Uzou Avọ 23

Eware Igbunu Efa Evaọ Kapaniọm

ẸDIJALA nọ Jesu o se ilele ene riẹ no—Pita, Andru, Jemis, gbe Jọn—aikpobi a te kpohọ uwou-egagọ evaọ Kapaniọm. Evaọ etẹe Jesu o te muhọ ewuhrẹ, u te gbe ahwo na unu keme o bi wuhrẹ ai wọhọ ohwo nọ o wo udu orọnikọ wọhọ ikere-ebe na ha.

Evaọ Ẹdijala ọnana ọzae jọ nọ o wo ẹzi ogbegbe ọ riẹ. Nọ o dina kri no, o te bo via ruarua nọ: “Whẹ Jesu e Nazarẹt, eme ma gbe wo kugbe? Whọ nyaze te raha omai? Mẹ riẹ ọ no whẹ ọrọ, Emamọ ohwo Ọghẹnẹ.”

Idhivẹri nọ ọ be kpọ ọzae na ghinọ ẹnjẹle Setan jọ. Nọ ọ whọku idhivẹri na, Jesu ọ tẹ ta nọ: “Fibo, who no i no”!

Whaọ, idhivẹri na o te gele iei kie o te bo ruarua. Rekọ o te no ọzae na oma ababọ oma nọ ọ nwa riẹ. U te gbe ahwo kpobi unu! A tẹ be nọ nọ: “Onana eme? . . . Ọ rọ udu ta họ izi iyoma obọ, i yo ẹme riẹ.” Usi kpahe onana o tẹ vaha nya oria na kpobi duwu.

Nọ o no uwou-egagọ na no, Jesu avọ ilele riẹ a te kpohọ uwou Saimọn, hayo Pita. Ẹyao okpomahọ ọ be kẹ oniaye Pita uye gaga. A tẹ lẹe nọ: ‘Ivie fiobọhọ kẹe.’ Fikiere Jesu ọ tẹ nya bru ei, o te kru ei, ọ tẹ kpare iẹe dikihẹ. Ẹyao na ọ tẹ nwani noi oma o te mu emu họ ethere kẹ ai!

Uwhremu na, nọ ọre o kie diwi no, ahwo evaọ oria kpobi a te mu uwou Pita họ ẹnyaze avọ ahwo rai nọ e be mọ. U kri hi okpẹwho na kpobi u te kokohọ unuẹthẹ na! Jesu o te siwi enọ e rọ udevie rai mọ kpobi, makọ oghẹrẹ nọ ẹyao na o rọ kpobi. O tube le idhivẹri no oma enọ e rọ. Nọ e be nya via, idhivẹri nọ o le no na a ve bo nọ: “Whẹ họ Ọmọ Ọghẹnẹ!” Rekọ Jesu ọ vẹ whọku ai yọ ọ kẹ rai uvẹ re a t’ẹme he keme a riẹ nọ ọye họ Kristi na. Mak 1:21-34; Luk 4:31-41; Matiu 8:14-17.

▪ Eme ọ via evaọ uwou-egagọ evaọ Ẹdijala nọ Jesu o se ilele ene riẹ no?

▪ Diẹse Jesu ọ nya nọ o no uwou-egagọ na no, kọ didi eware igbunu ọ jọ obei ru?

▪ Eme ọ via uwhremu na evaọ owọwọ ọyena?