Uzou Avọ 18
Jọn O bi Kiekpotọ, Jesu O bi Vihọ
NỌ EHAA Ọnyavrẹ na u kuhọ no evaọ oke okpakpọ ọ 30 C.E., Jesu avọ ilele riẹ a te no Jerusalẹm. Ghele na, a zihe kpohọ iwou rai hi evaọ Galili rekọ a kpohọ orẹwho Judia, oria nọ a jẹ jọ họ ahwo ame. U te ukpe ovo no nọ Jọn Ọhọahwo-Ame na o bi ro ruiruo ọvo na, yọ o gbe wo ilele nọ i bi lele iei.
Uzẹme, Jesu ọ rehọ obọ riẹ họ ohwo ọvo ame he, rekọ ilele riẹ e họ ahwo ame evaọ otọ ọkpọvio riẹ. Ame-ọhọ rai o wo otofa ovo na wọhọ onọ Jọn ọ be họ, keme o rọ oka ekurẹriẹ ahwo Ju no izieraha rai kpahe Uzi ọvọ Ọghẹnẹ. Ghele na, nọ ọ kparoma no, Jesu ọ tẹ ta kẹ ilele riẹ nọ a họ ahwo ame nọ u wo otofa ofa. Ame-ọhọ Ileleikristi nẹnẹ u wo oka omarọkẹ ohwo re ọ gọ Jihova Ọghẹnẹ.
Dede na, evaọ emuhọ odibọgba Jesu nana, te Jọn gbe ọy’omariẹ, dede nọ a je ruiruo kugbe he, a bi wuhrẹ jẹ họ ahwo nọ a kurẹriẹ ame. Rekọ ilele Jọn a tẹ be re ihri je bi gu inoma kẹe kpahe Jesu: “Rabae, . . . ọ be jọ etenẹ họ ahwo ame, ahwo kpobi a be nya bru ei.”
Ukpenọ ọ re ihri, Jọn ọ tẹ ghọghọ fiki obokparọ Jesu ọ tẹ jẹ gwọlọ nọ ilele riẹ a ghọghọ. Ọ kareghẹhọ ai nọ: “Whai oma rai họ isẹi mẹ, no mẹ ta nọ, mẹ họ Kristi na ha, rekọ mẹ a vi karo kẹe.” Ọ tẹ kẹ ọtadhesẹ owoma jọ: “Ọva họ ọnọ o wo ọmọtibobo; [ọzọ] ọva, nọ o dikihẹ bi yo ẹme riẹ, ọ rẹ ghọghọ gaga fiki uru ọva na; fikiere enẹna oghọghọ mẹ o gba no.”
Jọn, wọhọ ogbẹnyusu Ọva na, ọ ghọghọ evaọ ole emerae ezeza nọ i kpemu no nọ o dhesẹ ilele riẹ kẹ Jesu. Ejọ rai a te zihe ro ahwo utu ọmọtibobo obọ odhiwu riẹ enọ Ileleikristi nọ a kẹ ẹzi i ti rugba. Jọn ọ tẹ jẹ gwọlọ nọ ilele riẹ obọnana a lele Jesu, nọ ẹjiroro riẹ o rọ nọ ọ rẹ ruẹrẹ edhere họ kẹ odibọgba obokparọ Kristi na. Wọhọ epanọ Jọn Ọhọahwo-Ame na o ru rie vevẹ: “Ọ rẹ terua hrọ, rekọ mẹ rẹ te kao hrọ.”
Jọn olele ọkpokpọ Jesu, ọnọ ọ kake jọ olele Jọn Ọhọahwo-Ame vẹre na, o kere kpahe emuhọ Jesu gbe obọdẹ iruo Riẹ evaọ esiwo ohwo-akpọ, ta nọ: “Ọ nọ o no ehru ze o kpehru vi ai kpobi . . . Ọsẹ na o you Ọmọ na, ọ tẹ rehọ eware kpobi họ obọ riẹ. Ọnọ ọ rọwo Ọmọ na o wo uzuazọ ebẹdẹ bẹdẹ; rekọ ọnọ o yo ẹme Ọmọ na ha ọ rẹ sae ruẹ uzuazọ họ, rekọ ofu Ọghẹnẹ ọ riẹ uzou.”
U kri hi nọ Jọn Ọhọahwo-Ame na ọ t’ẹme kpahe ekiekpotọ iruẹru riẹ no, Herọd Ovie na o te mu ei. Herọd ọ rọo Herọdias, aye Filip oniọvo riẹ, yọ nọ Jọn ọ jọ ẹgbede woro nọ oware othọthọ o ru na, Herọd o te mu ei fihọ uwou-odi. Nọ Jesu o yo kpahe imuẹmu Jọn, tei te ilele riẹ a te no Judia kpohọ Galili. Jọn 3:22–4:3; Iruẹru 19:4; Matiu 28:19; 2 Ahwo Kọrint 11:2; Mak 1:14; 6:17-20.
▪ Eme họ otofa ame-ọhọ nọ Jesu o vi ilele riẹ taure ọ tẹ te kparoma ze? Gbe okenọ ọ rọ kparoma ze no?
▪ Ẹvẹ Jọn o ro dhesẹ nọ unoma ilele riẹ na o thọ?
▪ Fikieme a je fi Jọn họ uwou-odi?