Uzou Ọsosuọ
Okugbe Egagọ Evaọ Oke Mai na—Eme U Dhesẹ?
1, 2. (a) Ẹnyaharo urirẹ vẹ ọ be roma via evaọ oke mai na? (b) Didi ẹruore igbunu ahwo udu-oruọzewọ a wo?
WARIẸ akpọ na họ ẹnyaharo urirẹ jọ ọ riẹ kpahe okugbe egagọ. O bi si ima ahwo buobu erọ erẹwho, uyẹ, gbe evẹrẹ kpobi kugbe. A bi koko efa buobu họ k’ukpe k’ukpe. A jọ Ebaibol na dhesẹ enana wọhọ “isẹri” Jihova yọ a se rai “otu obuobu.” A be “gọ [Ọghẹnẹ] taso tuvo.” (Aizaya 43:10-12; Eviavia 7:9-15) Fikieme a je bi ru onana? Fikinọ a riẹ Jihova no wọhọ Ọghẹnẹ uzẹme ọvo na. Onana o be wọ ae nwene izuazọ rai rọwo kugbe idhere ikiẹrẹe riẹ. Ofariẹ, a wuhrẹ no inọ ma be rria “edẹ urere” akpọ omuomu nana, inọ Ọghẹnẹ ọ te raha iẹe kẹle, gbe nọ ọ te rehọ akpọ ọkpokpọ aparadase riẹ nwene iei.—2 Timoti 3:1-5, 13; 2 Pita 3:10-13.
2 Ẹme Ọghẹnẹ ọ yeyaa nọ: “Omoke kakao, iru-umuomu e gbẹ te jọ họ . . . Rekọ enọ e rọ oma kpotọ, e rẹ te rọ otọ na reuku; oma o rẹ te were ae evaọ omofọwẹ.” (Olezi 37:10, 11) “Ikiẹrẹe e rẹ te rehọ otọ na reuku, a vẹ jẹ ria ae bẹdẹ.” (Olezi 37:29) “Ọghẹnẹ o ve ti ririe irui kpobi no aro rai; uwhu o gbẹte jọ ofa ha, hayo kọ uweri hi, hayo oviẹ hẹ, hayo edada ọvuọvo ho, keme eware anwae evrẹ no.”—Eviavia 21:4.
3. Ẹvẹ uvi okugbe egagọ o be rọ romavia?
3 Ahwo nọ a bi kokohọ kugbe evaọ egagọ uzẹme enẹna họ ahwo ọsosuọ erọ akpọ ọkpokpọ ọyena. A wuhrẹ oware nọ oreva Ọghẹnẹ o rrọ no yọ a bi ru ei evaọ utho ẹgba rai kpobi. Nọ o je dhesẹ epanọ onana u wuzou te, Jesu ọ ta nọ: “Onana họ uzuazọ ebẹdẹ bẹdẹ, re a riẹ owhẹ nọ whẹ ọvo họ uvi Ọghẹnẹ, gbe Jesu Kristi ọnọ who vi.” ( Jọn 17:3) Jọn ukọ na o kere nọ: “Akpọ na avọ urusio riẹ e rẹ te vrẹ, rekọ ohwo nọ o re ru oreva Ọghẹnẹ ọ rẹ jọ bẹdẹ.”—1 Jọn 2:17.
Oware nọ U Ghine Dhesẹ
4. (a) Eme ekokohọ ahwo buobu evaọ okugbe egagọ evaọ oke mai na u ghine dhesẹ? (b) Ẹvẹ Ebaibol na o dhesẹ ekokohọ nana?
4 Eme ekokohọ ahwo buobu ziọ egagọ okugbe evaọ oke mai na u ghine dhesẹ? O rọ imuẹro ivevẹ inọ ma kẹle ekuhọ akpọ omuomu nana gaga no, avọ akpọ ọkpokpọ Ọghẹnẹ nọ ọ te nwani lele iei. Ma rọ ibiaro mai ruẹ orugba eruẹaruẹ Ebaibol nọ e ruẹaro kpahe ekokohọ igbunu ọnana no. Eruẹaruẹ itieye na jọ e ta nọ: “Oke o rẹ te tha evaọ ẹdẹ urere [etoke urere nana] inọ, itho uwou ỌNOWO na [egagọ uzẹme ikpehru riẹ] e rẹ te jọ ugbehru nọ o mai kpehru kpobi [kpehru vi oghẹrẹ egagọ ọfa kpobi], . . . ahwo a ve ti su ruẹ e. Erẹwho buobu e rẹ te tha, a vẹ te ta nọ: ‘Wha nyaze, re ma kpobọ ugbehru ỌNOWO na, obọ uwou Ọghẹnẹ Jekọp; re o wuhrẹ omai idhere riẹ jegbe re ma nya evaọ idhere riẹ.’ ”—Maeka 4:1, 2; Olezi 37:34.
5, 6. (a) Ẹvẹ o rọ rrọ uzẹme inọ erẹwho e be nya bru Jihova ze? (b) Didi enọ ma rẹ nọ oma mai?
5 Dedenọ oma erẹwho soso e be rọ oma rai lahwe ziọ uwou egagọ abọ-ẹzi Jihova ha, ima ahwo buobu nọ i no erẹwho kpobi ze a bi ru ere. Nọ a bi wuhrẹ kpahe ẹjiroro oyoyou gbe ekwakwa isiuru Jihova Ọghẹnẹ na, u bi duobọte udu rai gaga. A be rọ omarokpotọ gwọlọ oware nọ Ọghẹnẹ ọ gwọlọ mi ai. Olẹ rai o wọhọ orọ ọso-ilezi na, ọnọ ọ ta nọ: “Wuhrẹ omẹ re me ru orọ eva ra, keme whẹ họ Ọghẹnẹ mẹ.”—Olezi 143:10.
6 Kọ whọ be ruẹ oma ra evaọ udevie otu obuobu nọ Jihova o bi koko họ evaọ okugbe egagọ enẹna? Kọ owọ nọ whọ be jẹ kẹ ọkpọvio nọ who bi wo no Ẹme riẹ ze na u bi dhesẹ nọ who ghine vuhumu inọ Jihova họ Ehri riẹ? Ẹvẹ whọ te jọ ‘evaọ idhere riẹ nya’ te?
Epanọ A bi Ro Woi t’Obọ
7. (a) Ẹvẹ okugbe egagọ ọ te kẹre te evaọ obaro? (b) Fikieme o jẹ rọ oware okpakpata re a zihe ruọ ọgegagọ Jihova obọnana, kọ ẹvẹ ma sai ro fiobọhọ kẹ amọfa ru ere?
7 Ẹjiroro Jihova họ re emama nọ i wo areghẹ kpobi e jọ okugbe evaọ egagọ. Ẹvẹ ma bi rẹro ẹdẹ na te nọ enọ e be rria uzuazọ kpobi a te rọ gọ Ọghẹnẹ uzẹme ọvo na! (Olezi 103:19-22) Rekọ taure oyena o tẹ te via, Jihova ọ te kaki si ahwo nọ a se nọ a re ru oreva ukiẹrẹe riẹ no. Avọ ohrọ, ọ rẹ kẹ ọjọriẹ oke krẹkri kpahe oware nọ o bi ti ru, re ahwo evaọ oria kpobi a wo uvẹ nọ a re ro nwene idhere rai. (Aizaya 55:6, 7) Fikiere, evaọ edẹ mai na, a be kẹ “erẹwho gbe erua gbe evẹrẹ gbe ahwo kpobi,” ovuẹ okpakpata onana: “Dhozọ Ọghẹnẹ jẹ rehọ oruaro kẹ e, keme oke oziẹobro riẹ o te no; wha jẹ gọ e, Ọnọ Ọ ma odhiwu gbe akpọ gbe abade, gbe iyeri ame.” (Eviavia 14:6, 7) Kọ who dede uzizie oyena rehọ no? Otẹrọ ere, o rọ uvẹ-ọghọ k’owhẹ re who zizie amọfa re a te riẹ jẹ gọ Ọghẹnẹ uzẹme na.
8. Nọ ma te wuhrẹ kpahe igogo iwuhrẹ Ebaibol na no, ẹnyaharo ọfa vẹ ma rẹ gbẹ daoma ru?
8 O rọ ẹjiroro Jihova ha re ahwo nọ a ta nọ a rọwo e riẹ rekiyọ a ruabọhọ ilale isiuru obọ rai a gọe. Ọghẹnẹ ọ gwọlọ re ahwo a wo ‘eriariẹ egbagba oreva riẹ’ a ve je dhesẹ onana via evaọ izuazọ rai. (Ahwo Kọlọsi 1:9, 10) Fikiere, ahwo ovuhumuo nọ a wuhrẹ kpahe igogo iwuhrẹ Ebaibol na no a rẹ gwọlọ tunye haro kpohọ ẹkpako Oleleikristi. Isiuru rai họ re a te riẹ Jihova viere, re a ru otoriẹ rai kpahe Ẹme riẹ kẹre je kodo viere, re a je fi ei họ iruo vọvọ ziezi evaọ uzuazọ rai. A gwọlọ dhesẹ ekwakwa Ọsẹ obọ odhiwu rai re a je rri eware wọhọ epanọ o re rri. Onana o rẹ wọ ae gwọlọ idhere nọ a re ro w’obọ evaọ iruo uzuazọ-usiwo nọ ọ be kpọ ahwo riẹ ru enẹna evaọ otọakpọ na evaọ edẹ mai na. Kọ oyena họ isiuru ra re?—Mak 13:10; Ahwo Hibru 5:12–6:3.
9. Idhere vẹ uvi okugbe ọ rọ lọhọ enẹna?
9 Ebaibol na o dhesẹ nọ enọ e be gọ Jihova a rẹ jọ ahwo okugbe. (Ahwo Ẹfẹsọs 4:1-3) Okugbe nana ọ rẹ jọ enẹna, dede nọ ma be rria akpọ nọ ọ hẹrioma je bi lele sebaẹgba mai họre. Jesu ọ lẹ gaga re ilele riẹ kpobi e jọ ọvo, reawere okugbe uzẹme. Eme onana u re dhesẹ? Orọ ọsosuọ, inọ a re wo emamọ usu kugbe Jihova gbe Ọmọ riẹ. Orọ avivẹ, inọ a re lele ohwohwo jọ evaọ okugbe. ( Jọn 17:20, 21) Re oyena o sae lọhọ, ukoko Ileleikristi na họ ukoko nọ Jihova o bi ro wuhrẹ ahwo riẹ.
Didi Ekwakwa I Re Fiba Okugbe?
10. (a) Eme ma re wo otẹrọnọ ma rehọ Ebaibol na gwọlọ iyo kẹ enọ nọ i kpomahọ omai? (b) Kiẹ ekwakwa nọ i bi fiba okugbe Ileleikristi riwi ẹkwoma ẹza iyo enọ nọ a kere fihọ edhe-ẹme nana.
10 Ugogo ekwakwa ihrẹ nọ i bi fiba okugbe egagọ e rrọ obotọ. Nọ whọ be te za enọ nọ e rrọ obotọ na, roro oghẹrẹ nọ okwakwa ovuovo u bi ro kpomahọ usu ra kugbe Jihova gbe ibe Ileleikristi. Eroro kpahe igogo eme nana avọ ese ikereakere nọ a fodẹ rekiyọ a kere eme rai via ha na i ti fiba ẹroharo areghẹ Ọghẹnẹ ra, ẹgba iroro ra, gbe orimuo ra—ekwakwa nọ mai kpobi ma gwọlọ. (Itẹ 5:1, 2; Ahwo Filipai 1:9-11) Roro kpahe ekwakwa enana ọvuọvo.
(1) Ma vuhu udu Jihova nọ o re ro fi ute ọ oware uwoma gbe uyoma họ k’omai mu. “Rehọ ẹroọrọsuọ ra kpobi kpahe ỌNOWO na whọ rehọ eva kpahe ẹriẹ omobọ ra ha. Eva idhere ra kpobi ọ thọrọ owhẹ ẹro ho, o ve ti ruọ idhere ra kpọvi.”—Itẹ 3:5, 6.
Fikieme ma jẹ gwọlọ ohrẹ gbe ọkpọvio Jihova evaọ okenọ ma tẹ be jiroro? (Olezi 146:3-5; Aizaya 48:17)
(2) Ma wo Ẹme Ọghẹnẹ nọ ọ rẹ kpọ omai. “Okenọ wha rọ rehọ ẹme Ọghẹnẹ nọ owha jọ unu mai yo na; wha rehọ e riẹ wọhọ ẹme ahwo ho, rekọ wọhọ epanọ o ghinẹ rọ, ẹme Ọghẹnẹ nọ ọ rọ eva rai otu nọ ọrọwo na ru iruo.”—1 Ahwo Tẹsalonika 2:13.
Didi enwoma e riẹ nọ ma tẹ be rehọ thakpinọ gheghe ọvo ru oware nọ ma ‘roro’ nọ u kiẹrẹe? (Itẹ 14:12; Jerimaya 10:23, 24; 17:9)
Ma gbẹ riẹ ohrẹ nọ Ebaibol na ọ kẹ evaọ oghẹrẹ ẹme jọ họ, eme ma re ru? (Itẹ 2:3-5; 2 Timoti 3:16, 17)
(3) Mai kpobi ma bi wo erere no ọruẹrẹfihotọ emu abọ-ẹzi ọvona ze. “ỌNOWO na o veti wuhrẹ emọ ra kpobi.” (Aizaya 54:13) “Jọ mai ohwo o he roro epanọ ọ rẹrọ jaja ọrivẹ riẹ oma, re o wo uyoyou, je ru iruo ezi kpobi, [wha hẹ] se oma ba e kugbe he, wọhọ epanọ uruemu otu jọ o rọ, rekọ whai ohwo ọ hẹ ta udu họ ohwo awọ, ofa riẹ, wha riẹ nọ ẹdẹ [ọraha] na ọ kẹlino.”—Ahwo Hibru 10:24, 25.
Didi irere i re te enọ e be rehọ ọruẹrẹfihotọ emu abọ-ẹzi Jihova ruiruo vọvọ? (Aizaya 65:13, 14)
(4) Jesu Kristi họ osu mai, orọnọ ohwo-akpọ jọ họ. “Wha rọwo nọ a se o whai iwuhrẹ hẹ, keme ọvo họ owuhrẹ rai, whai kpobi inievo. Wha jọ eva akpọ na se ohwo ọvo ọsẹ rai hi, keme wha wo Ọsẹ ọvo nọ ọ rọ obọ odhiwu. Wha rọwo nọ a se owhai ilori gbe he, keme ọvo họ Olori rai, Kristi na.”—Matiu 23:8-10.
Kọ u fo re ma rọwo nnọ ma kpehru vi amọfa? (Ahwo Rom 3:23, 24; 12:3)
(5) Ma bi rẹro egọmeti Uvie Ọghẹnẹ wọhọ ẹruore ọvuọvo rọkẹ ahwo-akpọ. “Fikiere wha lẹ epa onana: Ọsẹ mai nọ ọ rọ obọ odhiwu, odẹ ra ojọ ọrẹri. Uvie ra oze, epanọ a rọ obọ odhiwu ru orọ eva ra, ru re a jọ akpọ na ru ere re. Wha kake guọlọ uvie riẹ gbe [ẹrẹreokie] riẹ.”—Matiu 6:9, 10, 33.
Ẹvẹ ‘ẹkake gwọlọ uvie na’ u re ro fiobọhọ sẹro okugbe mai? (Maeka 4:3; 1 Jọn 3:10-12)
(6) Ẹzi ọfuafo ọ rẹ jọ oma egegagọ Jihova mọ ekwakwa nọ i wuzou rọkẹ okugbe Ileleikristi. “Ubi Ẹzi họ uyoyou, oghọghọ, udhedhẹ, uye oruẹ krẹkri, oma-onyẹ, ewoma, orọwọ, oma-urokpotọ, oma-oyọrọ.”—Ahwo Galesha 5:22, 23.
Eme ma re ru hrọ re ẹzi Ọghẹnẹ ọ ruẹse jọ oma mai mọ ibi? (Iruẹru 5:32)
Ẹvẹ ewo ẹzi Ọghẹnẹ o re ro kpomahọ usu mai kugbe ibe Ileleikristi? ( Jọn 13:35; 1 Jọn 4:8, 20, 21)
(7) Egegagọ uzẹme Ọghẹnẹ kpobi a re w’obọ evaọ ẹta usiuwoma Uvie riẹ. “A rẹ te vuẹ ovuẹ usiuwoma uvie na kẹ akpọ na kpobi, re o jọ isẹi kẹ erẹwho akpọ na kpobi; kẹsena urere u te zi te.”—Matiu 24:14.
Eme ọ rẹ w’omai gwọlọ w’obọ vọvọ evaọ iruo usiuwoma ota na? (Matiu 22:37-39; Ahwo Rom 10:10)
11. Ma te fi izẹme Ebaibol h’iruo evaọ izuazọ mai, eme o re noi ze?
11 Okugbe nọ ma rẹ rọ gọ Jihova u re si omai kẹle iẹe je ru omai reawere usu omosasọ kugbe ibe enọ e rọwo. Olezi 133:1 o ta nọ: “Ẹvẹ uwoma je fo te re inievo i wo ọriakugbe ọvo!” Ẹvẹ o rrọ omosasọ te re ma nya siọ akpọ na ba avọ mọvuọria riẹ kpobi, ọfariẹ-ogbe, gbe ozighi riẹ re ma kokohọ kugbe enọ i ghine you Jihova je bi yoẹme kẹ izi riẹ!
Whaha Eware nọ E rẹ Wha Omohẹriẹ Tha
12. Fikieme u je fo re ma whaha ẹzi ọ mẹrẹjomẹsa?
12 Re ma siọ okugbe ọghaghae akpọ-soso mai na ba ẹraha, ma rẹ whaha eware nọ e rẹ wha omohẹriẹ tha. Ọvo rai jọ họ ẹzi ọ mẹrẹjomẹsa rono Ọghẹnẹ gbe izi riẹ. Jihova o bi fiobọhọ k’omai re ma whaha iẹe ẹkwoma erovie via ọnọ o mu rie họ, Setan Ẹdhọ na. (2 Ahwo Kọrint 4:4; Eviavia 12:9) Setan họ ọnọ ọ viẹ Adamu avọ Ivi họ siọ oware nọ Ọghẹnẹ ọ ta jẹ jiroro wọso oreva Ọghẹnẹ. Oware nọ u no rie ze họ okpẹtu rọ kẹ ae gbe omai. (Emuhọ 3:1-6, 17-19) Akpọ nana ọ vọ avọ ẹzi mẹrẹjomẹsa rono Ọghẹnẹ gbe izi riẹ. Fikiere u fo re ma jọ oma mai kpọ ẹzi ọyena.
13. Eme o re dhesẹ sọ ma be ghinẹ ruẹrẹ oma kpahe kẹ uzuazọ evaọ akpọ ọkpokpọ okiẹrẹe Ọghẹnẹ?
13 Wọhọ oriruo, roro kpahe eyaa igbunu Jihova re ọ rehọ idhiwu ekpokpọ gbe akpọ ọkpokpọ “enọ ẹrẹreokie ọ be rria” ro nwene akpọ omuomu ọnana. (2 Pita 3:13) Kọ oyena o gbẹ wọ omai re ma ruẹrẹ oma kpahe kẹ ẹria eva oke oyena nọ ẹrẹreokie ọ te dafia na? Oyena u dhesẹ ẹmeoyo kẹ ohrẹ uvevẹ Ebaibol na: “Wha you akpọ na hayo eware nọ e rọ eva akpọ na ha. Re ohwo jọ o te you akpọ na, uyoyou Ọsẹ na o riẹ eva ha.” (1 Jọn 2:15) Fikiere ma rẹ whaha ẹzi akpọ na—uruemu ọ mẹrẹjomẹsa riẹ, eroro kpahe omobọ ohwo vrẹta, ọfariẹ-ogbe gbe ozighi riẹ. Ma re ru ei fihọ uruemu re ma gaviezọ kẹ Jihova je yoẹme kẹe no udu mai ze, o tẹ make rrọ nnọ iroro oma iwo sebaẹgba mai e hẹrioma no oyena. Edhere uzuazọ mai kpobi o rẹ kẹ imuẹro inọ iroro gbe ẹjiroro mai e rọwo kugbe oreva Ọghẹnẹ uruo.—Olezi 40:8.
14. (a) Fikieme u je wuzou re ma gbobọ kru uvẹ nọ ma re ro wuhrẹ kpahe idhere Jihova jẹ nya lele ai evaọ izuazọ mai enẹna? (b) Eme ikereakere nọ a fodẹ evaọ edhe-ẹme na i dhesẹ k’omai omomọvo?
14 Okenọ ẹruoke na o te te no re Jihova ọ raha eyero eware imuomu nana gbe enọ i you idhere riẹ, ọ te raha oke he. Ọ be te va ẹdẹ ọyena ha hayo nwene itee riẹ hẹ re ọ ruẹse jẹ enọ e gbẹ be daoma talamu akpọ na rehọ, enọ i wo ẹjiroro ivẹ kpahọ ewuhrẹ ẹjiroro Ọghẹnẹ jegbe eruo riẹ. Enẹna họ oke owọjẹ! (Luk 13:23, 24; 17:32; 21:34-36) Fikiere, ẹvẹ o rrọ omosasọ te re ma ruẹ otu obuobu nọ ọ be gbobọ kru uvẹ oghaghae nana, be rehọ ajọwha gwọlọ ehrẹ nọ Jihova ọ be kẹ ẹkwoma Ẹme gbe ukoko riẹ jẹ be rọ okugbe nya kpohọ akpọ ọkpokpọ na! Yọ epanọ ma wuhrẹ kpahe Jihova te, ere ma ti you rie jẹ gwọlọ gọe te.
Eme Ọkiẹkpemu
• Didi ẹjiroro Jihova o wo kpahe egagọ?
• Nọ ma te wuhrẹ kpahe igogo iwuhrẹ Ebaibol na no, ẹnyaharo ọfa vẹ ma rẹ daoma ru?
• Eme mai omomọvo o re ru re ma lele egegagọ Jihova efa jọ evaọ okugbe?
[Uwoho nọ o rrọ ẹwẹ-obe avọ 4]
‘Enọ e rọ oma kpotọ e rẹ te rọ otọ na reuku; oma o rẹ te were ae evaọ omofọwẹ’