Uzou Avọ 13
Ewuhrẹ no Edawọ Jesu Ze
NỌ JESU ọ nwane họ-ame no, ẹzi Ọghẹnẹ o te su Jesu kpohọ igbrẹwọ Judia. Eware buobu e riẹ nọ o re roro kpahe, keme evaọ oke ame-ọhọ riẹ, ‘idhiwu na i rovie,’ re ọ sai wo otoriẹ eware obọ odhiwu. Uzẹme, eware buobu e riẹ nọ o re roro kpahe!
Jesu ọ raha edẹ 40 gbe aso 40 evaọ igbrẹwọ na yọ evaọ etoke nana ọ re oware ovo ho. Kẹsena, nọ ohọ u kpe Jesu gaga no, Ẹdhọ o te bi kẹle re ọ dawo iẹe, anọ: “[Otẹrọnọ] owhẹ Ọmọ Ọghẹnẹ, whọ ta kẹ itho enana re i zihe ruọ ebrẹdi.” Rekọ Jesu ọ riẹ nọ o thọ re ọ rehọ ogaga ọ iruo-igbunu riẹ ko omobọ riẹ. Fikiere ọ tẹ se odawọ na.
Rekọ oma o lọhọ Ẹdhọ họ. Ọ tẹ dawo edhere ọfa. O se Jesu abọ re ọ la no ugbẹhẹ etẹmpol na re enjẹle Ọghẹnẹ a siwi ei. Rekọ Jesu ọ rọwo nọ a dawo iẹe re o ru okpoware otiọye he. Nọ ọ t’ẹme no Ikereakere na ze, Jesu o te dhesẹ nọ o thọ re a fi Ọghẹnẹ họ ẹdawọ evaọ edhere otiọna.
Evaọ odawọ avesa, Ẹdhọ o te dhesẹ ivie akpọ na kpobi kẹ Jesu evaọ edhere igbunu ọ tẹ ta nọ: “Who te diguẹ gọ omẹ, mẹ rẹ kẹ owhẹ eware nana kpobi.” Rekọ Jesu ọ tẹ wariẹ se nọ o re kie kẹ odawọ eruo oware nọ o thọ, salọ nọ o re fi ẹrọwọ họ Ọghẹnẹ.
Ma rẹ sai wuhrẹ no edawọ Jesu enana ze. Wọhọ oriruo, i dhesẹ nọ Ẹdhọ orọnikọ iroro iyoma nọ e rọ eva ọvo ho, wọhọ epanọ ahwo jọ a re roro, rekọ ohwo ọ ghinẹ rọ, ọnọ a rẹ ruẹ hẹ. Odawọ Jesu u te je dhesẹ nọ egọmeti akpọ na kpobi yọ okwakwa Ẹdhọ. Keme ẹvẹ eware enana nọ Ẹdhọ ọ rọ kẹ Kristi o hae rọ jọ emamọ ẹdawọ otẹrọnọ eriẹ e ghinẹ rọ họ?
Yọ dai roro kpahe onana: Ẹdhọ ọ ta nọ o re ru Jesu ọghọ otẹrọnọ ọ gọ riẹ, tubẹ kẹe ivie akpọ na kpobi dede. Ẹdhọ ọ rẹ sae daoma re ọ dawo omai evaọ edhere ọvo na, ẹsejọ ẹkwoma uvẹ isiuru nọ o re rovie fihọ k’omai nọ ma re ro wo efe akpọ, ogaga, hayo ọkwa. Rekọ ẹvẹ u ti wo areghẹ te re ma lele oriruo Jesu re ma fi ẹrọwọ họ Ọghẹnẹ makọ oghẹrẹ nọ ẹdawọ na ọ rọ kpobi kẹhẹ! Matiu 3:16; 4:1-11; Mak 1:12, 13; Luk 4:1-13.
▪ Didi eware o sae jọ nọ Jesu o je roro kpahe evaọ etoke edẹ 40 evaọ igbrẹwọ na?
▪ Ẹvẹ Ẹdhọ ọ rọ daoma re ọ dawo Jesu?
▪ Eme ma rẹ sai wuhrẹ no edawọ Jesu ze?