ rehọ idhiwu ekpokpọ gbe akpọ ọkpokpọ “enọ ẹrẹreokie ọ be rria” ti ro nwene okegbe ọnana. (2 Pita 3:13) Ma be ghọghọ evaọ ẹruore na nnọ kẹle na akpọ omuemu ọnana ọ be te vrẹ no jegbe nọ akpọ na o ti nwene fihọ Aparadase. Rekọ ẹria uzuazọ mai u bi dhesẹ nọ ma be ghinẹ rehọ omarokpotọ ruẹrẹ oma kpahe kẹ uzuazọ evaọ akpọ nọ a te jọ wuhrẹ ẹrẹreokie? Ebaibol na e ta k’omai vevẹ nọ: “Wha you akpọ na hayo eware nọ e rọ eva akpọ na ha. Re ohwo jọ o te you akpọ na, uyoyou Ọsẹ na o riẹ eva ha.” (1 Jọn 2:15) Uzẹme o rọ nnọ eware jọ buobu e rọ akpọ na nọ e be were omai ọvuọvo ha. Rekọ ma bi mukpahe abọ akpọ na fikinọ e wọso omawere uzuazọ nọ ma wo obọnana? Hayo kọ ma be whaha ẹzi riẹ re—uruemu ọ mẹrẹjomẹsa riẹ, awaọruọ thesiwa riẹ? Ma bi ghine ru ei fihọ uruemu re ma ghinẹ gaviezọ kẹ Jihova re ma je yo ẹme kẹe no udu mai ze, makọ iroro oma iwo mai jọ e be wọso ere oruo dede? Edhere uzuazọ mai kpobi—makinọ oria nọ ma be rria, makinọ oware nọ ma bi ru kpobi—e rẹ kẹ imuẹro nnọ iroro gbe ẹjiroro mai e rọwo kugbe erọ Ọghẹnẹ.—Itẹ 3:5, 6.

12. (a) Fikieme u je wuzou re ma mi uvẹ nọ ma rẹ sai ro wuhrẹ kpahe idhere Jihova je lele ai evaọ uzuazọ mai enẹna? (b) Eme ikereakere nọ a t’ẹme te evaọ edhe-ẹme na i dhesẹ k’omai omomọvo?

¹² Okenọ Jihova o ve fihọ nọ ọ te rọ raha eyero eware imuomu enana gbe enọ i you idhere riẹ u te te no, ọ te raha oke he. Ọ be te va ẹdẹ ọyena ha hayo nwene oghẹrẹ nọ o re ru eware riẹ re ọ ruẹse rehọ enọ e gbẹ be daoma talamu akpọ na, enọ i wo ẹjiroro ivẹ kpahọ ewuhrẹ ẹjiroro Ọghẹnẹ jegbe eruo riẹ hẹ. Enẹna họ oke iruo! (Luk 13:23, 24; 17:32; 21:34-36) Ẹvẹ o vọ avọ omosasọ te, nọ ma be rọ ruẹ “ogbotu obuobu” nọ i bi kru uvẹ ọghaghae nana h’obọ, be rehọ ajọwha gwọlọ ehrẹ nọ Jihova ọ be rọ kẹ no ukoko riẹ ze jẹ be rehọ okugbe nya eva idhere riẹ!

[Footnotes]

Eme Ọkiẹkpemu

● Eme họ ẹjiroro Jihova kpahọ egagọ?

● Nọ ma te wuhrẹ kpahọ iwuhrẹ eboba Ebaibol na no, ẹnyaharo ọfa vẹ ma rẹ gbẹ daoma le?

● Eme mai omomọvo o re ru, re ekwakwa okugbe nọ ma wuhrẹ no na e sae kpọ uzuazọ mai epanọ o rẹ jọ?