Uzou Avọ 30

Uyo Rọkẹ Enọ E be Wọ Suẹe

NỌ ISU egagọ ahwo Ju a bọwo Jesu o ta nọ ọ be raha Ẹdijala, ọ tẹ kuyo nọ: “Ọsẹ mẹ o gbe bi ru iruo rite enẹna, me te je bi ru re.”

Makọ oghẹrẹ nọ otu Farisi a rẹ tae kẹhẹ, iruo Jesu erọ oghẹrẹ enọ uzi Ẹdijala o ghọ họ. Iruo usiuwoma ota gbe esiwo riẹ o rọ iruo nọ i no obọ Ọghẹnẹ ze, yọ evaọ aruorokele oriruo Ọghẹnẹ, o te gbe bi ru ai kẹdẹ kẹdẹ. Ghele na, uyo riẹ o tẹ lẹliẹ eva dha ahwo Ju na vi epaọ ọsosuọ, a tẹ gwọlọ nọ a re kpei. Fikieme?

A rọwo inọ orọnikọ Jesu ọ be raha Ẹdijala na ọvo ho rekọ a roro nọ Ọmọ obọ Ọghẹnẹ nọ o bi se oma riẹ na yọ eme ọ izue. Ghele na, ozọ u mu Jesu hu o te yo kẹ ai viere kpahe usu aruoriwo riẹ kugbe Ọghẹnẹ. Ọ ta nọ: “Ọsẹ na o you Ọmọ na, o te dhesẹ eware kpobi nọ ọye oma riẹ o re ruẹ kẹ e.”

Jesu ọ tẹ gbẹ ta haro nọ: “Epanọ Ọsẹ ọ rẹ kpare iwhuowhu ọ vẹ kẹ ae uzuazọ na, ere Ọmọ ọ rẹ rehọ uzuazọ kẹ enọ ewere riẹ.” Uzẹme, Ọmọ na o muọ iwhuowhu họ ẹkpare no evaọ edhere abọ-ẹzi! Jesu ọ ta nọ: “Ọnọ oyo ẹme mẹ ọ tẹ rọwo Ọ nọ o vi omẹ ze, . . . ọ vrẹ no uwhu kpohọ uzuazọ no.” Ẹhẹ, ọ tẹ gbẹ ta haro nọ: “Oke o be tha, o rọ enẹna, nọ iwhuowhu i re ti yo uru Ọmọ Ọghẹnẹ, enọ i yo e rẹ te zọ.”

Dede nọ okerefihotọ ọvuọvo ọ rọ họ inọ Jesu ọ ghinẹ kpare ohwo jọ no iwhuowhu ze no evaọ etoke nana, ọ be ta kẹ enọ e be bọwo iẹe ota na nọ ẹkparomatha otiọye na ọ te via. Ọ ta nọ: “Onana u gbe owhai enu hu; keme oke o be tha nọ enọ e rọ eva [uki ekareghẹhọ] kpobi i je ti yo uru riẹ, a vẹ te nya via.”

Rite oke onana, Jesu ọ re jọ ẹgbede dhesẹ abọ nọ o ti wo evaọ ẹjiroro Ọghẹnẹ evaọ edhere ovevẹ otiọye na ha. Rekọ enọ e be bọwo Jesu ota na a wo isẹri efa buobu kpahe eware enana. Jesu ọ kareghẹhọ ai nọ: “Wha vi ikọ bru Jọn, o te se isẹi uzẹme na.”

Ikpe ivẹ ọvo nọ i kpemu, Jọn Ọhọahwo-Ame na ọ ta kẹ isu ahwo Ju enana kpahe Ọnọ ọ be rọ kpahe iẹe. Nọ ọ kareghẹhọ ai kpahe ọghọ nọ a wo vẹre kẹ Jọn nọ a fihọ uwou-odi no na, Jesu ọ tẹ ta nọ: “[O] ruọ owhai nọ wha rẹ ghọghọ eva ezi jọ eva elo riẹ.” Jesu ọ kareghọhọ ai eme enana avọ irẹro nọ o ti fiobọhọ kẹ ai, ẹhẹ, siwi ai. Ghele na, ọ rọ ẹro so isẹri-ise Jọn he.

“Iruo nọ Ọsẹ na ọ kẹ omẹ ru [nọ u kugbe oware igbunu nọ ọ nwani ru no na], iruo yena me re ruo, i se isẹi kẹ omẹ nọ Ọsẹ na ọye o vi omẹ ze.” Rekọ u te no oye no, Jesu ọ tẹ gbẹ ta haro nọ: “Ọsẹ nọ o vi omẹ ze o se isẹi kẹ omẹ.” Ọghẹnẹ o se isẹi kpahe Jesu, wọhọ oriruo, eva oke ame-ọhọ riẹ, ta nọ: “Ọnana họ Ọmọ oyoyou mẹ, ọnọ ọ were omẹ hrọ.”

Uzẹme, enọ e be bọwo Jesu ota a wo uvumọ unoma nọ a re gu nọ a be rọ se iẹe he. Uzedhe Ikereakere nọ a ta nọ a be kiẹ na i se isẹri kpahe iẹe! Jesu o te ku ei họ nọ: “Orọnọ wha rọwo Mosis, wha hẹ rọwo omẹ, keme o kere kpahe omẹ. Rekọ wha gbẹ rọwo ekere riẹ hẹ, kẹvẹ wha rẹ sae te rọwo eme mẹ?” Jọn 5:17-47; 1:19-27; Matiu 3:17.

▪ Fikieme iruo Jesu e gbẹ rọ ezue Ẹdijala ha?

▪ Ẹvẹ Jesu o dhesẹ abọ nọ o wo evaọ ẹjiroro Ọghẹnẹ?

▪ Re o dhesẹ nọ Ọmọ Ọghẹnẹ ọ rọ, isẹri-ise ono Jesu ọ riẹ obọ kpohọ?