Uzou Avọ 15

Iruo Igbunu Ọsosuọ Jesu

ANWỌ ẹdẹ ọvo hayo ivẹ ọvo na nọ Andru, Pita, Jọn, Filip, Nataniẹl, gbe ẹsejọhọ Jemis a ro zihe ruọ ilele ọsosuọ Jesu no. Enana a ruọ edhere no bi kpohọ ẹkwotọ Galili, oria nọ aikpobi a noze. Oria nọ a rọ ovao wha họ Kena, ẹwho Nataniẹl, nọ o rọ igbehru nọ u thabọ no Nazarẹt he, oria nọ Jesu omariẹ ọ jẹ whẹro. A zizie i rai kpohọ eha-orọo evaọ Kena.

Oni Jesu ọ nyaze eha-orọo na re. Wọhọ ogbẹnyusu uviuwou enọ e be rọo na, o wọhọ nọ Meri o bi ruiruo rọ gbodibo kẹ erara na. Fikiere ọ tẹ kaki muẹrohọ oware jọ nọ u re no, onọ ọ vuẹ Jesu: “A wo udi hi.”

Okenọ Meri ọ rọ enẹ takẹ Jesu nọ o ru oware jọ kpahe udi nọ o riẹ hẹ, Jesu ọ kaki ru oma eheho. Ọ tẹ nọ nọ: “Eme mẹ avọ owhẹ a gbe ruẹ kugbe?” Wọhọ Ovie nọ Ọghẹnẹ o ro mu, uviuwou hayo egbẹnyusu a rẹ kpọe evaọ iruẹru riẹ hẹ. Fikiere Meri avọ areghẹ ọ tẹ siọ ẹme na ba obọ ọmọ riẹ, ta kẹ ahwo nọ e be gbodibo na nọ: “Koware koware nọ ọ ta kẹ owhai, wha ru ei.”

Whaọ ithẹ ame ilogbo ezeza e jọ etẹe, yọ ilita 40 e rẹ vọ ọvuọvo. Jesu ọ tẹ ta kẹ ahwo nọ e be gbodibo na nọ: “Wha ku ame vọ [ithẹ] ame na.” Egbodibo na a te vo ai vọ kokoko. Jesu ọ tẹ ta nọ: ‘Wha jọ eva rai jẹ kẹ ọnọ ọ be kpọ eha-orọo na.’

Ewoma udi na o tẹ were ọnọ ọ be kpọ eha-orọo na, yọ ọ riẹ nọ edhere igbunu a rọ rehọ iẹe ze he. Nọ o se ọva na, ọ tẹ ta nọ: “Kohwo kohwo emamọ udi o re fihọ o rọ ọsosuọ; nọ ahwo a jẹ da bu no, kẹsena a te fi o nọ u woma te he họ; rekọ wha rare emamọ udi ti fi enẹna.”

Onana họ oware igbunu ọsosuọ Jesu, yọ nọ a rue riẹ, o tẹ bọ ẹrọwọ ilele ekpokpọ riẹ ga. Uwhremu na, te oni riẹ gbe emọ oni riẹ, a te kpohọ okpẹwho Kapaniọm kẹle Abade Galili. Jọn 2:1-12.

▪ Okevẹ evaọ odibọgba Jesu a ro ru eha-orọo Kena na?

▪ Fikieme Jesu ọ jẹ se ẹjiroro oni riẹ?

▪ Didi oware igbunu Jesu o ru, kọ ẹvẹ u ro kpomahọ amọfa?