Uzou Avọ 25

Ohrọoriọ kẹ Ọmoti

NỌ JESU avọ ilele ene riẹ a bi weze kpohọ ikpewho Galili na, usi kpahe eware igbunu nọ o bi ru u bi do kẹre nya ẹkwotọ na kpobi duwu. Ẹme kpahe iruẹru riẹ o te do te okpẹwho jọ nọ ọmoti jọ ọ rọ. Luk ọbo na o dhesẹ i rie wọhọ nọ “oti ọ vọ oma” riẹ. Nọ ẹyao na o te kri ohwo oma no, ọ rẹ re eria sa-sa oma na no. Fikiere ọmoti ọnana ọ rọ iyiyẹ.

Nọ Jesu o te okpẹwho na, ọmoti na ọ tẹ nya bru ei. Wọhọ epanọ Uzi Ọghẹnẹ o ta, ọmoti o re bo via nọ, “Ọnọ ọ fo ho, ọnọ ọ fo ho,” amọfa a gbe bi kẹle gaga ha re ẹyao na ọ se ai oma ba evo ro. Ọmoti na o te kie vova tuotọ ọ tẹ lẹ Jesu nọ: “Olori, o tẹ ruọ owhẹ whọ rẹ sai ru omẹ fua.”

Ẹvẹ ẹrọwọ nọ ọzae na o fihọ Jesu o rro te! Ghele na, ẹvẹ ẹyao na o ru rie iyiyẹ fihọ te no! Eme Jesu o ti ru? Eme who he ru? Avọ ohrọoriọ, Jesu ọ tẹ riẹ obọ kẹe ọ tẹ rọ obọ te ọzae na, anọ: “O ruọ omẹ, a ru owhẹ fo.” Idudhe na oti na o te noi oma.

Kọ whọ gwọlọ ohwo nọ o wo ohrọoriọ wọhọ ọnana re ọ jọ ovie ra? Edhere nọ Jesu o ro yeri kugbe ọmoti na o kẹ omai imuẹro nọ evaọ etoke esuo Uvie Riẹ, eruẹaruẹ Ebaibol na i re ti rugba: “Ọ be re ohrọ eyẹlẹ gbe iruori, o te bi siwi uzuazọ iruori.” Ẹhẹ, Jesu o ve ti ru ẹgwọlọ udu riẹ gba re o fiobọhọ kẹ enọ e be mọ kpobi.

Makọ taure o te ti siwi ọmoti na, odibọgba Jesu o wha oghọghọ buobu ze no evaọ udevie ahwo na. Evaọ orugba eruẹaruẹ Aizaya, Jesu o te j’uzi kẹ ọzae nọ o siwi na nọ: “Whọ ta ẹme ọvuọvo kẹ ohwo ọvo ho.” Ọ tẹ kẹe uthubro nọ: “Nya vrẹ, e rehọ oma ra ghrẹ ozerẹ na, who dhe idhe nọ Mosis ọ tae na fiki ẹfuọ ra, kpere o jọ isẹi kẹ ae.”

Rekọ eva e were ọzae na te epanọ ọ sae rọ fae unu riẹ hẹ. Ọ tẹ nya e vravrẹ usi na evaọ oria kpobi, ababọ avro avọ isiuru gbe okpakpa nọ o fihọ udevie ahwo na tube te epanọ Jesu ọ gbẹ be sae rọ jọ ẹgbede nya evaọ okpẹwho na ha. Fikiere, Jesu ọ tẹ jẹ kuoma dhere evaọ eria nọ ohwo ọvo ọ be rria ha, yọ ahwo evaọ oria kpobi a tẹ be nyaze te gaviezọ kẹe re a je siwi ai no eyao rai. Luk 5:12-16; Mak 1:40-45; Matiu 8:2-4; Iruo-Izerẹ 13:45; 14:10-13; Olezi 72:13; Aizaya 42:1, 2.

▪ Eme oti o re ru ohwo, kọ didi unuovẹvẹ ọmoti ọ rẹ kẹ?

▪ Ẹvẹ ọmoti ọ rọ lẹ Jesu, kọ eme ma re wuhrẹ no uyo Jesu ze?

▪ Ẹvẹ ọzae nọ a siwi na o ro yoẹme kẹ Jesu hu, kọ eme u no rie ze?