Uzou Avọ 12

Ame-Ọhọ Jesu

OWARE wọhọ emerae ezeza nọ Jọn o mu usiuwoma ota riẹ họ no, Jesu, ọnọ ọ kpako te ikpe 30 no na, ọ tẹ nya bru ei ziọ Jọdan. Fikieme? Re o weze bru ei gheghe? Kọ Jesu ọ faki wo isiuru kpahe oghẹrẹ nọ iruo Jọn e be nyaharo te? Ijo, Jesu ọ yare Jọn nọ ọ họe ame.

Jọn ọ tẹ nwane se: “Whọ hae họ omẹ ame, who ve bru omẹ ze?” Jọn ọ riẹ nọ ọmọ oniọvo oni riẹ Jesu yọ obọdẹ Ọmọ Ọghẹnẹ. Whaọ, Jọn ọ jọ eva oni riẹ duola okenọ Meri, ọnọ o dieva Jesu họ, ọ kpahe ai! Ababọ avro, oni Jọn, Ẹlizabẹt, o gbiku onana kẹe uwhremu na. Yọ o sae jẹ jọ nọ ọ ta kẹe kpahe uworo ẹnjẹle na orọ eyẹ Jesu jegbe enjẹle nọ e roma via kẹ ithuru-igodẹ evaọ aso nọ a ro yẹ Jesu.

Fikiere Jesu ọ rọ ọrara kẹ Jọn he. Yọ Jọn ọ riẹ nọ ame-ọhọ riẹ o rọ kẹ Jesu hu. O rọ kẹ ahwo nọ i bi kurẹriẹ no izieraha rai, rekọ Jesu o wo uzioraha ha. Ghele na, makọ epanọ Jọn ọ se te kẹhẹ, Jesu o te gbe sikẹ nọ: “Jọ o jọ ere enẹna; keme ere u fo omai re ma ru oware kpobi nọ u kiete gba.”

Fikieme u je fo re Jesu ọ họ-ame? Keme ame-ọhọ Jesu yọ orọ oka, orọnikọ orọ ekurẹriẹ kẹ izieraha ha, rekọ orọ ẹrọvia oma riẹ re o ru oreva Ọsẹ riẹ. Anwẹdẹ Jesu ọ rọ ọwena, rekọ enẹna oke u te no re o mu odibọgba riẹ họ onọ Jihova Ọghẹnẹ o vi rie ziọ otọakpọ ti ru. Kọ who roro nọ Jọn o bi rẹro oware igbunu jọ evaọ okenọ ọ te họ Jesu ame?

Whaọ, uwhremu na Jọn ọ tẹ n’iyẹrẹ nọ: “Ọnọ o vi omẹ te rehọ ame họ ahwo-ame, ọ ta kẹ omẹ, nọ, ‘Ehru ọnọ whọ jẹ te ruẹ Ẹzi nọ ọ rẹte tha, o dikihẹ ehru riẹ, ọyena họ ọnọ ọ rẹ te rehọ [“ẹzi ọfuafo,” NW ] họ ahwo-ame.’ ” Fikiere Jọn o bi rẹro nọ ẹzi Ọghẹnẹ o ti kiemu ohwo jọ nọ ọ te họ-ame na. Fikiere, o sae jọ nọ u gbe rie unu hu, okenọ Jesu ọ jẹ va no ame ze, nọ Jọn ọ ‘ruẹ ẹzi Ọghẹnẹ nọ ọ be tha wọhọ erueruẹ, o je kiemu uzou riẹ.’

Rekọ eware nọ e via evaọ okenọ a jẹ họ Jesu ame i bu viere. ‘Idhiwu i te rovie fihọ’ kẹe. Eme onana u dhesẹ? Ababọ avro, u dhesẹ nọ okenọ ọ jẹ họ-ame na, ekareghẹhọ uzuazọ nọ ọ jọ vẹre evaọ obọ odhiwu i te bru ei ze. Fikiere, Jesu ọ tẹ kareghẹhọ uzuazọ riẹ ziezi wọhọ ọmọ ẹzi Jihova Ọghẹnẹ, kugbe eware nọ Ọghẹnẹ ọ jọ obọ odhiwu ta kẹe kpobi evaọ etoke ẹria riẹ taure ọ tẹ te ziọ ohwo-akpọ.

Fiba onana, evaọ etoke ame-ọhọ riẹ, urru jọ nọ u n’obọ odhiwu ze u te whowho nọ: “Ọnana họ Ọmọ oyoyou mẹ, ọnọ ọ were omẹ hrọ.” Urru ono oye? Orọ Jesu? Vievie! Yọ urru Ọghẹnẹ. Uzẹme, Jesu yọ Ọmọ Ọghẹnẹ, orọnikọ ọye họ Ọghẹnẹ omariẹ hẹ, wọhọ epanọ ahwo jọ a bi roro.

Ghele na, Jesu yọ ọmọ ohwo-akpọ Ọghẹnẹ, nwane wọhọ epanọ ọzae ọsosuọ na, Adamu, ọ jọ. Luk olele na, nọ o dhesẹ ame-ọhọ Jesu no, o te kere nọ: “Nọ Jesu o muhọ ewuhrẹ, yọ ọ kpako te ọgba ikpe no, (epanọ ahwo a je roro nọ) ọmọ Josẹf ọ rọ, nọ ọ rọ ọmọ Hili, . . . ọmọ Devidi, . . . ọmọ Abraham, . . . ọmọ Noa, . . . ọmọ Adam, ọmọ Ọghẹnẹ.”

Wọhọ epanọ Adamu ọ jọ “ọmọ Ọghẹnẹ” evaọ akpọ na, ere Jesu ọ rọ re. Jesu yọ ọzae nọ ọ mae rro nọ ọ rria no, onọ u re dhesẹ oma via vevẹ nọ ma tẹ kiẹ uzuazọ Jesu riwi. Ghele na, evaọ ame-ọhọ riẹ, Jesu ọ tẹ ruọ usu okpokpọ kugbe Ọghẹnẹ, je zihe ruọ Ọmọ abọ-ẹzi Ọghẹnẹ. Ọghẹnẹ ọ wariẹ sei kpohọ odhiwu, nọ u fi rie họ edhere nọ o ti ro fi uzuazọ ohwo-akpọ riẹ họ otọ bẹdẹ bẹdẹ evaọ idhe rọ kẹ ahwo-akpọ nọ a brukpe. Matiu 3:13-17; Luk 3:21-38; 1:34-36, 44; 2:10-14; Jọn 1:32-34; Ahwo Hibru 10:5-9.

▪ Fikieme Jesu ọ gbẹ rọ ọrara kẹ Jọn he?

▪ Nọ ọ raha uzi hi na, fikieme a jẹ họ Jesu ame?

▪ Fiki oware nọ Jọn ọ riẹ no kpahe Jesu, fikieme u gbe gbei unu hu nọ ẹzi Ọghẹnẹ o te Jesu obọ?